Romu 2:3-18

³La sou nini namitema vitanisi no lia ꞌo natilovosiꞌa ta menexine ne no anu ꞌiliꞌilixoneꞌi ne ia nini kalumo naꞌoxoꞌoxonu ne. La sou nini nexavutala a loxovaa? La sou nini namomomo sou naꞌume no anu laꞌia noxou Lataua?

⁴Mo Lataua muꞌoxonu ꞌilixo laixe manina la ukolinu susu noxine ne palea uasi, muxolu seꞌisisi mo mulosine voxo maxuveeni sou lexe nini naxiu tumalineu ꞌilixo masua. La sou ꞌilixo laixe noxou Lataua e muꞌoxonu noxine ne, nini nemaisou a loxovaa? Nini nemaisou loxo mii vitanisi, ne?

⁵La sou nini netatusou oponeni xe naxiunu tumalineu ꞌilixo masua uasi, la anu loxo nini mene natetelonu tuꞌumaxu utelo noxine la. No anu voxo mine laꞌia noxou Lataua uxali lamana no anu voxo mine Anu utulusiꞌa ta mitema no anu vaivaikala.

⁶La Lataua ulosiꞌa ta mitema vilevilesi ulusou umomomo no anu ꞌiliꞌilixo maꞌia ane aneꞌi miꞌoxonu.

⁷Noxiꞌa aneꞌi ane xavineꞌi sou iꞌoxoꞌoxonu ꞌilixo laixe mo ikakamuli voteꞌi sou iloꞌa Lataua ixolu teitexi no opo loxotolo, mo inoꞌu uala tila, xe inoꞌu mauli ane ukalu uasi, la Lataua ulosiꞌa mauli ane kaluxu uasi.

⁸Ia noxiꞌa aneꞌi ane ixavutala noxiꞌasi mo ixiunu tumaliꞌa no anu vaikala manina xe imulinu ꞌiliꞌilixo masumasuasi, la laꞌia noxou Lataua uxolu noxiꞌa la inoꞌu navunavu tatila manina.

⁹Tuꞌutuꞌumaxu mo navunavu uxali noxiꞌa ta mitema tavuꞌalo e iꞌoxoꞌoxonu ꞌiliꞌilixo masumasua aloxo ne. Ta Iutaia tei xe iliꞌi la noxiꞌa aneꞌi ane ta Iutaia uasi.

¹⁰Ia Lataua ulosiꞌa ta mitema ane miꞌoxoꞌoxonu ꞌiliꞌilixo laixe opo seꞌisisi xe uala tila. Usoko noxiꞌa ta Iutaia tei xe iliꞌi la noxiꞌa aneꞌi ane ta Iutaia uasi.

¹¹Xo Lataua umomomo sou uꞌoxonu tulatula noxou evile uasi.

¹²La sou ta mitema e ilavusou lapuloto uasi la iꞌoxonu ꞌiliꞌilixo masumasua ne iulua mo aneꞌi ane milavusou lapuloto ia iꞌoxoꞌoxonu susu ne aneꞌi iulua kalumo.

¹³Xo ta mitema e milomusou lapuloto vitanisi la imulimulinu uasi ne aneꞌi ilapu no iou Lataua uasi. Ia aneꞌi ane milomusou lapuloto xe imulimulinu la Lataua ulemeꞌa lexe aneꞌi ta mitema mulapu.

¹⁴Ta mitema e ta Iutaia uasi aneꞌi vaꞌaxu mo ne, aneꞌi iꞌa lapuloto sou imulinu uasi, ia no anu xavutalaiꞌasi la imulimulinu ꞌiliꞌilixo loxo lapuloto mulemolu ne. Manina aneꞌi iꞌa lapuloto uasi, ia xavutalaiꞌa uulaxuneꞌi sou imulimulinu lapuloto ne, la xavutala noxiꞌasi ne muxali loxo lapuloto noxiꞌa.

¹⁵Musoko no mine aneꞌi miꞌoxonu aloxo ne, la ꞌilixoneꞌi mumaxau lexe mii maꞌia lapuloto mulemolu lexe imulimulinu ne Lataua mukaukavunu muxolu no nano no taneꞌi. Mo no anu ꞌiliꞌilixo muxali muatu no anu xavutalaiꞌa ne mumaxaꞌu lexe lapuloto muxolu no nano no oponeꞌi ne, manina mo voxo moseꞌi la xavutalaiꞌa uvikalaneꞌi lexe ngingi ngesusu xe uvikalaneꞌi lamana lexe ngingi ngasusu uasi.

¹⁶Anu uxali no anu voxo e Lataua musosovosou sou utulusiꞌa ta mitema no anu vaivaikala sou ꞌiliꞌilixo talume mo xavutala talume noxiꞌa e mixolu la miꞌoxoꞌoxonu. Aloxo no anu aꞌalo laixe eni eaꞌaloxu lexe Lataua uꞌitalonu xaixai sou utilovosiꞌa ta mitema ukalusi ne no avolu Iesu Kalisito.

¹⁷Ia vaimomo ꞌo eni avikalangengi ta Iutaia lamana aloxo ꞌo, ngingi ngexavutala lexe no anu voteꞌi sou ngamulinu lapuloto laixe, la anu umomomo sou usuꞌulingengi. Mo mamu sou ngaꞌitinu ualasinge la ngavikala lexe nexi ta mitema noxou Lataua.

¹⁸Ngingi ne ngelavusou masaxa noxou Lataua ne, mo ngenoꞌu lavulavu no anu lapuloto ne mukalusi sou ngamulinu ꞌiliꞌilixo maꞌia mulapu.