Josua 1:9-18

⁹Ifa usun, üsap allük ngonuk pwe kopwe apöchökülok o tipepwora? Kosap niuokus, kosap pwal rükö, pun ngang ewe Samol mi Lapalap om Kot üpwe etuk ekis meinisin ia kopwe feila ie.”

¹⁰Mürin Josua a allük ngeni ekewe meilapen ekewe aramas,

¹¹pwe repwe pwerefetal lemenen ewe leni ia ekewe aramas ra nonom ie, o allük ngeniir, “Oupwe amolätä amötümi. Pun mürin ülüngat rän oupwe pwerela pekilan ewe chanpupu Jortan o pwerelong lon ewe fanü ewe Samol mi Lapalap a ngenikemi pwe oupwe fanüeni.”

¹²Nge Josua a üreni chon ekewe ainangen Rupen me Kat pwal esopun ewe ainangen Manasa,

¹³“Oupwe chechemeni ekewe kapas Moses nöün ewe Samol mi Lapalap we chon angang a ürenikemi, pwe ewe Samol mi Lapalap ämi we Kot epwe amolätä eu lenien asösö fän itemi o ngenikemi ei fanü.

¹⁴Pwülüemi, nöümi semirit me nöümi pwiin man repwe chök nonom lon ei fanü Moses a ngenikemi ötiuen ewe chanpupu Jortan. Nge ekewe sounfiu meinisin me leimi repwe akomwola mwen pwimi fän pisekin maun o alisiir,

¹⁵tori ewe Samol mi Lapalap epwe asösöü pwimi usun chök ämi. Iwe, repwe fanüeni ewe fanü ewe Samol mi Lapalap ämi we Kot a ngeniir. Mürin oupwe liwiniti ewe fanü pwe oupwe fanüeni, ewe fanü Moses nöün ewe Samol mi Lapalap we chon angang a fen ngenikemi me ötiuen ewe chanpupu Jortan.”

¹⁶Iwe, ra üreni Josua, “Meinisin mine ka allük ngenikem aipwe föri, nge ia ka tinikeemila ie aipwe feila.

¹⁷Äm aipwe aleasochisiik usun chök äm aia aleasochisi Moses lon mettoch meinisin. Eu chök, amwo ewe Samol mi Lapalap epwe etuk usun an eti Moses.

¹⁸Nge iö a ü ngeni om allük o aleasolap ngeni alom, ese lifilifil met ka allük ngeni, ätewe epwe ninnila. Kopwe chök apöchökülok o tipepwora.”