João 20:2-22

²Aituo tâgase kehoem xinaram idâly. Toenzepa urâ Jesus inwyneguyly, Pedro warâ xina eydâ atoam idâly. Mâkâ xinaram aguely: — Kywymâry Jesus eguepybyrymy etadâdobyrydâba netymo. Âdyam nhetomobyry tutuzeba-ro warâ — kely.

³Aituo Pedro, urâ warâ âguedy etadâdobyryam xina idâly.

⁴Xina egatudyly. Pedro takaze olâ akâwâm iegaky awylygue waunroenlâ yaindyly.

⁵Ioday kâentoem kâzewyly; panu linhugueto kâendyly, iegawâmpyra olâ akâwâm urâ.

⁶Yaimpygueduo akâwâm Pedro saindyly, egawândyly alelâ. Târâpa Jesus eguepybyry. Panu âguedy ituwyn-hobyry lelâ nhekyly.

⁷Panu apiduby Jesus nhangahu wogonropyry lelâ warâ nhekyly. Mârâ Jesus ituwyn-hobyry modo duaypa nhangawyn-hobyry, âikâlâ.

⁸Urâ, waunroem saintyby, tâtagueim odaji iegawândyly lâpylâ, âguedy etadâdobyryam. Âguedy târâpa awyly kâentuo, kâinwândyly Jesus kurâem itondobyry.

⁹Iwenibyem Deus itaumbyry awo wâgâ, Messias igueypyem kurâem itonze, kely. Tâenselâ, tydaselâ warâ lelâlâ wâne xina. Arâlâ olâ xina awârâ nutuba lelâ awyly.

¹⁰Koendâ kehoem enuagaenibyryem, tâtyam xina odopâdyly.

¹¹Âguedy etadâdobyry kuoholâ myakâwâm Maria Magdala donro ohogüendyly. Tuogunru umelâ, âzewyly, IU idyly.

¹²Azagâ anju nhedyly, âtâ tapekeingue âzetydâdybyem, Jesus eguepybyry etadâdobyrydâ ekadybymoem; târâpa itybyem olâ Jesus eguepybyry. Tokalâ ekadybyem awyly nhangahu ejidypyrydâ, eagonro ekadybyem awyly ihuru ejidypyrydâ warâ.

¹³Anju domodo pekodo nhapâiguelymo: — Âdaituoka ogunru? — kelymo. Aituo pekodo in-hoguly: — Ywymâry eguepybyry nadâmomy. Âdyam nhetomobyry kâuntuba olâ urâ-ro warâ — kely.

¹⁴Awârâ agueypyem, MYRYK idyly. XYDYK warâ uguondo nhedyly. Jesuslâ myakâwâm; nutuba olâ mâkâem awyly.

¹⁵Aituo Jesus aguely: — Âdaituoka ogunru? Ânguyka mâwinly? — kely. Mârâ âji enilâ-ro waunlo ara mâkâ enanaji. Awylygue in-hoguly: — Âmâlâ eguepybyry tarâpa etyin-ro watay, âdyam mânhetobyry yam aguekâ. Urâ ise eagonro âjiam sanehoim — kely pekodo.

¹⁶— Maria! — kely Jesus eyam. Tâzedy wâgâ tygâseduo, Jesus lelâlâ awyly nhutuly, aguely: — Rabôni! — kely. (Hebraiku-em, “Ywymâry” keze awârâ aguely.)

¹⁷Jesus aguely: — Yawâdâ. Pabairam kodopâdaymba lelâ urâ. Ynynonro modoram idâ, akaemo konodo ara kehoem kâinwyneguyly modoram. Warâ eyanmo aguekâ: “ ‘Pabairam ise kodopâdyly, mâkâ Pabai myguehomo, âDeusrymo warâam’ keanry Jesus” kera eyanmo — kely.

¹⁸Aituo Maria Magdala donro xina eydâ atoram idâly; xinaram aguely: — Kywymâry Jesus kurâem itondybyem setai — kely. Tyam Jesus aguehobyry xinaram nhegatuly.

¹⁹Mârâ domingo, kopaelâ, âjigue âtâdyguybyem xina Jesus eynynonro modo. Pymâdo tawânehonly tytaze akâwâm xina. Awylygue pyanta modo koendâ kehoem enahunwâdybyem awyly. Pyanta enahuymby ozelâ Jesus egawândyly; âepanâguely xina ontay kehoem. Xinaram aguely: — Tâseguâdâzeba itaungâ, tyanepa warâ — kely.

²⁰Ilâpyryem xinaram tâmary kruz onwa takâjihobyry nhenehonly; sodadu lançague tuhoguyhobyry nhenehonly warâ. Emarydâ, eledydâ warâ xyâhobyry tientuo, tutuze akâwâm xina, Jesus lelâlâ mâkâ awyly. Awylygue toenzepa akâwâm xina ohomaendyly.

²¹Aituo Jesus agueondyly: — Tâseguâdâzeba itaungâ, tyanepa warâ. Pabai ugonotobyry ara lâpylâ ogonodylymo, unâry mâengatuhomoem — kely.

²²Ilâpyryem xina onwa ÂBU kely, aguely: — Tâwâlâ Deus Ispiritury âyanmo nâedâ.