Joshua 19:27-50

²⁷Te phoeiah khocuk Bethdagon la mael tih Zebulun neh tlangpuei kolrhawk, Bethemek neh Neiel te a doo phoeiah banvoei Kabuul la pawk.

²⁸Ebron neh Rehob, Hammon, Kanah Sidon puei due,

²⁹khorhi te Ramah neh khopuei hmuencak Tyre la bal. Te phoeiah Hosah khorhi ah aka mael te cet phai tih Akhzib rhi ah a hmoi te pawk.

³⁰Ummah, Aphek, Rehob khopuei pakul panit neh vangca rhoek he amih kah khorhi ana om.

³¹Hekah khopuei rhoek neh vangca rhoek he Asher ca rhoek, amih koca a hui a ko kah rho la om.

³²hmulung a parhuk te Naphtali ca rhoek ham neh Naphtali ca rhoek kah a hui a ko tarhing ah a naan pah.

³³Te dongah amih kah khorhi tah Heleph, Zaanannim thingnu neh Adami, Jabneel lamloh Lakkuum la thoeng tih a hmoi te Jordan om.

³⁴Khorhi he khotlak Aznothtabor lam khaw yong tih Hukkuk la pawk. Te phoeiah tuithim Zebulun te a doo tih khotlak kah Asher neh khocuk Jordan, Judah te a pha.

³⁵Te dongah khopuei hmuencak rhoek Ziddim, Zer, Khammath Rakkath neh Kinnereth,

³⁶Adamah, Ramah neh Hazor,

³⁷Kedesh, Edrei, Enhazor,

³⁸Iron, Migdalel Horem, Bethanath, Bethshemesh khopuei hlai ko neh amih kah vangca rhoek,

³⁹tekah khopuei rhoek neh vangca rhoek te Naphtali ca rhoek, amih koca neh a hui a ko kah rho la om.

⁴⁰Dan ca rhoek, amih koca ham a hui a ko lo tarhing la hmulung a parhih te a naan pah.

⁴¹Te vaengah amih kah khorhi rho la Zorah, Eshtaol neh Shemesh khopuei,

⁴²Shaalabin, Aijalon neh Ithlah,

⁴³Elon, Timnah, Ekron,

⁴⁴Eltekeh, Gibbethon, Baalath,

⁴⁵Jehud, Beneberak, Gathrimmon,

⁴⁶Me Jarkon, Rakkon neh Joppa imdan rhi te a om pah.

⁴⁷Dan ca rhoek kah khorhi he te lamkah hang khuen coeng dae Dan ca rhoek te cet uh tih Leshem te a tloek thil uh. Anih te a buem uh tih cunghang ha neh a ngawn uh tih a huul uh. A khuiah kho a sak vaengah tah a napa Dan kah ming voel la Leshem Dan la a sui uh.

⁴⁸Te khopuei rhoek neh a vangca rhoek te Dan ca rhoek, anih koca neh a hui a ko kah rho la om.

⁴⁹Khohmuen te a rhilung neh phaeng ham a khah uh vaengah Israel ca rhoek loh amamih khui kah loh Nun capa Joshua te rho a paek uh.

⁵⁰BOEIPA ol vanbangla a bih khopuei, Ephraim tlang ah Timnathkhehres te anih a paek uh tih a khuiah kho a thong tih kho a sak.