Jon 3:7-35

⁷“Kawaajoŋ oŋo kolokoloo doŋgoga Anutuwaanoŋga mende koloowuyati, ii mono mende sokonja. Qaa ii jewe iikawaajoŋ mono mende aaruwa.

⁸Haamonoŋ aŋaa jaajaa laŋ giliro otoŋa momakejanto, ii dakaya qeŋ kaŋkeji ano dakaaŋ baageŋ qeŋ kemakeji, giinoŋ iikawaa kania mende moma asarijaŋ. Uŋa Toroyanoŋ ejemba nemuŋ koma oŋono kolokoloo doŋgoga koloogiti, kuuya iyoŋoo kaniagia mono haamo kawaa so kolooja.”

⁹Kaeŋ meleeno Nikodeemusnoŋ kiko qeŋ kokaeŋ jero, “Ii mono nomaeŋ koloonaga?”

¹⁰Kaeŋ jero Jiisasnoŋ ijoro, “Gii Israel kanageso kuma nonomakejaŋ ano kileŋ qaa iikawaa kania mende moma asarijaŋ. Ii mende sokonja.

¹¹Niinoŋ qaa hoŋa tooŋ moŋ kokaeŋ jewe moba: Nononoŋ naama moma kotojoŋi, ii jeŋ iŋisaamakejoŋ ano naama jaanananoŋ iima mojoŋi, ii naŋgoŋ jeŋkejoŋ. Kaeŋ amakejonto, oŋonoŋ kileŋ Buŋa qaanana ii mende moma aŋgoŋ komakeju.

¹²“Balombaa iwoiya jaanoŋ ii-iita kawaa qaaya jewe moma mende moma laariŋ nonjuti eeŋ, niinoŋ Siwewaa iwoiya mende ii-iita kawaa kania iŋijowe ii mono nomaeŋ moma laariwuya?

¹³Balombaa eja moŋnoŋ Siwenoŋ mende uroto, Siwe gomambaa Eja hoŋanoŋ Siwe gomanoŋ laligoŋ kamaaŋ kolooŋ asugiroti, iinoŋ mono eleema Siwenoŋ ubaa.

¹⁴“Anutunoŋ Mooses baloŋ qararaŋkoŋkoŋanoŋ jeŋ kotoro kopa aenoŋ mokoleŋ uŋaya meŋ toonoŋ kosigoro nanoti, iikawaa so Siwe gomambaa Eja Hoŋa ii kosigogi uma nambaa.

¹⁵Ejemba ii moma laariŋ mujuti, iyoŋonoŋ kuuya laaligo kombombaŋa mokolooŋ laligowutiwaajoŋ ama eu ubaa.

¹⁶“Iikawaa kania ii kokaeŋ: Ejemba ii moma laariŋ muŋkejuti, iyoŋoonoŋga moŋnoŋ tiwilaawaabotiwaajoŋ Anutunoŋ baloŋ so jinoŋa qaa jopagoŋ nonono. Anana kuuya letoma laaligo kotigaa buŋa koloowoŋatiwaajoŋ ama Meria motooŋgo soro ii nonono.

¹⁷Ejemba gomaŋ so laligoŋ kenjoŋi, Anutunoŋ Meria ananaa qaanana jeŋ tegowaatiwaajoŋa qaagoto, Merianoŋ hamo nunuro kantri so letoma oyaŋboyaŋ koloowoŋatiwaajoŋ ama wasiro namonoŋ kamaaro.

¹⁸“Ejemba moŋnoŋ Meria moma laariji, Anutunoŋ iwaa qaa jeŋ tegoro mende tiwilaawaato, moŋnoŋ Jiisas mende moma laariŋ muji, Anutunoŋ iwaa qaa jeŋ tegoro laligoja. Anutuwaa Meria motooŋgowaa qata mende moma laarijiwaajoŋ ama gere siawaa buŋa koloowaa.

¹⁹Anutunoŋ baloŋ ejemba qaanana jeŋ tegoŋkeji, iikawaa kania ii kokaeŋ: Asasaganoŋ namonoŋ kamaaŋ kolooroto, ejembanoŋ nanamemeŋ bologa bologa ama meŋ laligogi. Kaeŋ laligoŋ Anutuwaa asasaga togoŋ uugia paŋgamambaa nanamemenoŋ laŋ somoŋgoŋ laligoŋ kougi.

²⁰“Kuuya nanamemeŋ bologa amakejuti, iyoŋonoŋ Anutuwaa asasaga togoŋ gema qeŋkeju. Anutunoŋ nanamemeŋgia bologa bologa ii iŋisaama jeŋ oŋono gamugia mobubotiwaajoŋ toroko momakeju. Ii moma asasagaa uutanoŋ mende keumakeju.

