Josua 15:4-10

⁴Mürin, ewe kiä a pwerela tori Asmon, a feila ngeni ewe öüwön Isip o müchütiu me ren ewe mataulap. A iei kiännin fanüer me peliör.

⁵Iwe, kiännin fanüer me peliötiu ewe Setin Mäla tori mesen ewe chanpupu Jortan. Nge kiännin fanüer me peliefeng a poputä seni ewe Setin Mäla mesen ewe chanpupu Jortan.

⁶A feila tori Pet-hokla o pwerela efengin Pet-arapa. Mürin, kiännin ewe fanü a feila tori ewe fau föün Pohan nöün Rupen we mwän.

⁷Ewe kiä a pwal feila seni lon ewe lemolun Akor tori Tepir. Iwe, a feila efeng o weneiti Kilkal mi sasape ngeni ewe chukuchukutän Atumim peliörün ewe lemol. A pwal pwerela tori ekewe kolukun En-semes o müchütiu me En-rokel.

⁸Mürin, ewe kiä a feitä ren ewe lemolun Hinnom tori peliörün me won ekewe chukun Jepus, ia ewe telinimw Jerusalem a nom ie. Iwe, a pwal feitä tori won ungen ewe chuk mi nom sasape ngeni ewe lemolun Hinnom me pelilotou pwal amüchülan ewe lemolun Refaim me peliefeng.

⁹Mürin, ewe kiä a feila seni ungen ewe chuk tori ekewe koluk mi puächetä me lon Neftoa. Nge seni ikenan a feila ngeni ewe telinimw mi arap ngeni ewe chuk Efron o pwelila tori Paala, iei Kiriat-jearim.

¹⁰Iwe, ewe kiä a pwal pwelila lotoun Paala tori ewe chukun Seir, a pwerela tori won ewe chuk Jearim me peliefeng, iei Chesalon, a pwal feitiu tori Pet-semes o pwerela Timna.