Loma 2:3-18

³Dopaka doko, endakali waka dupame mana koo dopale minilyaminona dupa-kisa koo silyamona lao akali embame yapao kalyeno doko, embame mana koo dutupa miningiaka! Dopa pingi dokonya Goteme emba kapa pao yanu nanyetana lao masilipi?

⁴Pande, mana epe minao yapa maka nakayao yapa yanu nanyoo malisoo katenge Gote doko embame kilya kandao kalyepe? Emba mona kapilyetala koo dupa yakinatale lao Goteme mana epe minao katenge doko embame masala naelepe?

⁵Embame mona kapilyoo koo kalai dupa yakinala nayao tuu pyoo kalyeno. Embame dopa pyoo Gote minao etete imbuaka pisoo katao emba pyatamo gii doko kandao nyalanya pilino. Gii dokopa baame endakali koo pingi dupa tolao yanu nyingi doko laitaka pita.

⁶Endakali dupa pitakame mana minataminoli pyoo baame yanu pyata.

⁷Mana epe dupa yakinala naenya minawaka katao, tii pipae katapengepi, kenge epe soo katapengepi, kumala nayao katapengepi, dupa kutao nyoo katenge endakali dupa Goteme yanu pyao lete etete kataseta.

⁸Dee mana epe dupa watao minala naenya, nyakama tange iki lao masetala mana koo dupa watao miningi endakali dupa Goteme imbumi kumapala yanu pyao etete minao koyaseta.

⁹Endakali mana koo minao katenge dupa pitaka-kisa Goteme kenda pipaepi tanda nengepi dupa pena lata. Juta dupa-kisa wambao pena latala tata waka dupa-kisa pena lataka.

¹⁰Dopaka doko tii pipae katapengepi, kenge epe soo katapengepi, mona lyuu lao katapengepi, dupa baame endakali mana epe miningi dupa pitaka maita. Juta dupa wambao maitala tata waka dupa maitaka.

¹¹Doko, Goteme endakalinya lengelyaapi kandao yapala naenge.

¹²Endakali yangi dupa-kisa mana setapae Goteme Mosese maiyamo dupa nasiamopa mana koo miniamino dupa pitaka koyatami. Mana setapae dupa dupa-kisa nasiamo dokome dupa nisala nayata. Dee endakali yangi dupa-kisa mana setapae dupa siamopa mana koo miniamino dupa pitaka mana setapae dupanya lapae silyamoli pyoo Goteme yapapala yanu nyeta.

¹³Doko aipuma? Mana setapae dupa kaleme iki singi endakali dupa Goteme tolataena nalata. Mana setapae dupanya lapae silyamoli pingi endakali dupa baame tolataena lata.

¹⁴Endakali tata waka dupa-kisa mana setapae dupa nasingi. Nasingiaka doko, gii mendepa dupa tangeme mana setapaenya lapae silyamoli pyoo pingima, dokonya dupanya masingi doko dupa tangenya mana setapae lamo.

¹⁵Nyakamame dopa pyepape dopa napyepape lao dupanya mona dokonya mana setapae singi dupa dupame mana minilyami dokome panasingi. Dee dupanya masingi dokome panasingiaka. Dupame kopeta pilyamino dokopa nyakamanya masingi dokome dupa-kisa tenge setao, “Embame ongo kopeta pilinona,” lenge. Kamea pyoo pilyamino dokopa, “Embame ongo kamea pyoo pilinona,” lenge.

¹⁶Kini, Goteme endakali dupanya yalo petae singi dupa Jisasa Kataisame yapena latamo gii dokopa, endakali dupame dopa pyoo kateamina lao panata. Nambame Wai Pii Epe lamaingi dokonya dopa lapae silyamo.

¹⁷Dee emba aipape? Embame, “Namba Jutana,” lenge. Gotenya piipi manapi dupa emba-kisa silyamona lao masetala tungi pyao katenge. Embame Gote embanya Gotena lao masetala luingi.

¹⁸Goteme pipimili lao masingi dupa embame kandatala baanya piipi manapi dupa mana nyoo katao angi dupa yapao nyoo katenge.