Jon 5:2-9

²Wal deibin abum loda geit blanga gowin langa det taun, en wanbala geit deya bin neim Ship Geit, en wansaid langa det geit deibin abum lilwan wodahol, en garram det Hibru langgus deibin gulum det wodahol Bethsatha. Wal faibala purdibala pos bin holdimap det ruf oba det wodahol,

³en loda sikwan pipul bin oldei leidanbat andanith. Sambala bin blainwan, en sambala bin leimbala, en sambala nomo bin oldei mubaran.

⁵Wal wan men deya bin jidan kripulwan 38 yiya,

⁶en wen Jisas bin kamat deya, imbin luk det men leidanbat deya, en imbin sabi imbin kripulwan longtaim, en imbin askim im, “Yu wandi jidan gudbala?”

⁷Wal det kripulwan men bin tok, “Bos, ai nomo garram enibodi iya blanga pudum mi langa det wodahol wen det woda im boilap, en wen mi oldei trai en go langa det woda, sambodi oldei deya bifo mi.”

⁸Wal Jisas bin dalim det kripulwan men, “Yu gidap en gajim yu sweig en wok.”

⁹En streidawei det men bin gudbala, en imbin gidap, en imbin gajim im sweig, en imbin wok. Wal wen Jisas bin meigim det kripulwan men gidap en wok, imbin det Sebathdei.