Yon 12:25-37

²⁵“Kukin kal sivinan mwamovan, mo biyamkwen mwamovan tonen; tage bipiyev mwamovan ven watinow, mo biban mwamovan tonen bises bisigeg.

²⁶“Kukin kal yak sivinam bukumlavag gunavamul, kadiloka bukwabkunig; mo soug yak bitases. Tamag bo bikalin nuwan ya̱koum, gunavamul ya̱koum.

²⁷“Tut towen bo igeg nanoug. Tabta banitoug, balana, ‘Tamag, kwatinabweig; awoum tut towen bakanig.’ Adok nag, peinan wotet towen silma̱nin bo nam.

²⁸Tamag, kuvag va̱gan gamag babaw bikavasims, peinan yak Tatawtoun yak.” Walba̱lab aygan mo ikatilutegs, ilana, “Bo avag; igaw mo bavgavaw, yagag yakawanan peinan.”

²⁹Gamag mwasanin nitomos idokes kid pala̱pal. Mwasanin gog ilansa, “Gum-liba̱lab nidibek Yeisuw, anelos adok.”

³⁰Yeisuw ikatimop asilivan, ilana, “Aygan towen nag peinag yey; tage aygan towen pinamiy yakamiy.

³¹Tut towen Tamag bo bimop sinap kalbaleb wadaban pwepway. Tanugwagan ven watinow towen Seitan, Tamag bo bikayeb.

³²Igaw bitamnaweigs wakaligweg mo babiteilis gamag babaw bimeis waseg yey.”

³³Yeisuw anilivan towen va̱gan bikatimlakes ama̱wan bikanig.

³⁴Gamag babaw ikatimapus aygan, ilansa, “Kakakin Bukitab ilivnek Mesay bo bises bisigeg; aveiyag wawun amlivan ‘Kadiloka bitamnaweigs wakaligweg, gimgilitoun yey’? Gimgilitoun yak muwotet ama̱wan?”

³⁵Iw to Yeisuw, ilana, “Tut nag biveiyov kamnat bises wasigeis yakamiy. Tut towen kadiloka bukunounas; igaw bidadub, ta-ma̱wan bukukwakins ked.

³⁶Igaw nases, mikamnat bo ivanoum; kadiloka kusimounids waseg, va̱gan bukumlavags gamag kamnat yakamiy.” Yeisuw ilivan ikous, mo inoun in, itoupan va̱gan nag biba̱nes.

³⁷Tasiyas nikines Yeisuw nawotet singay tawtoun; tage nag isimounids mtowen Mesay; to nikamat palopit Isaya anilivan, kweiboug nilivnek mamagina: “E, Guyaw, kal bisimounid youd to nakalivan? Kalisiy bo ikines Yowbad natawtoun?”