Lifitikos 13:38-57

³⁸Are a wor tikepwechepwech won inisin eman mwän ika eman fefin,

³⁹ewe souasor epwe nenengenöchü ewe aramas. Nge are ewe tikepwechepwech won inisin esap nien lingewu, a chök üri eu kil. Iwe, ewe aramas a limöch.

⁴⁰Are eman mwän a mworola meten möküran, ewe aramas a mongopal, nge a chök nom lon tettelin chon limöch.

⁴¹Iwe, are eman mwän a mworola meten möküren eten mesan me meten esen mongön, a chök pal eten mesan, nge a nom lon tettelin chon limöch.

⁴²Nge are a wor eu kil mi parepwech won pallen möküran ika won eten mesen ewe mwän, iei eu kilingau mi afeiengau a üri won möküran ika won eten mesan.

⁴³Mürin, ewe souasor epwe nenengenöchü ewe mwän. Nge are ewe pwo won pallen möküran ika won eten mesan a tikeparepwech usun chök eu kilingau mi afeiengau won inis,

⁴⁴ewe aramas a limengau. Iwe, ewe souasor epwe anomu ewe aramas lon tettelin chon limengau, pun a eäni eu kilingau mi afeiengau won möküran.

⁴⁵Iwe, eman mi eäni eu kilingau mi afeiengau epwe üföüf üf mi kam o atorongaua möküran, epwe pwal pwölüela awan o kökkö, “Üa limengau, üa limengau.”

⁴⁶Epwe chök nonom lon tettelin chon limengau lon ükükün langatamen fansoun an eäni ewe samau. Iwe, epwe imwüla lon lenian lükün ewe ia aramas ra nonom ie.

⁴⁷Iwe, are a wor niwangir won echö üf, ese lifilifil ika ewe üf a för seni ülen man ika seni sokun silin irä,

⁴⁸are a nom won echö mangaku mi för seni sokun silin irä ika seni ülen man, are a pwal nom won silin man ika won och pisek mi för seni silin man,

⁴⁹are ei niwangir a anüefetil ika anüepar, iei eu niwangir mi chöfetal. Iwe, repwe aküna ngeni ewe souasor.

⁵⁰Ewe souasor epwe nenengenöchü ewe niwangir o aimwüela ewe pisek lon ükükün fisu rän.

⁵¹Nge lon afisuen rän epwe nenengenöchüsefäli ewe niwangir. Iwe, are ewe niwangir a lapala won ewe üf ika won ewe mangaku ika won ewe silin man, ese lifilifil met sokun aean ewe silin man, ewe niwangir a fokun ngau, ewe pisek a limengau.

⁵²Iwe, ewe souasor epwe kenala ewe pisek. Pokiten ewe niwangir a fokun ngau, epwe chök kekila.

⁵³Nge are ewe souasor a nenengenöchüsefäli o küna pwe ewe niwangir esap lapala won ewe üf ika won ewe mangaku ika won och seni silin man,

⁵⁴ewe souasor epwe allük pwe repwe sopuni ewe pisek mi niwangir. Mürin epwe aimwüela pwal lon ükükün fisu rän.

⁵⁵Mürin, ewe souasor epwe nenengenöchüsefäli ewe pisek mi niwangir mürin an sop. Nge are ewe niwangir esap siwil anüanün, inamwo are esap pwal lapala, ewe pisek a chök limengau. Kopwe chök kenala ewe pisek, ese lifilifil ika ewe niwangir mi ngau a nom lon ika lükün.

⁵⁶Nge are ewe souasor a nenengenöchüsefäli o küna pwe ewe niwangir a aromomo mürin an sop, epwe kamwewu ewe ia a niwangir ie me won ewe üf ika ewe silin man ika ewe mangaku.

⁵⁷Iwe, are ewe niwangir a pwäsefäl me mürin won ewe üf ika won ewe mangaku ika won och pisek seni silin man, ewe niwangir a chöfetal. Kopwe chök kenala ewe pisek mi ngau niwangirin.