Jon 7:26-38

²⁶Suao. Agai po bidi gabidide te wabao. Tialima, augwaligo Jisas dali po me wabeo. Dago tobolu bidi dabe augwaligo me e homu ebawe, ‘Te bidi Jisas da te Krais da, te sa muyu asaiba wali bidi,’ augwaligo te homu ebawe?

²⁷Tiali goli te asaiba wali bidi pedalobo si, te bidi me deligo agai page bulu me konegobeo. Me ma, dago e bidi Jisas agai page bulu te dago kone dao,” te we bidi mebago te po wai.

²⁸Tama Jisas agai te Moni Lotu Be tempel tomode te we bidi agai po ola mobadi, agai i bomo elama weyu, te po wai, “Ao, dagego ena koneai dao, eno page bulu be dagego koneai dao. Tiali digi, ena homugo digi ena me asobeo. Ayago ena tagala palobaso, ena asai dao. Agai kolesaga te mu tama dao. Dagego aga me konebeo.

²⁹Tiali digi eno da God aga koneai dao. Ena da aga dali bidai. Agai ena tagala palai, e tǫba. Tama tibaso, eno aga mu koneai dao,” Jisasgo te po wai, te Juda dabe dali.

³⁰Tama tibaso, te Juda bage tobolu bidi dabe augwaligo Jisas aga kalabus ilainogo yai. Tiali digi, agai sogo meba elalubuo, aga bodolu mani sogo asobeo, tama tialima bidi me deligo aga nogo me tubeo. Menio.

³¹Me ma, te olo we bidi hauwago Jisasbolo augwa konealubo homu dąų olama, elaluali. Augwaligo te Jisasba homu musiąwai bagebolo te po wai, “Te God agai sa muyu, asaiba wali bidi pedalobo si, te bidigo bomai sę hauwa mu eyu da, Jisasgo yali bomai sę aiyaba elaluaibawe? Menio,” augwaligo te po wai

³²Te Farisi hani bidi augwaligo te olo we bidigo Jisasde te tobage po pomu po wabo odali. Tama te po odama, te Farisi hani bidi dabe dede, te pris tobolu bidi dabe dede, augwaligo enesigi bidi dabe tagala palama, Jisas kalabus yainogo, “Sigi pao,” wai.

³³Tialima, Jisasgo te po wai, “Dwasianu sogo ena dage dali bidaibao. Te silibo si, ena te ena tagala palai bidi pageba ma paibao.

³⁴Tama dagego ena gegebo sę yaibao, tiali digi dagego ena me sugobeo. Magi basowe? Dagego ena bidabo buluba me pogobeo,” Jisasgo te po te Juda dabe dali wai.

³⁵Tama Jisasgo te po obaso, te Juda dabe tobolu bidi augwa hasi po weyu, te po wai, “Te bidi Jisas aga menaba pai digi, dago aga gegelama, sugobewe? Jisas aga te Grik po wabo bidi dabego moni be naniba pogowe? Tede Juda bage me badu bidibo dao. Tama Jisas teba pelama, agai te Juda dabe me, Grik dabe augwalibolo te po ola magi paibawe?

³⁶Agai dabolo te po wai, ‘Dagego ena gegebo sę yaibao, tiali digi dagego ena sugobeo.’ Agai te po me wai, ‘Dage ena bidabo buluba me pogobeo.’ Jisasgo te wali po page mena tamawe?” te Juda dabe tobolu bidi dabe augwa hasi te po wai.

³⁷Te olo bidibo si silibo side, te genuai side dao, wai. Te tebo side Jisas dolaluyu, bomo olama, i wai, “Bidi me deli ąį nogone ebaso da, te bidi ena pageba aselama, ąį tuagasao.

³⁸Godigo wali po asęani bukude te po asęani po gilama, ‘Bidi mego enabolo homu dąų olama, mubaso da, ta, te bidigo homu kolesagade te bidabo bomo elalubo ąį hauwa mu ulu pedalama, bilaibao,’ wai,” Jisasgo te po wai.