JUAN 8:3-12

³Orguin wdxiin maxter ley yra men men ne nak farisew, wdxinno men te wnaa ne wgano ste mgyeey, wzu men men gwrooltee lad yra men ne ndxin nga,

⁴lex re men lo Ne: ―Maxter, wga wnaaree lo noo or ne kano men ste mgyeey.

⁵Lo ley ne wdee Dëdyuzh lo Moises zëëd ne kon gye guet wnaa ne nak zeree. Laa de naa, ¿pe yna de?

⁶Re men neree lo Ne chen gan pe gue Ne, chen tsël gan pezee ykagyii men Ne. Orguin wzobndeslo Ne wzelo Ne rkaa Ne leter lyu kon xkwen Ne.

⁷Per kom rnabdiizre men lo Ne, lex wzobtebli ke Ne re Ne lo men yra men: ―Men ne neeydet ni te dol, men guin primer kyits gye led men.

⁸Lex wzobndeslo ke Ne ste kakaa ke Ne leter lyu.

⁹Ne won yra men guin ne wdxinno wnaa guin ne re Ne zenga, wka men nëz tegue tegue men sya, mengol nak ne primer wzelo wruu axtegue ne wra men sya; wyan Ne noze yrup Ne wnaa guin ne wzu men gwrooltee lad mén.

¹⁰Lex wzobtebli Ne ste. Kom wii Ne ne rutre yët, nonchee wnaa guin zu, re Ne lo men: ―Wnaae, ¿gozh yra mén ne wdxiid wdxidzu de nee? ¿Ni te men wyezhdet nkyits gye led de ye?

¹¹Wke wnaa guin, re men: ―Ni te men Decheye. Lex re Ne lo men: ―Ni noo bet ylaadet noo de. Orrenaa gugya, yedetre de dol.

¹²Lex wnii Jesus lo yra mén ste, re Ne: ―Noo nak bnii por mengyëzlyu; men ne chidnal noo, saadet men lo nkeb, sinke lo bnii ne rguu gyelembán saa men.