Taha Bapare Sâcmutâc 15:4-21

⁴Irec ira me ira fome fofozi wâwânâŋhec jaha eocmu, me ira me ira ŋeme ŋeŋezi wâc wâwânâŋhec jaha eocmu.

⁵Me ŋic izi me izi fofo‐ticne ba bâuac eocmu e qoruc wiac‐ticne ʒurerâ e jahacne wâc opâ ruazejec, ehuc wâwânâŋhec jaha juha hae ŋafezejec.

⁶Me ŋic izi me izi ŋic sahac opâ‐ticne wahame ŋewec ijaha ŋeocmu e qoruc wiac‐ticne ʒurerâ e jahacne wâc opâ ruazejec, ehuc wâwânâŋhec jaha juha hae ŋafezejec.

⁷Me ŋic izi me izi ŋic sahac opâ‐ticne wahaekac e ba bâuac ecneocmuzi qoruc wiac‐ticne ʒurerâ e jahacne wâc opâ ruazejec, ehuc wâwânâŋhec jaha juha hae ŋafezejec.

⁸Me ŋic sahac opâ‐ticne wahaekac e ŋic moc tâfeckeme eki qoruc wiac‐ticne ʒurerâ e jahacne wâc opâ ruazejec, ehuc wâwânâŋhec jaha juha hae ŋafezejec.

⁹Me ŋic sahac opâ‐ticne wahaekaczi sate faio ŋeme sate i wâwânâŋhec jaha eocmu.

¹⁰Me ŋic e wiac i me i ŋefackeocmu i ŋic moczi ba bâuac erâ wâwânâŋhec jaha juha hae ŋafezejec; me moc e wiac iŋucne baraocmu e qoruc wiac‐ticne ʒurerâ e jahacne wâc opâ ruazejec, ehuc wâwânâŋhec jaha juha hae ŋafezejec.

¹¹Me ŋic sahac opâ‐ticne wahaekaczi meticne mi ʒuʒure ŋic moc ba bâuac ecneocmu e qoruc wiac‐ticne ʒurerâ e jahacne wâc opâ ruazejec, ehuc wâwânâŋhec jaha juha hae ŋafezejec.

¹²Me ŋic sahac opâ‐ticne wahaekaczi kuʒi moc ba bâuac eme kuʒi i henʒaŋnenʒepieŋ, oto wiac ine opâzi ʒurenʒepieŋ.

¹³“Eme ŋic sahac opâ‐ticne wâwânâŋhec e ɋiɋic qarâ ɋaɋackeocte ʒoaŋ gie bapa 7 wose fezejec. Dameŋ i tarame qoruc wiac‐ticne ʒurerâ e jahacne wâc opâ fifisinao rarâ ruahuc ɋaɋackezejec.

¹⁴Erâ ʒoaŋ gie bapa namba 8 ira ine hapâ me buni jajahec rocjofarâ tutumaŋ qoruc bozere motâcko Wofuŋte maio taha bapa râcnezejec.

¹⁵Eme taha bapazi taha râeme moc i sâqocne tâtâmire tahare biŋe eha moc ine taha bâzire biŋe ezejec. Ehame taha bapa e Wofuŋte maio ŋic wâwânâŋ‐ticnere erâ kiwiric jâoc rozejec.

¹⁶“Ŋic moc e wie gorewac‐ticne hoŋkeocmu e sahac‐ticne sasawa opâzi ʒure‐fârezejec, ehuc wâwânâŋhec jaha juha hae ŋafezejec.

¹⁷Ehame wie gorewac‐ticnezi ŋaqi wiac me fofo mâki bânâŋkeme opâo ʒure‐fârenʒepieŋ, eme wâwânâŋhec jaha foha hae ŋafezejec.

¹⁸Me ŋic moczi ŋokac mochec fohuc wie gorewac‐ticne hoŋkeme jahe mâmâc jaha opâ ruarâ wâwânâŋhec jaha juhapire hae ŋafezejec.

¹⁹“Ŋokac moc e mosa dameŋ‐ticnao soc rohuc juocmu e wâwânâŋhec erâ juhame ʒoaŋ gie bapa 7 tarazejec; ehame moczi ba bâuac ecnerâ wâwânâŋhec jaha juha hae ŋafezejec.

²⁰Eme ŋokac e wiac irec me irec fainao fome wiac izi wâwânâŋhec jaha eocmu; me wiac i me i irec fainao ŋeme wâwânâŋhec jaha eocmu.

²¹Me moc e fofo‐ticne ba bâuac eocmu e qoruc wiac‐ticne ʒurerâ e jahacne wâc opâ ruazejec, ehuc wâwânâŋhec jaha juha hae ŋafezejec.