Yowane 12:25-37

²⁵Na kaiteya yona mauli tanoubu ta unai ye gadosisiyei, kabo ye kabisapuli. Na kaiteya yona mauli tanoubu ta unai nige ye gadosisiyei, kabo mauli nige kana siga ye hai.

²⁶Ena tamowai hesau ye henuwa bena yogu ye paisowa, meta bena ye hemuliwatanigau. Yau haedi ya miya meta yogu heyayai tauhaina hinage kabo temenai. Na yogu heyayai tauhaina ne meta kabo Tamagu iya ye hekasisiyei.

²⁷Mahana ta unai yau meta nuwagu ta unai ya hekohekoidada, na kabo saha ya hedede? Taba gonowana ya kaibwada Tamagu unai ya wane, ‘Mahana ta unai ku gilihaigau’? Taba nige. Ya dobima ta meta bena kamkamna matagu ne unai ya hekalo.”

²⁸Na kabo ye wane, “Tamagu, hesam ku hesaekaliliyei.” Kabo kalina hesau galewa ne unai ye dobima ye wane, “Yau hesagu ya hesaeyako na kabo ya hesaeꞌuyoi.”

²⁹Na bodalakilaki temenai se totolo wa kalina ta se lapui ede yodi nuwatu bena tulutululu. Na hekadi se wane, “Nuwana anelu hesau ye hedehededelau Yesu unai.”

³⁰Na Yesu ye hededebui ye wane, “Tenem kalina ne meta komiu hesabamiu, yau nige.

³¹Na teina mahana ta unai Yaubada kabo tanoubu ta ye hekasa, yo tanoubu ta yodi wasawasa yona gigibwali kabo ye hetatagwaligwali.

³²Na huyana tano unai yau se lausinigau, kabo tamowai maudoidi ya yogagogoidi se laoma kaliguwai.”

³³Yesu ye hedede doha teina meta bena yona boita kana kao ye hededehemasalaha.

³⁴Ede boda wa se henamaiyei se wane, “Kai laugagayo unai ka lapui meta Keliso kabo ye miya ye lau ee huya nige kana siga. Na idohagi to ku wane, ‘Tau Natuna kabo se lausini’? Na teina Tau Natuna ta meta kaiteya?”

³⁵Na kabo Yesu ye hededelau udiyedi ye wane, “Mala ta kabo maidamiu kwa miya huyakubwakubwa mo. Na mala maidamiu ta unai ne bena kwa laulau, na tabu masigili ye taukasinigomiu. Na kaiteya masigili unai ye laulau meta nige kabina ye kata haedi ye laulau.

³⁶Na mala maidamiu ta unai ne bena kwa sunumaei, ede kabo kwa hemala mala natunao.” Teina hedehedede ta mulinawai ye laugabaedi na ye lau ye kenowadamyedi.

³⁷Yesu kabikabi gigigigibwalidi gwaudi ye ginaulidi Dius tamowaidiyao matadiwai, na iyamo nige se kawamamohoiyei.