Levitikus 11:27-46

²⁷Ma urngin e gamanman nma yan nma math ga’ngin yang i lan ay nga but’ ni mayan nga aningeg raba’ i ay ni bod e pilis nge gatuw, e ra ta’ay nagmed; ma en nra math nga downgin bagyad nike yim’ e ra par nib ta’ay nge mada’ ko blayal’,

²⁸ma cha’ ni fek e reb e pin’ey e thangri luknag e mad rok me par nib ta’ay nge mada’ ko blayal’; pin’em e ra ta’ay nagmed.

²⁹Ba’aray e pi graraw nra ta’ay nagmed u roy u fayleng: weasel, boro’, nge galuf,

³⁰adburru’, gayuch, atilgog, athlowo’, nge atraw’.

³¹En nra math nga reb nike yim’ e ra par nib ta’ay nge mada’ ko blayal’.

³²Ma fa’anra mul reb nike yim’ nga daken demturug ban’en, ma fare n’en e ra ta’ay. Ndemturug ko bochyang i plang, fa mad, fa keru’ e gamanman, fa tutuw, ni demturug ko mang e yima fanay ngay, ma thingar ni chultheg fare n’en nga maran, machane ra par nib ta’ay nge mada’ ko blayal’.

³³Ma fa’anra ra mul reb nike yim’ nga daken ba th’ib nni ngongliy ko but’, ma urngin e tin bay u langgin fare th’ib mra ta’ay, ma fare th’ib e thingar ni bilig.

³⁴Ma rachey ni map’ ranggin e re th’ib ney nga daken ba ggan, ma fare ggan e ra ta’ay, ma tin yima unum riy e ku ra ta’ay.

³⁵Demturug ban’en nra mul reb fa pin’en nike yim’ nga daken ma ra ta’ay; ra ba stof fa ba oven ma ngan blig.

³⁶Machane ba alublub fa ba tafen e ran e ra par nib be’ech, ni yug aram rogon ni demturug ban’en nra math nga reb e pin’em nike yim’ me ta’ay.

³⁷Ma fa’anra mul reb e pin’em nike yim’ nga daken e awoch ni yibe n’en ni ngan yung, ma fare awoch e ku ra par nib be’ech.

³⁸Machane fa’ara kan tay fapi awoch nga mran me mul reb e pin’ey nike yim’ nga daken, ma fare awoch e ra ta’ay.

³⁹Fa’anra yim’ reb e gamanman ni yima longuy, ma en nra math ngay e ra par nib ta’ay nge mada’ ko blayal’.

⁴⁰Ma fa’anra kay be’ bang ko fare gamanman, ma thangri luknag e mad rok, me ra par nib alit nge mada’ ko blayal’; en nra fek fare gamanman nike yim e thangri luknag e mad rok, me ra par nib ta’ay nge mada’ ko blayal’.

⁴¹Thingar dab mu longuyed e pi gamanman nib achig nma yan u daken e but’,

⁴²ndemturug ko ma gararaw, fa ma yan nga ay ni aningeg raba’, fa ba yo’or raba’ i ay.

⁴³Dab mu ta’ay niged gimed u reb e pin’ey ni ngam longyed.

⁴⁴I Gag SOMOL ni Got romed, ere thingar mu ted gimed ni gimed ba tabgul, ni bochan e gub thothup.

⁴⁵Ya Gag SOMOL e gu fekmed nga wuru’ yu Egypt ya nge yag ni nggu mang Got romed. Thingar mu thothupgad, ya gub thothup.

⁴⁶Irera’ e pi gafal ni murung’agen e pi gamanman nge pi arche’, nge urngin e pin’en nma par u mday ngu mran, nge urngin e tin ma yan u daken e but’.