Juan 12:25-37

²⁵Daje izói dáamɨe ie cáaillɨnona dama íeɨena rairuíadɨ, áfena féitaite, mei íadɨ dáamɨe ie cáaillɨnona bie énɨemo jámairuiadɨ, áfena zíiñona cáaillɨnomo éenoite.

²⁶Dáamɨe cuemo jaɨnáiacadɨmɨe cuedo jáirede. Cue illɨ́nomo dáanomo cuena jaɨnáidɨmɨe iite. Dáamɨe cuemo jaɨnáia, cue Moo afémɨemo ñúefuena nítaite, —daɨde.

²⁷Jesús naɨ úrillano daɨde: Birui cue comecɨ ɨere llícɨtaide. ¿Nɨe izói cue daɨíri? ¿Nɨbaɨ bie izói dáɨitɨcue: “Moo birui cuemo zuídɨfuemona cue jíllota”? Mei íadɨ cue afe jira bitɨcue.

²⁸Moo, o mámecɨmo ebírenafuena jóoneri, —daɨde. Iemona monámona daa uai cácacaide. Daɨde: —Afena jae ebire íficaitadɨcue. Iemo meine dáanomo ebire íficaitaitɨcue, —daɨde.

²⁹Afénomo ite comɨnɨ áfena cacáillano daɨdíaɨoɨ: —Mona gɨ́rɨa, —daɨdíaɨoɨ. Iemo jɨáɨmacɨ: —Juzíñamui abɨ ímɨe íemo úrite, —daɨdíaɨoɨ.

³⁰Mei jira Jesús daɨde: —Afe uai cuemo cácacaiñede. Omoɨmo cácacaide.

³¹Ja biruimo bie énɨe comɨnɨ jenoda facátalliaɨoɨ. Jabe bie énɨe ocuídɨmɨe jino dotácana iite.

³²Enɨe acónimo tɨtállena cue íaɨoɨ raiñolle llezica, nana dama cuemo cue atɨlle, —daɨde.

³³Afe dáɨnamona, ie tɨ́illa izói onótate.

³⁴Jira comɨnɨ uai otíaɨoɨ: —Caɨ ocuilla uai cuegánicodo caɨmo llófuega: “Cristo zíiñona iite.” ¿Nɨe izói daɨdɨo: Nanoide Ɨima Jitó tɨtállena caifo raiñóbicaite? ¿Bu mei bie Nanoide Ɨima Jitona? —daɨdíaɨoɨ.

³⁵Jira Jesús daɨde: —Naɨ omoɨ cɨ́gɨri egáiñotɨmɨena izói nano íanori itɨcue. Bie cue egáiñuana ómoɨmo illa dɨno, mai cue llua izói omoɨ macari, jítɨredɨno raɨre omoɨ éidafiñeillena. Jítɨnodo macádɨmɨe ie jáillana onóñede.

³⁶Uzefomo ɨɨno, naɨ ómoɨmo illa dɨno, egáiñogamacɨna daɨí omoɨ jáillena, —daɨde. Afefue daɨna méifodo, Jesús afémacɨmona retáirizaide.

³⁷Jesús íaɨoɨmo eróicana dɨga cɨ́ofɨninafuiaɨna fɨnode. Mei íadɨ íena ɨ́ɨnoñediaɨoɨ.