Kap 17:6-14

⁶Piŋkop, gak da bɨsitno dakon kobogɨ namɨsal. Uŋun do aŋek gak do bɨsit asat. Mɨrak yopmaŋek bɨsitno nandaki.

⁷Nin do but dasi galak taŋ nimɨsal, uŋun dakon bamɨ nolɨŋek yo tagɨsi aŋnibi. Tapmɨm madepgokon da nin paŋpulugosol. Nin gak da kapmatjok egek uwalnin da dɨma nindani do pasɨlgamaŋ.

⁸Gaga dakon dabɨlgo kɨla asal uŋudeŋ kɨlano aki. Pup meŋi da pudɨgɨ pɨrɨgwan wutjɨsak uŋun da tɨlak nak wutjɨki.

⁹Yaŋ aŋaki kaŋdo uwalno da nak arɨpmɨ dɨma aŋupbal ani. Nɨkba kɨmokgeŋ do aŋdɨgat aŋ.

¹⁰Amɨn dɨwarɨ do nandaŋ yawotjok dɨ dɨmasi aŋ yomaŋ. Gen pap yaŋek iyɨ dakon man pawɨkwaŋ.

¹¹Nak abɨŋ nepdosi nandaŋ teban taŋ, do kandap tamono yolek aŋdɨgat ayɨŋ da ekwaŋ.

¹²Uŋun laion da kɨlap dap do aŋ uŋun da tɨlak, ae laion bulagɨ da pasɨlek yubɨŋ ekwaŋ uŋun da tɨlak.

¹³Yawe, gak abɨŋ uwalno gat emat wamaŋek pabɨŋ yopbi. Emat agak sɨbago abɨdaŋek uŋun gat emat wamaŋek yokwi pakpak da kɨsiron baŋ abɨdoki.

¹⁴Yawe, tapmɨm madepgokon da aŋpulugaŋaki uwalno da dɨma nɨkba kɨmokgeŋ. Uŋun mɨktɨm dakon yo baŋgɨn paŋmuwut do nandaŋ. Aŋpak yokwini dakon kobogɨ yo yokwisi aŋ yobi. Ae monjɨni gat ae babɨkni don altoni uŋun yo yokwisi aŋyobi.