Kaarantura 23:1-18

¹Balaamiva mini vaiharo Balaakirara tiharo, Are maini ofaa tainta 7navu autu terama, purumakau qora 7navuvata, sipisipi qora 7navuvata, varera maini aniane, tuvaro

²Balaakiva Balaamiva tunte ura. Vitanta purumakauvata sipisipivata vohaiqa vohaiqa vare, ekaa ofaa tainta vohaiqa vohaiqaqaa vateha iha quarora.

³Vitanta mintiake ofaa iha quaratovaro Balaamiva Balaakirara tiharo, Are maini ihavano ekaa ita kaaina ofaara tataaqa himpira vairaqe te vuruni vuare. Te mini vuariraro Noravano te unanaini qovaraiqianarove, kiae qovaraqianarove? Viva tiriara vonare tiraqe te vi uvara ai tiva amirerave, tivakero aiqinaqaa vura.

⁴Mini oruntovaro Kotiva Balaamiva vaunaini tuvuntero vikantiro vauvaro Balaamiva Kotirara tiharo, Te ofaa tainta 7navu autuke vate, purumakau qora vo vare, sipisipi qora vo vare, ekaa vi taintaraqaa vatema iha quara tauro, tiro.

⁵Minti tuvaro Noravano vi uvara iriro, Balaamira nai uva tiva amiro vira atitero tiharo, Are ururantera Balaakiva inaini otuntera vi uvara tiva amiane, tuvaro

⁶viva ururantero otu tavovaro Balaakiva qiata vaiinti Moapihainaaka hampata iha quara tovaro ekaa itavu ofaara tataaqa vaura.

⁷Vinavuka mini vauvaro Balaamiva Kotiva vira tiva amu uvara vika muntu tiva nimiro tiharo, Moapi avuhainaa vaiinti Balaakiva Siriaihairo kuari avu uri aiqinaihairo ti tivita kaimanta te maini anuro. Viva tiriara tiharo, Are anira nena variqanavu naarairamanta vinavuka Isareri qoraiqama nimitaate, tivo.

⁸Viva minti timanta te nantiakee minti tirarave? Kotiva kia vikara, Ne qoraiqama vuate tirara ti, nantiakee te Kotirara vika qoraiqama nimitaane tirarave? Te minti tiarorave. Noravano Kotiva kia vikaqaa qora uva vatairara ti, nantiakee te vi uvara tirarave?

⁹Te nora ori qiataqaa vaiha vi vatanaaka viavi tave vauro. Te vururaqaahai vika viavi aitutiha tave vauro. Te tavauramanta vi vatanaaka náiqai nuntuvi vo kanta variavo. Vika nariara tiha, Kia tenavu qumina vo vatanaa vo vatanaaka voqaara vauraukavauve ti variarave.

¹⁰Iekopira vaintivara nuqa voqaara airi variarara ti, kia tenavu ho vika kaara ntirarave. Ti qaqi kairaqe te Kotira vaiinti nahenti variqi vivi vuru qutintemake qutuare. Ti qaqi kairaqe te avuqavu ni varia vaiintika qutintemake, qutuare, tiro.

¹¹Balaakiva vi uvara iriro Balaamirara aqao tiro, Are nantivarae vi uvara tiaro? Are tiramanta ai variqanavu ti navutaaka qoraiqama nimitaate ti, te ai maini vite anurarama, are kia minti tiraitira, are vika koqema nimitena uvaraqai tiaro.

¹²Viva minti tuvaro Balaamiva vira tiva amiro tiharo, Te mpoma turo. Kia te ho vo uva tiraiti, Noravano Kotiva ti tiva timina uvara, viraqai ho tirarave, tiro.

¹³Balaamiva minti tuvaro Balaakiva virara tiharo, Aniqetanta vona vuare. Mini oru vaihara are kia Isareri ekaa tavaraitira, hininavuqai ho tavenarave. Ho mini vaihara vikara qora uva tiva tairamanta vika qoraiqama vuate, tiro.

¹⁴Balaakiva minti tivakero Balaamira vita varero Pisiga Aiqinaini Sofimi uqita kantave tunaini vuru kero, mini ofaa tainta 7navu autukero purumakau qora vo, sipisipi qora vo, varakero ekaa vohaiqa vohaiqa vi taintanavuraqaa vatero iha quarora.

¹⁵Ho Balaakiva mintuvaro Balaamiva virara tiharo, Are ihavano ekaa ita kaaina ofaara tataaqa vairaqe te vutuni oru Kotira vataake variare, tiro.

¹⁶Balaamiva minti tivakero vuvaro Noravano Kotiva viva unaini tuvuntero vikantiro vaiharo Balaamira uva tiva amiro tiharo, Are ururantera Balaakiva inaini otuntera vi uvara tiva amiane, tiro.

¹⁷Kotiva minti tuvaro Balaamiva ururantero otu tavovaro Balaakiva Moapihainaaka qiata vaiinti hampata iha quara tovaro ekaa itavu ofaara tataaqa vauvaro Balaamiva otuntovaro Balaakiva vira irero tiharo, Noravano Kotiva nana uvae ai tiva amivo? tiro.

¹⁸Tuvaro Balaamiva maa uvarama tiro: Sipora maaqu Balaakio, te maa uvara tiainara iriane.