Josue 15:3-13

³pehendiyà te egkezivavà te Beyeey te Akrabim taman te sibsivayan he Zin, pehendiyà heini te egkezivavà te Kadesh Barnea, ebpekevayà heini te Hezron petekezeg diyà te Adar, ne mibulegkù pehendiyà te Karka,

⁴ne nekevayà diyà te Azmon, he nekeikul te zal-ug he dulunà te Ehipto taman te Zaǥat he Mediteraneo. Iyan heini dulunà te Juda ziyà te zivavà.

⁵Is dulunà diyà te edsilaan ne iyan is Daǥat he Minatey taman te idsimbuwang te Wahig he Jordan. Is dulunà diyà te zizaya ebpuun daan diyà te idsimbuwang te Wahig he Jordan

⁶petekezeg diyà te Bet Holga, pehendiyà te egkezizayà te Bet Araba, petekezeg taman te Batu ni Bohan te anak ni Reuben.

⁷Ne puun dutun, mibpehendiyà heini te Suǥud te Acor taman te Debir, ne mibulegkù diyà te zizaya pehendiyà te Gilgal he zehipag te Beyeey te Adumim he zivavà he vahin te zal-ug. Pelaus diyà te menge serebseb diyà te En Shemesh, taman te En Rogel.

⁸Puun dutun mibpehendiyà heini te Suǥud-suǥud te Ben Hinom he ebpekevayà diyà te menge kelendiǥan diyà te zivavà taman te inged te menge Jebusihanen. (Heini he inged iyan is Jerusalem.) Ne mibpetekezeg heini pehendiyà te puntur te vuntud he zapit te edsenlepan he Suǥud-suǥud te Ben Hinom, diyà te purù te egkezizaya te Suǥud he Refaim.

⁹Ne puun dutun midlaus heini ziyà te Serebseb te Neftoa, ne ebpuun dutun ebpehendiyà te menge inged he uvey te Buntud he Efron. Ne mibulegkù heini petupang diyà te Baala he iyan is Kiriat Jearim,

¹⁰ne mid-uman mebulegkù diyà dapit te edsenlepan te Baala pehendiyà te Buntud he Seir. Ne midlaus heini ziyà te egkezizayà he kelendiǥan te Buntud he Jearim he iyan is Kesalon, pehendiyà te Bet Shemesh wey midlaus diyà te Timnah.

¹¹Midlaus heini ziyà te egkezizaya he kelendiǥan te Ekron ne mibulegkù pehendiyà te Shikeron, he ebpekevayà te Buntud he Baala taman te Jabneel. Ne midsangkù heini ziyà te Zaǥat he Mediteraneo,

¹²he iyan daan dulunà kayi he zapit te edsenlepan. Iyan heini nekeliǥuy he zulunà te tanà he mibahin diyà te menge pemilya te tribu ni Juda.

¹³Midtuman ni Josue is insuǥù kandin te Nengazen, umbe imbeǥey zin is senge vahin duen te tanà te tribu ni Juda ziyà te ki Caleb he anak ni Jefune. Heini he tanà iyan is Kiriat Arba, he iyan is Hebron. (Su ngazan heini ni Arba te amey ni Anak.)