Kolesaga Koneai Bidigo Pusali Po Elalubo Buku 7:2-16

²Da te bidi isaide te bidi dabe gela wabo beba me paibaso, te wiegi yai kolesaga ebao, tama te genuai nai da tubo beba pabo kolesaga ebo te aiyaba elalubao. Magi baso meni, da tigidali bidi isaibao. Tialima, da tǫde bidibo sogo yaibaso, dago tede bugagia homu kone paliąo.

³Te dago nai me delide haliga sęgę ebaso, te wiegi yai da, te gisugu wabo kolesaga aiyaba elalubao. Mu dao, te haliga sęgę ebaso, te dago gesabidi hulia sali, tiali goli te tama tebogo da tau sobaso, te tǫde kolesaga tigidali bugagia homu kone palumainu ebo dao.

⁴Te nago wiegi yai homu kolesaga elalubaso, teda nage te isali bidide diligi weyu bidibo bidi dabe dali bidabo homu yali. Tialima, te wiegi yai homu elalusiąbo bidi dabe, augwali te haniani dobo kolesagade pemene ebo bidi dabe dali bidabo homu ebo dao.

⁵Te wiegi yai homu kolesaga elalubo bidi dabego nage dali wado po weyu, te nage dodolobo po obaso da, teda te wiegi yai kolesaga ebao, tama te wiegi yai homu kolesaga elalusiąbo bidi dabego balia weyu, nageba mani genuai nogi te aiyaba elalueibao.

⁶Te wiegi yai homu kolesaga elalusiąbo bidi dabego gisugu obaso da, teda augwaligo gisugu wabo te page meni yai elalubao. Awe, te kolesaga te sesane yai bono te siade ulali te podila sabo tiwai yali, tiali goli agai te sene sospen posolo mu ilabo usu egobeo.

⁷Te wiegi yai homu kolesaga elalubo bidi bidali, tiali goli agai bomonama eyu, gasa bidigo mone sobaso da, teda aga te wabo pabo bidigo homu kolesaga tiwai elalubao. Me, te bidi mego te po tų odoyu, te bidi agai gasa bidigo nogode geme mone sabogo te kolesagago agai te wiegi yai homu kolesaga dolai dao.

⁸Te bidi mego sę me deli hodolobaso da, teda te wiegi yai kolesaga ebao. Tialima, agai te yali sę siminibaso da, teda te sę uganu ela holali dao. Te magi nai pedalubo bugagia tonalubo bidigo ebo kolesagago te hagoma homu ebo kolesaga aiyaba elalubo dao.

⁹Nago gasa bidi dali haliga sębę polo mu igio, magi baso meni, haliga sębę polo ebo te wiegi yai homu kolesaga elalusiąbo bidi dabego homu kolesaga dao.

¹⁰Nago te po wagio, “Magi baso polobadu sogogo te megi sogo aiyaba elalubawe?” Nago te tobage po obaso da, te nago wiegi yai homu kolesaga elalubeo.

¹¹Te tǫde bidibo tigidali we bidigo te wiegi yai homu kolesaga elalubaso, te usu yaibao. Te wiegi yai mu ebao, te wiegi yai nai dabe te aya isainu dabolo mabo tiwai ebo dao.

¹²Wiegi yai homu kolesaga te mone tiwai elalu, tama te dwai sogo pedalubaso, da tau saibao. Tialima, wiegi yai koneani homu kolesagago te mone aiyaba elaluali, te da umabo sogo mu tau siyu, te da bugagia bidibao.

¹³Te Godigo yali sę tigidalide bugagia homu kone palao. Te Godigo nai me deli nigali te gagea pai elalubaso da, teda dego mu ma dodolaibawe?

¹⁴Te nago bidibo ulade sę dabe te bugagia dolalubaso da, teda nage wiegi yai homu pemene yao. Te dwai sogo nageba pedalubaso da, teda nago te tama homu yao, Godigo te wiegi yai sogo dabolo tagala palu, te dwai sogo me dabolo asomainu tagala palaibao. Tibaso, magi sę nosali daba pedelabo, te dago konebe dao.

¹⁵Eno bidibo ula te olo nai tiwai elalubao, tialima ena te tǫde bidibo sogo eno te haniani kolesaga ebo suali. Eno suali, bidi mebago doloba pai kolesaga wali pali, tiali goli te bidi dabe augwali isalio. Te bidi mebago dwai kolesaga ebo eno suali, tiali goli augwali bobage sogo sesabi elama, bidibo dao.

¹⁶Tibaso, dago doloba pai kolesaga wali pabo bomo mu eyu, te wiegi yai homu kolesaga sabo sę igimio. Tiyu, dago dena digi dolobo dao.