John 7:39-52

³⁹Jesus el fahk ma se inge ke Ngun su God El ac fah sang nu selos su lulalfongi. Ke pacl sac, Ngun soenna itukyang nu sin kutena mwet, mweyen Jesus el soenna utukyak nu in wolana lal.

⁴⁰Kutu sin mwet inmasrlon un mwet uh lohng ke el fahk ma se inge, ac elos fahk, “Pwayena lah mwet se inge el Mwet Palu sac!”

⁴¹Ac kutu fahk, “El pa Christ!” A kutu pac fahk, “Christ el ac tia tuku Galilee me!

⁴²Ma Simusla fahk mu Christ el ac sie sin fita natul Tokosra David, ac el ac fah isusla in Bethlehem, siti srisrik yen David el tuh muta we.”

⁴³Ouinge srisrielik inmasrlon un mwet uh ke sripen Jesus.

⁴⁴Kutu selos kena sruokilya, tusruktu wangin sie mwet filiya pao facl.

⁴⁵Ke mwet soan elos folokla, mwet tol fulat ac mwet Pharisee siyuk selos, “Efu kowos ku tia usalu?”

⁴⁶Mwet soan elos topuk, “Soenna oasr mwet sramsram oana mwet sac!”

⁴⁷Mwet Pharisee siyuk selos, “Ya kowos wi pac kiapweyukla?

⁴⁸Ya kowos na lohng mu oasr sie mwet fulat ku sie mwet Pharisee lulafongel?

⁴⁹Un mwet inge tia etu ke Ma Sap lal Moses, ke ma inge elos oasr ye selnga lun God!”

⁵⁰Sie sin mwet Pharisee su muta we pa Nicodemus, mwet se ma tuh som nu yorol Jesus meet. El fahk nu sin mwet ah,

⁵¹“Fal nu ke Ma Sap lasr uh, kut tia ku in nununku sie mwet meet liki kut lohng pusracl sifacna, ac konauk lah mea el oru.”

⁵²Na elos fahk, “Mea, kom sie pac mwet Galilee? Riti Ma Simusla ac kom ac etu lah wangin mwet palu ku in sikyak Galilee me.”