Levitico 23:1-18

¹Maʌ̃be Ãcõrẽba Moisea jarasia:

²–Israelerãa jaradua mʌ̃a naʌ̃gʌ ewari droma b̶eada poaza obi b̶ʌda. Maʌ̃ ewari b̶ead̶e bãrãra ãbaa dji jʌred̶ida panʌa mʌ̃́a bia bed̶ead̶i carea.

³Sei ewari bãrã trajura od̶ida panʌa, baribʌrʌ sietebema ewarid̶e ʌ̃nãũnida panʌa. Maʌ̃ ewarid̶e bãrãra ni maãrĩ bid̶a trajad̶acara panʌa. Maʌ̃ awara ãbaa dji jʌred̶ida panʌa mʌ̃́a bia bed̶ead̶i carea. Bãrã panane wãbʌdama bid̶a ʌ̃nãũbada ewarira mʌ̃ itea wagad̶ida panʌa.

⁴Mʌ̃a naʌ̃gʌ ewari droma b̶eada poaza obi b̶ʌa. Mʌ̃a b̶ʌd̶a ewarid̶e maʌ̃ ewari b̶eara bãrãba od̶ida panʌa. Maʌ̃ ewarid̶e ãbaa dji jʌred̶ida panʌa mʌ̃́a bia bed̶ead̶i carea.

⁵Poaza dji naãrãbema jed̶ecod̶e catorce ewari queubʌrʌd̶e bãrã Egiptod̶eba ẽdrʌped̶ad̶a quĩrãnebabada ewarira od̶ida panʌa mʌ̃́a bia bed̶ead̶i carea.

⁶Maʌ̃be ab̶ari jed̶ecod̶e quince ewarid̶eba ʌ̃taa bãrãba paʌ̃ ẽsãbari neẽ́ b̶ʌ cobada ewarira od̶ida panʌa mʌ̃́a bia bed̶ead̶i carea. Maʌ̃ne siete ewari bãrãba paʌ̃ ẽsãbari neẽ́ b̶ʌda cod̶ida panʌa.

⁷Dji naãrãbema ewarid̶e bãrãra ãbaa dji jʌred̶ida panʌa mʌ̃́a bia bed̶ead̶i carea. Maʌ̃ ewarid̶e bãrãra trajad̶acara panʌa.

⁸Maʌ̃ siete ewarid̶e animarãda mʌ̃́a ewariza babue diabid̶ida panʌa. Jĩrũarebema ewarid̶e bãrãra wayacusa ãbaa dji jʌred̶ida panʌa mʌ̃́a bia bed̶ead̶i carea. Maʌ̃ ewarid̶e bid̶a bãrãra trajad̶acara panʌa.–

⁹Idjab̶a Ãcõrẽba Moisea jarasia:

¹⁰–Israelerãa nãwã jaradua: “Mʌ̃a bãrãa diai jarad̶a ẽjũãne jũẽped̶ad̶acarea poaza bãrã néu naãrã ewabʌdad̶ebemada jʌwa jãmãtʌma ab̶a sacerdotemaa eded̶ida panʌa.

¹¹Maʌ̃ra idjia mʌ̃ quĩrãpita ʌ̃taa waida b̶ʌa mʌ̃a bãrã bia unui carea. Mãwã oida b̶ʌa bãrã Egiptod̶eba ẽdrʌped̶ad̶a quĩrãnebabada ewari nurẽma.

¹²Ara maʌ̃ ewarid̶e bãrãba oveja poa ab̶a b̶ʌda mʌ̃́a babue diabid̶ida panʌa. Maʌ̃ ovejara jũma bia b̶aida b̶ʌa.

¹³Maʌ̃ awara dji biara b̶ʌ harinada eped̶eco jũgurua umé nedragad̶aa bʌratʌd̶aped̶a maʌ̃nebema sid̶a mʌ̃́a maãrĩ babue diabid̶ida panʌa. Maʌ̃ harina babue diabʌrʌra mʌ̃a bia unuya. Idjab̶a uva b̶ada boteya ab̶a animarã babue diabada ʌ̃rʌ̃ mʌ̃́a wea diabid̶ida panʌa.

¹⁴Poaza maʌ̃gʌra mʌ̃́a diad̶i naẽna maʌ̃ poad̶ebema ewabʌdara cocara panʌa. Djiwid̶i puread̶ara, dji jututiad̶a sid̶a cocara panʌa. Paʌ̃ sid̶a od̶aped̶a cocara panʌa. Id̶iba ʌ̃taa bãrã panane wãbʌdaza maʌ̃ bed̶eara ĩjã od̶ida panʌa.

¹⁵Bãrã Egiptod̶eba ẽdrʌped̶ad̶a quĩrãnebabada ewari nurẽma bãrã néu naãrã ewabʌdad̶ebemada mʌ̃́a jʌwa jãmãtʌma ab̶a diad̶aped̶a domia siete juachad̶ida panʌa.

¹⁶Maʌ̃ siete domia juachaped̶ad̶acarea nurẽma cincuenta ewari baya. Maʌ̃ ewarid̶e bãrã néu naãrã ewaped̶ad̶ad̶ebemada mʌ̃́a wayacusa diad̶e zed̶ida panʌa.

¹⁷Nãwã od̶ida panʌa: bãrã diguid̶aʌba paʌ̃da umé enenida panʌa mʌ̃́a ʌ̃taa wa diabid̶i carea. Maʌ̃ paʌ̃ra eped̶eco jũgurua umé dji biara b̶ʌ harina ẽsãbari bara od̶a baida b̶ʌa.

¹⁸Maʌ̃ paʌ̃ diabʌdad̶e paca dji umaquĩrã zaqueda ab̶a, oveja dji umaquĩrãda umé, idjab̶a oveja dji umaquĩrã zaquerã poa ab̶a b̶eada siete diad̶ida panʌa. Maʌ̃ animarãra jũma bia b̶ead̶ida panʌa. Maʌ̃gʌra diad̶ia sacerdoteba mʌ̃́a jũma babue diamãrẽã. Maʌ̃gʌrã animarã babue diabʌrʌd̶e bãrã néud̶ebema harina od̶ara mʌ̃́a diabid̶ida panʌa, uva b̶a sid̶a wea diabid̶ida panʌa. Maʌ̃ babue diabʌrʌra mʌ̃a bia unuya.