²¹Mende keumakejuto, moŋnoŋ qaa hoŋa otaaŋ laligoji, iinoŋ saanoŋ asasagayaa uutanoŋ keubaa. Anutunoŋ sololooŋ muro nanamemeŋa ama meŋ laligoroti, iikawaajoŋ nanamemeŋa iikanoŋ asuganoŋ koloowaatiwaajoŋ moja.” Kiaŋ.

²²Jiisasnoŋ kaeŋ jedaboroŋ nama gowokouruta uŋuama Jerusalem siti mesaoŋ Judia prowinswaa gomaŋ gematanoŋ keŋgi. Iikanoŋ kema gowokouruta yoŋowo sonda tosia toroqeŋ laligoŋ ejemba oomulu meŋ oŋoma laligoro.

²³Jiisasnoŋ kaeŋ laligoroto, Jonoŋ kaaŋagadeeŋ gomaŋ qata Salim kawaa kosianoŋ laligoro. Gomaŋ qata Ainon kanoŋ apu mamaga ero ano ejembanoŋ Jombaanoŋ kouma oomulu meŋ oŋombatiwaajoŋ qisigi afaaŋgoŋ meŋ oŋoma laligoro.

²⁴Kambaŋ iikanoŋ Jon ii kapuare mirinoŋ mende ooŋgi raro.

²⁵Juuda yoŋonoŋ hamo qeŋ aowombaajoŋ borogia soŋgbama laligoŋkegi. Kawaajoŋ Jombaa gowokouruta yoŋonoŋ Juuda eja mombo qaa iikawaa niinoŋgiinoŋ jeŋ kanaiŋ jenoŋkooli aŋgi.

²⁶Kaeŋ aŋgi bimooro Jombaanoŋ kaŋ kokaeŋ ijogi, “Somatanana moba, eja Jordan apu leegeŋanoŋ giwo laligoro geeŋgo kaniaya naŋgoŋ jenati, iinoŋ ejemba oomulu meŋ oŋono tuuŋ somasomatanoŋ mono iwaanoŋ kemakeju.”

²⁷Jonoŋ ii moma kokaeŋ meleeno, “Anutunoŋ eja mombaajoŋ iwoi moŋ Siwenoŋga mende ama munagati eeŋ, iinoŋ mono ii buŋa qeŋ aomambaa amamaawaa.

²⁸Iwo laligoŋ kokaeŋ jewe, ‘Nii Hamoqeqe Toya Kraist mende koloojento, Anutunoŋ wasiŋ nono wala kajeŋa iinoŋ gemananoŋ kawaa.’ Niinoŋ qaa ii jeweti, oŋo ii saanoŋ oŋoaŋgio naŋgoŋ jeŋ laligowuyatiwaa so kolooju.

²⁹Iikawaa sareya ama kokaeŋ jemaŋa: Eja moŋnoŋ emba buŋayawo kolooŋ emba memambaajoŋ korisoro qaa jeŋ seiŋ laligoja. Kaeŋ laligoro eja alianoŋ kosianoŋ nama korisoro qaayaa aroya moma iwaajoŋ jinoŋa qaa aisooŋkeja. Kawaa so niinoŋ Jiisaswaa alia kolooŋ iwaajoŋ aisoowe korisoro iikanoŋ keteda koi uuna saa qero laligojeŋ.

³⁰Jiisaswaa qabuŋayanoŋ somariiŋ seiro Jon noonoŋ waziiro sokombaa.” Kiaŋ.

³¹“Moronoŋ eukanoŋa kamaaroti, iinoŋ ejemba kuuya uŋuuguŋ uuta kolooja. Moŋnoŋ namonoŋ asugiŋ namowaa buŋa kolooja ano namonoŋ laaligowaa qaaya jeŋkeja. Siwenoŋga kamaaŋ karoti, iinoŋ mono kuuya uŋuuguŋ uuta kolooja.

³²Iinoŋ iwoi iima moma kotoŋ laligoroti, iikawaa kania jeŋ naŋgoŋ daŋgunu kaaŋa nanja. Kaeŋ nanjato, naŋgonaŋgo qaaya ii ejemba moŋnoŋ moŋ mende moma aŋgoŋ konja.

³³“Ejemba moŋnoŋ naŋgonaŋgo qaaya moma aŋgoŋ konji, iinoŋ Anutu oŋaboŋa koloojiwaa qaaya meŋ kotiiro powowoŋ koloowaa.

³⁴Anutunoŋ qele ejia wasiŋ Uŋaya Toroya dogo qaganoŋ qaagoto, kelemaleleŋ muŋkeja. Kawaajoŋ qele ejianoŋ mono Anutuwaanoŋ qaa hoŋa ii iŋisaama jeŋkeja.

³⁵Maŋanoŋ Meria uunoŋ jopagoŋ muŋkejiwaajoŋ ama iwoi kuuya buŋa qeŋ muŋ borianoŋ ano eja.