Juan 7:39-52

³⁹Jesu gerudu ene kwian ole ama kledu gerule Chube Oña giti, Chube be mo Oña kage toi diali kwian tale kwian bai kaire Jesu gai ulia, ene kwian Jesu gau ulia ta be chege suga no diali. Agwa Chube bebi mo Oña kage kwian alin, ngeru Jesu be age ulita ama agedale kare nga dba ai giti, ama be jogeni nga ngaña giti Chube kle ngwadi gire Chube be mo Oña kage kwian Jesu gau alin.

⁴⁰Kwian gweale kledu kwian ngleaske, ama Jesu keruchugu gerule no mo giti gire kwian e gerudu Jesu giti: —Kwian gdaite Chube gerua ketanga dabage no no be chie, ama e.

⁴¹Na gerudu: —Onbre e Cristo, Chube gerudu be Cristo kage che alin, ama e. Na gerudu: —Me dale, ama me Cristo, Cristo mi chie nga Galileage.

⁴²Chube gerua degaba unsuialin gerule Cristo giti Cristo be chie chugagwalla rey David oña oindallaske una Belénge David toidu ngwadi unsuialin.

⁴³Kwian ulita me gerudu salengwli Jesu giti, gire ama mo tku dole modi Jesu giti.

⁴⁴Kwian gweale tadu Jesu gakalin dbale skadi, agwa ni kwian gdaite Jesu gau dbale skadi.

⁴⁵Guardia donga ulita kagle Jesu gadale chkuni kole kwian fariseo ulita kaire kwian gerunga Chube ole daba alin chugagwalla ulita kle manade ngwadi, gire kwian e ulita geru kadu guardia donga ulitage: —¿Mineade ba ulita me Jesu gau ba me chiu ama dbe aini?

⁴⁶Guardia donga ulita jaindunga: —Cha me gwageba kwian gdaitedi gerule ta ngle ole onbre e kle gerule kare.

⁴⁷Kwian fariseo gerudu guardia donga ulitage: —¿Ba ulita kaire mo chugu ngwadi mo anblitange amage ama gai ulia?

⁴⁸¿Suge ba ulitage che chugagwalla israelita ulita, kaire cha ulita kwian fariseo Moisés chadalla uñanga ulia, gweale kle ama gai ulia? ¿Mineade ba kle mo chuge ngwadi mo anblitange amage kwian ngle ulita kare?

⁴⁹Kwian me geru jwanba Moisés chadalla giti sidri ama ulita kle chage mo anblitange amage ama gai ulia, kwian e ulita kle age me no me no Moisés chadalla dollale, kwian ene alin Chube be ji gbe.

⁵⁰Kwian fariseo chugagwalla gdaite kada Nicodemo nu jogeba chui gbaitege geru trage Jesu ole, Nicodemo e amaña daba fariseo keruchugu gerule guardia dongage me no Jesu giti gire Nicodemo gerudu daba fariseo ulita ole:

⁵¹—Moisés chadalla kle degaba che ulita alin gerule che me ñage kwian gai blike gbe jiske agedu gweale giti, ngeru che kwian chugadale ngwadi gerule mo giti ama agedu giti, che kwian keruchuge gerule mo giti ulita ene suge trate chege ama jiske ulia o me, ama jiske ulia gire che ñage ama gbe ji chuge.

⁵²Nicodemo gerudu ene daba fariseo ole gire ama ulita gerudu Nicodemoge: —¿Ba ta mo gbakalin kwian nga Galileamu, ba ta gerukalin no ama giti, kaire ba ama gakalin ulia? Ma no ba Chube gerua degaba unsuialin batenga, ba geru e jwen nabitaite, ene be chke uñale bage trate ulia kwian Chube gerua ketanga dabage ni gdaite ñage chie nga Galileage.