Juan 2:11-23

¹¹Pues jax era e bꞌajxan milagro lo que chena umen e Jesús, y conda uche tunor era cay checsuna que jaxir ayan utawarer y tamar era uyajcanuarobꞌ cay cꞌupseyanobꞌ tamar jaxir. Pues tunor era numuy tama e chinam Caná tama e departamento Galilea.

¹²Entonces conda cꞌapa e nujbꞌiar ixin e Jesús esto tama e chinam Capernaum taca utuꞌ y uwijtzꞌinobꞌ y taca uyajcanuarobꞌ. Y yajaꞌ quetpobꞌ cora día.

¹³Pues entonces cocha war acꞌotoy e día tuaꞌ acay e nojqꞌuin tuaꞌ e gente tama e Israel xeꞌ ucꞌabꞌa pascua, ixin e Jesús esto tama e chinam Jerusalem.

¹⁴Y conda cꞌotoy tama e templo cay uwira que war achojna e sian wacax y e sian oveja y e sacsac mut. Y uwira que ayan tin e turobꞌ tor e mesa xeꞌ war uwechꞌiobꞌ ut e tumin.

¹⁵Y conda e Jesús uwira tunor era, uchꞌami inteꞌ jarbꞌir qꞌuewer y cay uwatzꞌi uyajnes tunor e ajchonmar taca tunor e wacax y e oveja. Y cay upusi e tumin tuaꞌ tin e war uwechꞌiobꞌ ut e tumin y ucucru ixin e sian mesa tuobꞌ.

¹⁶Y uyare tunor tin e war uchoni e sacsac mut y che: —Locsenic tara tunor. Ira iche más e chonmar tama uyotot Nitata, che e Jesús.

¹⁷Y tamar era cꞌajpesna umen uyajcanuarobꞌ que chꞌar tzꞌijbꞌabꞌir tama uyojroner e Dios y che: —War uchien innumse nibꞌa umen que war intzꞌunle uyotot Nitata Dios, xeꞌ che chꞌar tzꞌijbꞌabꞌir tama uyojroner e Dios.

¹⁸Entonces cora winicobꞌ tuaꞌ Israel cay uyubꞌiobꞌ tuaꞌ e Jesús y chenobꞌ: —¿Y tucꞌa tuaꞌ awirsion tuaꞌ achectes ticoit que net ayan acꞌotorer tuaꞌ ache tunor era? che e winicobꞌ era.

¹⁹Y che e Jesús: —Tijresic e templo era y nen tuaꞌ anchi otronyajr tama uxteꞌ día, che e Jesús.

²⁰Y che e winicobꞌ: —Cuarenta y seis año uqꞌuechion tuaꞌ cachi e templo era ¿y net ca tuaꞌ abꞌijnu aꞌchi tama uxteꞌ día? che e winicobꞌ era.

²¹Pero e templo xeꞌ war oꞌjron e Jesús tamar, majax e nuxi otot lo que ayan tara sino que jax ucuerpo jaxir.

²²Y tamar era conda sutpa bꞌixcꞌa e Jesús tujam e chamenobꞌ cꞌajpa umen uyajcanuarobꞌ tunor lo que cay arobꞌnobꞌ umener, y tamar era cꞌupseyanobꞌ tamar lo que chꞌar tzꞌijbꞌabꞌir tama uyojroner e Dios y tama tunor lo que arobꞌnobꞌ umen e Jesús.

²³Pues tama e tiempo era conda turu e Jesús tama e chinam Jerusalem tama e nojqꞌuin pascua, meyra gente cay cꞌupseyanobꞌ tamar conda uwirobꞌ que war uche e sian milagro.