Iosua 13:16-32

¹⁶A nagi na malala ne ria i tubu na tanga e Aroer na harena maloku ne Arnon, i lokovonga na tanga i pesi na kurukuruna maloku iea. Ra tabekena malala iea i bole loboa a bilane Medeba.

¹⁷Muri a nagi i lakea na tanga e Hesbon i lokovonga i bele na maka tanga na bila: e Dibon, e Bamot-Bal, e Bet Bal-Meon,

¹⁸e Iahas, e Kedemot, e Mepat,

¹⁹e Kiriataim, e Sipma, e Seret-Sahar ra tanga i pesi na kupona na bila,

²⁰e Bet-Peor turana a maka tanga na gagana lolo e Pisga e Bet-Iesimot,

²¹turana a maka tanga ranga na bila. Ra tanga nga, ne vona e huriki a Amor, hosi i matakari a hariki e Sihon, ra hariki na tanga e Hesbon. E Moses i rangia na vabinga, muri i rangi tabu e huriki a matakari ne huriki a Midian, a Evi, a Rekem, a Sur, a Hur, a Reba. Re huriki a matakari nga ri made vona a malala iea, lakea a hariki e Sihon i habi a leho ne ria ri matakari a tabekena malala ne ria takutaku.

²²E Balam e tune Beor a bakovi na lohokanga na maki ge bele muri ma, ia tara e huriki a Israel ri rabalakia.

²³A naru e Iordan i nagia a malala na kabu ne Reuben. Ri bolea a malala ri vaveru, a malala ne ria liu.

²⁴E Moses i veru tabua a tabekena malala iea na kabu ne Gad, ri bole a malala ne ria liu.

²⁵I habia ne ria a maka tanga na robo e Iaser turana a maka tanga na robo e Gilead, a malala ne huriki a Amon i harena na tanga e Aroer pololilo na malala ne huriki a Amor, tabukoi na tanga e Raba na tabeke na nirikena haro.

²⁶Ra malala iea i tubu na tanga e Hesbon, i harena na tanga e Ramat-Mispe e Betonim. I tubu tabu na tanga e Mahanaim i harena na nagi na tanga e Debir.

²⁷Ri bole tabu a tanga nga na maloku ne Iordan: e Bet-Haram, e Bet-Nimra, e Sukot, e Sapon, a tabekena malala na hariki e Sihon na tanga e Hesbon. A nagi na malala ne huriki a Gad i tubu na naru e Iordan, i lakea na nirikena haro, i sike lakea i harena na darilomu e Galili.

²⁸Ra maka tanga nga, e huriki a hamone Gad ri bole ne vone ria liu.

²⁹E Moses i habi tabua na hamona kalavana kabu ne Manase tara tabekena malala, ri bolea a malala ne ria liu.

³⁰A malala i tubu na tanga e Mahanaim i bole loboa a tabeke ne Basan, hosi e Og a hariki o Basan i matakaria. E huriki a Manase ri bole tabu a tanga i ravulu polotara ne huriki a Iair na robo e Basan.

³¹Ra malala iea i dili turana a tabeke na robo e Gilead, e Astarot, e Edrei ra tanga i made vona a hariki e Og. E Moses i habia a malala iea na kalavana kabu ne Makir, e tune Manase.

³²E Moses i veru na kabu nga a malala na gagane Iordan na tabeke na nirikena haro na tanga e Ieriko, na tahuna ri made na bilane Moab.