Numperis 23:1-18

¹Iwe, Palam a üreni Palak, “Kopwe senätä fän itei fisu rongen asor ikei o uwato füman ätemwänin kow me füman ätemwänin sip.”

²Iwe, Palak a föri usun mine Palam a üreni. Iwe, Palak me Palam ra eäni asor eman ätemwänin kow me eman ätemwänin sip won eu me eu kewe rongen asor.

³Mürin, Palam a üreni Palak, “Kopwe ütä lükün om kei asoren kek, nge ngang üpwe feila ekis. Eli ewe Samol mi Lapalap epwe feito o churiei. Iwe, meinisin mine epwe pwäri ngeniei üpwe ürenuk.” Iwe, a feitä won eu chukuchukutä mi amasawa.

⁴Iwe, Kot a churi Palam, nge Palam a üreni, “Üa amolätä fisu rongen asor o eäni asor eman ätemwänin kow me eman ätemwänin sip won eu me eu.”

⁵Iwe, ewe Samol mi Lapalap a aiti ngeni Palam mine epwe apasa. Mürin a üreni, “Kopwe liwinla ren Palak, nge epwe ina chök alom ngeni.”

⁶Iei mine Palam a liwinla ren Palak o küna pwe a chüen ütä lükün an kewe asoren kek, nge ekewe souakomwen Moap meinisin ra nom ren.

⁷Mürin, Palam a popuetä an kapasen osuni o üra, “Palak ewe kingen Moap a emwenieito seni Aram, seni ewe chuk mi nom ötiu. A üreniei, ‘Kopwe feito o anümamaua ngeniei ekewe mwirimwirin Jakop, kopwe feito o eniwa ekewe chon Israel.’

⁸Ifa usun ai üpwe tongeni anümamaua chokewe Kot esap anümamaueer? Ifa usun ai üpwe tongeni eniwa chokewe ewe Samol mi Lapalap esap eniweer?

⁹Üa küna ekewe chon Israel seni me won ungen ekewe chukuachau mi tekia, üa nenengeniir seni won ekewe chukutekison. Üa küna eu mwichen aramas mi imwüla lon lenier, resap mochen ar repwe wewe ngeni ekewe mwü.

¹⁰Iö a tongeni aleani ekewe mwirimwirin Jakop mi usun pien fanü, nge iö a tongeni aleani eu lerüanün ewe mwichen chon Israel? Amwo üpwe määni mään ekewe chon pwüng. Amwo sopolan manauei epwe usun sopolan manauer.”

¹¹Mürin, Palak a üreni Palam, “Met ei ka föri ngeniei? Üa körukoto pwe kopwe anümamaua chokewe üa oputeer. Nge iei ka chök afeiöchüür.”

¹²Iwe, Palam a üra, “Ifa usun, üpwe tongeni apasa och me lükün mine ewe Samol mi Lapalap a aiti ngeniei?”

¹³Mürin, Palak a üreni Palam, “Kopwe etieila lon pwal eu leni ia ka tongeni küna ekewe aramas me ie. Pun kopwe chök küna eu kinikin seni ar we mwich, nge sap unuser. Iwe, kopwe anümamaueer ngeniei seni ikenan.”

¹⁴Iwe, a emwenala Palam ngeni ewe lemälen Sofim won ungen ewe chuk Piska. Ikenan a pwal senätä fisu rongen asor o eäni asor eman ätemwänin kow me eman ätemwänin sip won eu me eu kewe rongen asor.

¹⁵Nge Palam a üreni Palak, “Kopwe ütä ikei lükün om kei asoren kek, nge ngang üpwe churi ewe Samol mi Lapalap ikenan.”

¹⁶Iwe, ewe Samol mi Lapalap a churi Palam o aiti ngeni mine epwe apasa. Mürin a üreni, “Kopwe liwinla ren Palak, nge epwe ina chök alom ngeni.”

¹⁷Iwe, Palam a liwinla ren Palak o küna pwe a chüen ütä lükün an kewe asoren kek, nge ekewe souakomwen Moap ra nom ren. Iwe, Palak a aisini, “Met ewe Samol mi Lapalap a apasa?”

¹⁸Mürin, Palam a popuetä an kapasen osuni o üra, “Kopwe ütä, Palak, o rongorong. Kopwe aüselingaei, en nöün Sipor we mwän.