Juan 20:2-22

²Ekꞌuchiriꞌ, kakꞌalalik xeꞌek pa e kꞌo wi ri Simón Pedro y ri jun chik tijoꞌn lik kꞌax kanaꞌ ruma ri Jesús, y xubꞌiꞌij kꞌu chike: —Ri Qajawal xesax bꞌi pa muqutal wi y na qetaꞌam taj pa xyaꞌiꞌ wi —xchaꞌ.

³Xebꞌel kꞌu bꞌi ri Pedro y ri jun chik tijoꞌn, y xebꞌek pa xmuqiꞌ wi ri Jesús.

⁴Kikabꞌichal kekꞌalalik xebꞌek; pero ri jun chik tijoꞌn más xkꞌalal chwa ri Pedro y nabꞌe xoponik.

⁵Xyuxiꞌ pan chupa ri muqubꞌal y xew xril ri jutaq rabꞌaꞌj kꞌul pa xbꞌolqꞌotix wi ri Jesús, pero na xok tubꞌi.

⁶Tekꞌuchiriꞌ xopon ri Simón Pedro, ri teran lo chirij. Ekꞌu rire asu xok chupa ri muqubꞌal y xril ri jutaq rabꞌaꞌj kꞌul kꞌo kan chiriꞌ.

⁷Yey ri kꞌul pa xpis wi rujolom ri Jesús, na junam ta kꞌo rukꞌ ri jutaq rabꞌaꞌj kꞌul; ma utukel kꞌolik, bꞌusum kanoq.

⁸Ekꞌuchiriꞌ, xok bꞌi ri jun chik tijoꞌn ri xopon nabꞌe chwach ri muqubꞌal. Xew xril kꞌu riꞌ waꞌ, xukojo kꞌastajinaq chubꞌi ri Jesús chikixoꞌl ri ekaminaq.

⁹Ma ri petinaq loq rike kꞌamajaꞌ ne kimajom usukꞌ Ruchꞌaꞌtem ri Dios pa kubꞌiꞌij wi: Ri Jesús lik chirajawaxik kakꞌastaj bꞌi chikixoꞌl ri ekaminaq.

¹⁰Y xetzelej kꞌu ri kebꞌ tijoꞌn pa e kꞌo wi ri kachbꞌiꞌil.

¹¹Pero ri María koqꞌik takꞌal kan chunaqaj ri muqubꞌal. Ekꞌu laꞌ koqꞌik, xyuxiꞌ apanoq y xtzuꞌn pan chupa ri muqubꞌal.

¹²Xeril kꞌu pan kebꞌ ángeles saq kiqꞌuꞌ etzꞌul jun chujolom y jun chi raqan che ri luwar pa xyaꞌiꞌ wi rucuerpo ri Jesús.

¹³Ekꞌu ri ángeles xkitzꞌonoj che ri María: —Ixoq, ¿suꞌchak katoqꞌik? —xechaꞌ. Ri María xukꞌul uwach: —Ma xkꞌam bꞌi ri Wajawal y na wetaꞌam taj pa xyaꞌiꞌ wi —xchaꞌ.

¹⁴Tekꞌuchiriꞌ, xtzuꞌn chirij. Kꞌate xrilo takꞌal ri Jesús chiriꞌ, pero rire na xretaꞌmaj taj we e ri Jesús.

¹⁵Ekꞌu ri Jesús xutzꞌonoj che ri María: —Ixoq, ¿suꞌchak katoqꞌik? ¿China ri katzukuj? —xchaꞌ. Ri María xuchꞌobꞌo wa jun achi laj e chajinel re ri werta, y jewaꞌ kꞌu xubꞌiꞌij che: —Achi, we lal xkꞌamaw bꞌi la re, bꞌiꞌij la chwe pa xeꞌyaꞌa wi la chaꞌ kiꞌnkꞌamaꞌ —xchaꞌ.

¹⁶Ekꞌu ri Jesús xubꞌiꞌij che: —¡María! —xchaꞌ. Ri María xutzuꞌ uwach y jewaꞌ xubꞌiꞌij che: —¡Raboni! (Wa chꞌaꞌtem pa hebreo keꞌelawi: “Lal tijonel”.)

¹⁷Ri Jesús xubꞌiꞌij che: —Chinatzoqopij, ma kꞌamajaꞌ kinaqꞌan rukꞌ ri Nuqaw. Jat y chabꞌiꞌij chike konoje ri nu hermanos: Riꞌin kinaqꞌan pa kꞌo wi ri Nuqaw yey Iqaw riꞌix; ri nu Dios riꞌin yey i Dios riꞌix —xchaꞌ.

¹⁸Xeꞌek kꞌu ri María ri aj Magdala kukꞌ rutijoꞌn ri Jesús y xuꞌtzijoj chike xril uwach ri Qanimajawal. Yey xutzijoj chike janipa ri xbꞌiꞌx bꞌi che ruma ri Jesús.

¹⁹Che kꞌu ri rokbꞌal raqꞌabꞌ che ri nabꞌe qꞌij re ri semana, rutijoꞌn ri Jesús kimolom kibꞌ, kitzꞌapim kichiꞌ ruma kixiꞌim kibꞌ chikiwach ri e aj wach ke raj judiꞌabꞌ. Ekꞌuchiriꞌ, ri Jesús xaqikꞌateꞌt xwinaqirik y xtakꞌiꞌ chikixoꞌl rutijoꞌn. Xuya kꞌu rutzil kiwach, jewaꞌ xubꞌiꞌij chike: —Kꞌola utzil chomal iwukꞌ —xchaꞌ.

²⁰Tekꞌuchiriꞌ, xukꞌut ruqꞌabꞌ y rukꞌalkꞌaꞌx chikiwach. Ekꞌu rike lik xekiꞌkotik echiriꞌ xkil uwach ri Qanimajawal.

²¹Ekꞌu ri Jesús xubꞌiꞌij tanchi chike: —Kꞌola utzil chomal iwukꞌ. Jelaꞌ pachaꞌ ri Nuqaw xinutaq lo riꞌin, jekꞌuriꞌlaꞌ riꞌin kixintaq bꞌi riꞌix —xchaꞌ.

²²Ekꞌuchiriꞌ, xuxutꞌuj kiwiꞌ y xubꞌiꞌij chike: —Chikꞌulu ri Santowilaj Ruxlabꞌixel ri Dios.