Josua 19:4-22

⁴Eltolat, Petul me Horma,

⁵Siklak, Pet-markopot me Hasar-susa,

⁶Pet-lepaot me Saruhen, ükükür meinisin engol me ülüngat telinimw fiti wisoposopur.

⁷Pwal Ain, Rimmon, Eter me Asan, ükükür meinisin rüanü telinimw fiti wisoposopur,

⁸me ekewe sop meinisin mi pweli ekei telinimw tori Paalat-peer me Rama lon ewe fanü Nekep. Iei inetin chon ewe ainangen Simeon me lon ewe fanü a aükük ngeni ükükün ar kewe famili.

⁹Pokiten fanüen chon ewe ainangen Juta a kon watte ngeniir, chon ewe ainangen Simeon ra angei eu kinikin me lukalapen fanüer pwe inetir.

¹⁰Iwe, aülüngatin kinikinin ewe fanü a ainet ngeni chon ewe ainangen Sepulon a aükük ngeni ükükün ar kewe famili. Iwe, ükükün ewe fanü ra angei a tori Sarit.

¹¹Seni ikenan ewe kiä a pwerela ngeni lotou o feila ngeni Mareal, a akkü Tapeset o tori ewe öüwö mi nom peliötiuen Jokneam.

¹²Nge seni Sarit ewe kiä a pwal pwerela ngeni ötiu tori kiännin Chislot-tapor. Seni ikenan a pwerela tori Taperat o feitä tori Jafia.

¹³Seni ikenan ewe kiä a pwerela ngeni ötiu tori Kat-hefer me Etkasin, nge lupwen a pwerela tori Rimmon, a pwelila ngeni Nea.

¹⁴Iwe, me peliefeng ewe kiä a pwerela ngeni Hanaton o müchütiu me lemolun Iftahel.

¹⁵Nge lükün ekei telinimw a pwal wor ekoch iter: Katta, Nahalal, Simron, Itala me Petleem , ükükün engol me ruu telinimw fiti wisoposopur.

¹⁶Iei fanüen chon ewe ainangen Sepulon, ar kewe telinimw fiti wisoposopur, a aükük ngeni ükükün ar kewe famili.

¹⁷Iwe, arüanün kinikinin ewe fanü a ainet ngeni chon ewe ainangen Isakar a aükük ngeni ükükün ar kewe famili.

¹⁸Iwe, a pachelong lon kiännin fanüer ekei telinimw: Jesreel, Chesulot me Sunem,

¹⁹Hafaraim, Sion me Anaharat,

²⁰Rapit, Kision me Epes,

²¹Remet, En-kanim, En-hata me Pet-pases.

²²Ewe kiä a pwal akkü Tapor, Sahasuma me Pet-semes o müchütiu me arun ewe chanpupu Jortan. A wor ükükün engol me wonu telinimw fiti wisoposopur.