Yoane 2:11-23

¹¹Yesu nuwi ire awa tongoro nuwi wain fungua tarom ori yoporam boingua i Yesu Keina iki birom ori i Gariri ikinom akainom ikai tei dungua moiro koma bengua iran yaromi keranom bau boingua mapunom i mari dongoro te no gama yokamai fi ki si topune.

¹²Ena yai opai ingua kopuna muruwo mora nopunga Yesu te mam te emerom yokama te no gama yokamai ma dere fu iki birom ori Kapanem fure aro kakom suwo koropane tei moipunie.

¹³Ena Yura ari “Komari Yai Gumam no awanoma yokamai ei goikengua kakom firapune,” diro kopuna ori nowainga kakom girako towaro bengoro ena Yesu te no yokamai u Yerusarem iwa fure

¹⁴Yai Gumam fi mun ei teinga ikom ikai fure kanupunga ari non burumakau te non sipsip te kapuka kunuma eire kongo gure ne moingoro te ama kanupunga ari kongo mukom wapun ereinga koro ire mukom koro nen ereinga yokamai ama ame de moimie.

¹⁵Ena yaromi kan iro ako kumai siro ari ikai moinga durange eiro te non burumakau te sipsip muruwo ama ikai moinga durange eiro ewi mena dero ena furo ari kongo mukom wapun ereinga yokamai boinom gura boire ako sungoro ena ari ama ewi mena dero

¹⁶te furo ari kapuka meina beinga yokama “Iki i maket ikom dikeme. Ne yokama tai i iro mena fiyo! Ne yokama na aunam ikom tei moiro tai meina beinga i faikeme,” di erome.

¹⁷Epe bengua iran no yaromi gama yokamai di firo ka mapunom munom epe boingua inokore ei fipunie: “Ne ikinum fi teikai na denam minamdi ikai fai si di narowamie,” epe boime.

¹⁸Ena Yesu epe bengoro Yura ari ori yokamai kanero “Ne tora tai ta ta ori benanga no yokamai mora firapunga ‘Yai Gumam yoporam boingua erongoro ena ne ari ewi mena dowanga i faname,’ firapune?” diro mina wako teingoro

¹⁹“Ne yokamai fi mun ei teinga ikomdai ako gui duwaingere na aro suraiye kakom kei gounaiye,” diro ka mokom bai erongoro

²⁰ena “No Yura ari yokamai bei moiro fi mun ei teinga ikom i kei moipungai ena non iki 46 i dopunga dumia ena ne aro suraiye kakom tokoi kenano? Oro?” epe di teime.

²¹Ari epe dimba yaromi nenen gam dinom Yai Gumam fi mun ei teinga ikom dunguamere epe dungua i di firo ka epe dume.

²²Ena okome Yesu mora goiro ariro fu dongoro kakom tei no Yesu gama yokamai Yesu kam epena dungua inokore ei firo ena kam mapunom te Yesu ka dungua i fi ki si daipunie.

²³Ena Yura ari firainga kopuna ori si gai neinga kakom i Yesu Yerusarem tei moingoro te ari yai opai munmane yaromi ari ganom nouro dinga tarom bengua kanero fi ki si teimba