Josua 13:16-32

¹⁶Iei kinikinin fanüer seni Aroer mi nom lepökütiwen ewe lemolun Arnon, pwal ewe telinimw mi nom lukalapen ewe lemol me unusen ewe fanü mi sosonöch tori Metepa

¹⁷me Hespon fiti wisoposopun kewe meinisin mi nom lon ewe fanü mi sonosonöch, pwal ekewe telinimw Tipon, Pamot-paal me Pet-paalmeon,

¹⁸Jahas, Ketemot me Mefaat,

¹⁹Kiriat-aim, Sipma me Seret-sahar mi nom won palapalatän ewe lemol,

²⁰Pet-peor, ekewe palen ewe chuk Piska me Pet-jesimot.

²¹Ikkei ekewe telinimw meinisin mi nom won ewe fanü mi sosonöch me unusen ewe mwün Sihon ewe kingen chon Amor mi nemenem lon Hespon. Sihon ätewe Moses a akufu fiti ekewe souemwenin Mitian iter Ewi, Rekem, Sur, Hur me Repa. Ir ekewe samolukis nöün Sihon mi nom lon ewe fanü.

²²Iwe, pwal Palaam nöün Peor we mwän ewe soupwe a fitilong lein chokewe ekewe aramasen Israel ra niela.

²³Iwe, ewe chanpupu Jortan kiännin fanüen ekewe aramasen Rupen me pelilotou. Iei fanüen chon ewe ainangen Rupen fiti ar kewe telinimw me wisoposopur a aükük ngeni ükükün ar kewe famili.

²⁴Iwe, Moses a pwal ngeni chon ewe ainangen Kat fanüer a aükük ngeni ükükün ar kewe famili.

²⁵Iwe, kinikinin fanüer: Jaser me ekewe telinimwen Kiliat meinisin pwal esopun fanüen chon Amon tori Aroer mi nom ötiuen Rapa,

²⁶pwal seni Hespon tori Rammat-mispa me Petonim, seni Mahanaim tori kiännin ewe telinimw Tepir.

²⁷Ra pwal eäni ekewe telinimw lon ewe lemolun Jortan iter Pet-haram, Pet-nimra, Sukkot me Safon, pwal lusun ewe mwün Sihon ewe kingen Hespon. Nge kiännin fanüer me pelilotou ewe chanpupu Jortan, ator ngeni ewe nomun Kaliläa me peliefeng.

²⁸Iei fanüen chon Kat fiti ar kewe telinimw me wisoposopur a aükük ngeni ükükün ar kewe famili.

²⁹Iwe, Moses a ngeni esopun chon ewe ainangen Manasa fanüer a aükük ngeni ükükün ar kewe famili.

³⁰Iwe, fanüer a poputä seni Mahanaim, pachelong unusen Pasan, iei unusen mwün Ok ewe kingen Pasan me ekewe telinimwen Jair meinisin lon Pasan ükükün wone telinimw,

³¹pwal esopun Kiliat, Astarot me Etrei ekewe samolun telinimwen mwün Ok lon Pasan. Ikkei inetin esopun mwirimwirin Makir nöün Manasa we mwän a aükük ngeni ükükün ar kewe famili.

³²Ikkei ekewe fanü Moses a aineti me lon ewe maasiesin Moap pekilan ewe chanpupu Jortan ötiuen Jeriko.