Zosua 19:27-50

²⁷Beto asa si ene la gua pa kali gasa rimata sa voloso pa Betidaqoni, tiqu la gua koasa popoa Zeboloni meke sa lolomo Ipitahele meke pa kali gasa rimata sa butubutu Asa si ene la gua pa Betemeke meke Neieli. Beto asa si hola la gua pa Kabulu,

²⁸Eboroni, Rehobi, Hamoni, meke Kana, kamo la gua tugo pa Saedoni.

²⁹Beto asa kekere la gua pa Rama, meke koasa voloso kamo la ia sa vasileana lavata ta barana pa Taea. Beto asa si tiqe kekere la gua pa Hosa meke kokoi pa kolo Meditareniani. Somana la tugo sari na vasileana Mahalabi, Akizibi,

³⁰Uma, Apeka, meke Rehobi; ka hiokona rua vasileana lavata meke turaṉae la tugo sari na dia vasileana hitekedi pa vari likohaedi.

³¹Sari na vasileana lavata meke sari na vasileana hitekedi arini si koa koasa pepeso tadi na tatamana pa butubutu Asa. Vagi rini pude na dia tinago.

³²Sa pinaqaha vina onomo koasa voloso popoa si ta tavete poni la koari na puku tatamana tanisa butubutu Napitalai.

³³Sa voloso si topue gua pa Helepu meke ene la koasa huda oaku pa Zananimi, hola la gua tu pa Adaminekebi meke Zamunia, kamo la gua tugo pa Lakumu, meke kokoi pa Ovuku Zodani.

³⁴Vasina si kekere la gua pa kali lodu rimata sa voloso meke ene la gua pa Azinoti Tabora, beto asa si topue vasina meke la gua pa Hukoko, kamo koasa voloso tugo tanisa butubutu Zeboloni pa kali mataona sa popoa. Sa voloso tanisa butubutu Asa si pa kali lodu rimata, meke sa Ovuku Zodani si pa kali gasa rimata.

³⁵Sari na vasileana lavata ta baradi si pa Zidimi, Zere, Hamati, Rakati, Sinereti,

³⁶Adama Rama, Hazo,

³⁷Kedesi, Ederei, Enihazo,

³⁸Ironi, Maqidala, Horemu, Betanati, meke Beti Semesi; manege sia sari na vasileana lavata meke turaṉae la sari na vasileana hitekedi pa vari likohaedi.

³⁹Sari vasileana lavata arini meke sari dia vasileana hitekedi si koa koari na popoa sapu ta hia ni rina tatamana pa butubutu te Napitalai pude na dia tinago.

⁴⁰Sa pinaqaha vina zuapa koasa voloso popoa si ta tavete poni la koari na puku tatamana tanisa butubutu Dani.

⁴¹Sari na vasileana hire si somana koasa popoa: Zora, Esitaolo, Isemesi,

⁴²Salabimi, Aizaloni, Itila,

⁴³Eloni, Timina, Ekoroni,

⁴⁴Eleteke, Qibetoni, Balati,

⁴⁵Zehudi, Beneberaki, Qatirimoni,

⁴⁶Mezakoni, Rakoni, meke gua tugo sa popoa sapu vari likohae nia sa vasileana Zopa.

⁴⁷Sipu lopu boka vagia rina tie pa butubutu te Dani sa popoa pa korapana sa voloso tadirini, si la rapatia rini sa vasileana Laisi. Tuqe vagia rini, va matei rini sari na tie, meke vagia rini pude na dia tinago. Koa si arini vasina meke hobe nia Dani rini sa pozana sa popoa pa Laisi poza luli nia rini koasa tamadia nomana.

⁴⁸Sari vasileana lavata arini meke sari dia vasileana hitekedi si koa koasa popoa pu ta vala koari tatamana tanisa butubutu Dani pude na dia tinago.

⁴⁹Sipu va hokotia rina tinoni Izireli sa vina hiana sa pepeso si vala nia rini koe Zosua sa tuna koreo e Nani kukuruna sa pepeso pude tanisa soti.

⁵⁰Gua sapu tozi ni Zihova pude ponia sa vasina gua sapu tepa ia sa: Timinati Sera pa popoa toqetoqere pa Iparemi si ta vala koasa. Kuri pulea sa sa vasileana lavata meke koa nana vasina.