Levitikus 15:4-21

⁴Re gi chob nra par facha’ nga daken ara thig nga daken ma ke ta’ay.

⁵Ma en nra math ko chob rok

⁶ara par nga daken ban’en niki i par fare mo’on nga daken, ma thingari maluknag e mad rok miki maluk, me par nib ta’ay nge mada’ ko blayal’.

⁷Ma en nra math ngak fare mo’on ni be lul’ logwen dow e thangri maluknag e mad rok miki maluk, me par nib ta’ay nge mada’ ko blayal’.

⁸Fa’anra thuw fare mo’on ni be lul’ logwen dow nga daken be’ nde ta’ay, ma thangri maluknag facha’ e mad rok miki maluk, me par nib ta’ay nge mada’ ko blayal’.

⁹Demturug e re gi saddle ara ban’en nike par fare mo’on ni be lul’ logwen dow nga daken mra ta’ay.

¹⁰Ma ra math be’ nga ban’en niki i par fare mo’on nga daken ma ke ta’ay facha’ nge mada’ ko blayal’. Mra fek be’ ban’en niki i par fare mo’on nga daken, ma thangri maluknag e mad rok miki maluk, me par nib ta’ay nge mada’ ko blayal’.

¹¹Fa’anra fare mo’on ni be lul’ logwen dow e de maluknag pa’ nsom’on me math ngak be’, ma facha’ nike math ngak e thangri maluknag e mad rok miki maluk, me par nib ta’ay nge mada’ ko blayal’.

¹²Ma demturug e re th’ib nni ngongliy ko but’ nra math fare mo’on ngay ni be lul’ logwen dow ma thingar ni bilig fare th’ib, ma demturug e re dabiy nni ngongliy ko ren nra math ngay ma thingar ni maluknag.

¹³Ma nap’an nra gol fare mo’on ko fare m’ar ni i lul’ logwen dow riy, ma thangri son ni medlip e rran ngemu’ me maluknag e mad rok miki maluk ko ran nib machalbog, ma aram e ke be’ech.

¹⁴Ma re rran nra gaman e meruk fen ngay e nge fek l’agruw e arche’ ni dove ara l’agruw e blogol nga langan fare Tent u p’eowchen SOMOL ni nge pi’ ngak fare prist.

¹⁵Me pi’ fare prist reb fa gali arche’ nib maligach ni fan ko denen, ma reb e nge pi’ nib maligach ni mo’oruf. Aray rogon ni nge bangbengnag fare prist rogon fa’anem ni nge be’ech.

¹⁶Nap’an e ra yib logwen dow be’ nib mo’on ni aram e ke garda’, ma thangri maluknag dow ni ga’ngin, me par nib ta’ay nge mada’ ko blayal’.

¹⁷Demturug e mit i n’en nni ngongliy ko mad fa keru’ e gamanman nra aw logowen dow be’ nib mo’on nga daken, ma thingar ni maluknag, me par nib ta’ay nge mada’ ko blayal’.

¹⁸Ra par be’ nib pumo’on nge be’ nib bpin ngar mu’ gow ma yow l’agruw ni yow ra maluk, miyow par ni yow ba ta’ay nge mada’ ko blayal’.

¹⁹Nap’an nra luw be’ ni bpin u reb e pul, ma ra par nib ta’ay ni medlip e rran. Ma en nra math ngak e ku ra ta’ay nge mada’ ko blayal’.

²⁰Demturug e ren’en nra par fare bpin nga daken, ara mol nga daken u nap’an nib pal mra ta’ay.

²¹Demturug be’ nra math ko chob rok ara ban’en niki i par fare bpin u daken ma thangri maluknag e mad rok miki maluk, me par nib ta’ay nge blayal’.