Juan 3:7-35

⁷De‑en yo kod kosoobbu‑i taddot id ikahi ku, no ko‑ilangan od kominuvu kow mandon.

⁸Od poko‑iling ini to kaamag nod irup diyot ahad ingkon no id kopi‑i rin. Od korinog dow kos dohingon din, piru dii row od kosorollan ko ingkon ini id pomon woy ingkon od po‑isau. Na, iling en mandad ka‑ay kos nominuvu mandon ukit to Ispiritu to Monama, oyyos konna ta od kokita iddos Ispiritu, piru iyon ta ra od kokita, iddos lammin kodbovotasan din.”

⁹Kahin Nicodemo to, “Yo ka pa man. Momonnu nod kopuungan ini?”

¹⁰Mid tavak si Disas to, “Te! Novantug ka man no tohodnonaw ka‑ay't Israel, piru waa ka poron bos nokaabbot ka‑ay?

¹¹Bonnaavonnaa nod ikohiyon ku kikow, no iddos nosorollan woy nokita roy, idda en kos id ponudtuu roy koniyu. Piru dii kow pe‑en moho od pomakoy taddot konamin kodposivonnaa.

¹²Na, otik dii kow en od pomakoy to id ponudtuu ku koniyu moka‑atag to kotomanan ka‑ay to ampow't ingod, iyon pobbo ayu kod ponudtulan ku sikiyu moka‑atag to kotomanan diyot datas to langit?

¹³Oyyos waa en ahad ondoy no noko‑undiyon to datas to langit, ko konna, siyak da en no Anak to Minuvu, su riyon a man id pomon.

¹⁴“Iddos od kotomanan ku, noko‑iling taddot kodporatas dangan ni Moises to brunsi no uwod no id takos din diyot kayu nid bunsud to riyon pa sikandan to noka‑awoy‑awoy'n lugaa. De‑en iling mandad tadda, siyak no Anak to Minuvu, ko‑ilangan no id poratas diyot kayu nid bunsud,

¹⁵su amoy iddos ahad ondoy nod pomakoy koddi, od pokotanggap to umuun waad tomanon.”

¹⁶Pomon to dakkoon ginawa to Monama to langun no minuvu ka‑ay to ampow't ingod, id boggoy rin kos soosokkad no Anak din, amoy iddos ahad ondoy nod pomakoy kandin, konnod silutan to kopotayan, ko konna, od pokotanggap to umuun waad tomanon.

¹⁷Oyyos waa id popiyod to Monama iddos Anak din ka‑ay to ampow't ingod amoy od silut to mgo minuvu, ko konna, amoy'd kotobbus dan ukit kandin.

¹⁸Dos ahad ondoy nod pomakoy kandin, konnod silutan, piru iddos waa id pomakoy, nohukuman don en nod silutan. Oyyos waa man sikandan id pomakoy taddot soosokkad no Anak to Monama.

¹⁹Iddos unayan nod silutan sikandan, oyyos waa ran tonggapa iddos ko‑owangan no mid undini to ingod. Iyon dan moho id dokollan to ginawa, iddos mosukirom kuntra taddot ko‑owangan, su morat man kos pinuungan dan.

²⁰Dos mgo minuvu nod puung to morat, id kolingasa‑i ran iddos ko‑owangan woy od poriyu ran tadda, su amoy diid kosorollan iddos morat no pinuungan dan.

²¹Piru iddos mgo minuvu nod ikuu to kovonnaan, od porani en to ko‑owangan amoy od kokita no iddos Monama kos id pomonnan taddot langun no moppiyon pinuungan dan.

²²Nopongnga idda, si Disas woy dos mgo tinodduwan din, mid undiyon to prubinsya to Judea. Id oubpa sikandin dutun to pilon allow woy id bovoutismu.

²³Na si Juan no Tohodboutismu, id ponayun mandad sikandin nid bovoutismu riyon to Enon no moranit bonuwa to Salem, su dakkoo man kos oweg dutun. Id pon‑undiyon iddos mgo minuvu to ki Juan amoy'd poboutismu.

²⁴Iddon timpu, waa pa noprisu si Juan.

²⁵Sokkad no allow, iddos mgo tinodduwan ni Juan, nokod‑apuu taddot sokkad no Judio moka‑atag to kod‑ikuu to botasanon dan to kodlinis.

²⁶De‑en id undiyon sikandan to ki Juan woy mid ikahi to, “Tohodnonaw, iddos minuvu nid duma kikow no id pokilaa ru no Mesiyas to riyon ka pa to dipaat Oweg to Jordan, id bovoutismu ron, woy oray'n mo‑uraa kos mid undiyot kandin.”

²⁷Mid tavak si Juan to, “Waa en kogahan to minuvu otik konna idda id boggoy to Monama.

²⁸Sikiyu en kos od pokoposivonnaa no id ikahi a, no konna siyak kos Mesiyas, ko konna, id popiyod a ra nod unna kandin.

²⁹Noko‑iling a to oukuy taddot od osawa nod sakup to kosaa rin. Ahad konna siyak kos od osawa, piru od kahaa a otik od korinog ku no iddos od osawa, nahaa taddot od osowan din. De‑en noponnu a to kahaan.

³⁰Oyya su ollog en nod kovantug si Disas woy siyak mandad, ollog en nod lingawan.”

³¹Na sikandin no id pomon diyot datas to langit, lampas to langun, piru iddos minuvu nid pomon ka‑ay to ampow't ingod, sakup en sikandin to ingod woy'd ikahi sikandin moka‑atag da en ka‑ay to ampow't ingod, su idda ra me‑en kos sinorollan din. Piru sikandin no id pomon diyot langit, lampas en to langun.

³²Ahad id ponudtuu rin iddos moka‑atag to nokita woy norinog din diyot datas to langit, waa moho goli od pomakoy taddot id posivonnaa rin.

³³Piru iddos minuvu no id pomakoy taddot id nonaw rin, id posivonnaa no iddos langun no kahit Monama, mooggot en.

³⁴Oyyos si Disas no id popiyod to Monama, waa osson id ponudtuu rin, idda ra en so id po‑ikahi to Monama kandin. Su id boggayan man sikandin to waa toppong no kotuusan to Uhis no Ispiritu.

³⁵Dakkoo kos ginawa to Monamon Amoy taddot Anak din, woy id sanna rin kandin iddos kotungud nod ponguu to langun.