San Juan 7:26-38

²⁶Nigá zue̱' dxuchálaje̱' láwela bénneache, na' quebe nu bi dxe̱ Le̱'. ¿Zaj neze benne' xíchaje̱ ca' da li naca benne' nigá Cristo, Bénnea' nasel-la Dios?

²⁷Netu' nézentu' ga za' benne' nigá. Gate xida Cristo, quegá nu neze ga ze̱'e̱.

²⁸Jesús zue̱' dxusé̱dene̱' benne' ca' chale'aj xudau', na' gate benne̱' da nigá, na' gunné̱' zizraj: ―Dxennale núnbeale neda', ne dxennale nézele ga za'a. Bla'a nigá, quegá cheé̱zqueza'. Bénnea' nasel-le̱' neda' naque̱' li lazre', na' Bénnea' quebe núnbeale le'e.

²⁹Neda' núnbe'a Le̱' lawe' da za'a naga zua Le̱', na' Le̱' gusél-le̱' neda'.

³⁰Nadxa gulaca lazre̱' xele̱l-le̱' Jesús. Quebe nu gude̱la Le̱' lawe' da quebe ne zrin zra chee̱ xelútie̱' Le̱'.

³¹Benne' zan guléajle̱'e̱ chee̱ Jesús, na' gulenné̱': ―Gate xida Cristo, ¿gúnljadxe̱' xel-la' waca zrente̱ ca da dxun benne' nigá?

³²Benne' fariseo ca' belenne̱' ca da dxelenná bénneache ca naca chee̱ Jesús, na' le̱', ne benne' xíchaje̱ ca' chee̱ bxruze ca' gulesel-le̱' xra'aga we̱n zrin chee̱ xudau' chee̱ xele̱l-le̱' Jesús.

³³Nadxa gunná Jesús: ―Wazúale̱na' le'e xetú chí'idau', na' xezrínqueza' naga zua Bénnea' gusél-le̱' neda'.

³⁴Le'e wexílajle neda', na' quebe xezrélele neda', lawe' da quebe gaca sa'le naga sua' neda'.

³⁵Nadxa benne' judío ca' gulezú lawe̱' dxuluche̱be ljwezre̱': ―¿Gazra cheaj benne' nigá, naga quebe gaca xezreldxu Le̱'? ¿Waxíaje̱' naga zaj zra' benne' judío ca' zaj nase dínnaje̱' ládujla benne' xe̱zr la xu ca' chee̱ gusé̱dene̱' benne' quebe zaj naque̱' judío?

³⁶¿Bizra zéaje̱ da nigá guzre̱' dxi'u: Wexílajle neda', na' quebe xezrélele neda' lawe' da quebe gaca sa'le naga sua' neda'?

³⁷Zra bze̱be chee̱ laní na' naca na zra blaudxa. Lu zra na' guzé̱ Jesús, na' gunné̱' zizraj: ―Che nu benne' dxebílene̱', dxal-la' xide̱' naga zua' neda', na' xí'aje̱'.

³⁸Naca na ca naxúaj na lu xiche chee̱ Dios, dxenné̱': “Benne' dxéajle̱'e̱ chia', lu lázrdawe̱' galaj xe̱gu nisa da gunna na xel-la' nabán.”