João 3:7-35

⁷Kat pote yt hot'ok'e i uimienoi e'ywã'ĩ pakup i ro ui'e hap e Iesui.

⁸— Pyno ahenoi po'og epe aikotã miit'in wemo­herep pakup i hap ete e. Pyno mi'i tã aikotã ywytu hewyry tomi­ky­'esat ewy kahato hap ewy e. Ipu'ehay watikuap kahato wen ma'ato aikope pyi wasere tut hap yt uwe i ikuap i'ewyte ito hap yt uwe i ikuap. Mi'i hap ewy Tupana Pã'ãu tomo­herep pakup i miit'in tomi­ky­'esat ewy e. Yt heremo i Tupana Pã'ãu ywytu ewy ma'ato put'ok'e hawyi watikuap Tupana ra'yn Tupana sa'yru wo Tupana saki'yt no wato­py­hu'at e.

⁹Mi'i hawyi Niku­temu to'e — Yt atikuap i te emienoi Uhyt e.

¹⁰— Pãi are en ai'y­wania Isareu ywania mu'e hat koro kahato pytkai yt etikuap i mio wuat uimienoi epiat e Iesui.

¹¹— Pywo pe ti ahenoi epe mesuwat urumikuap ok tã e. I'ewyte uru'a­kasa hap ok tã ma'ato yt etimohey i urumienoi ko'i e.

¹²Miit'in misepap sehay puo mesu­wa­rotiat ra'yn ahenoi epe ma'ato mi'i pytkai yt etikuap hin i ui'e hap aikotã aporu etikuap uimienoi Tupana misepap sehay puo atipy totiat ra'yn ahenoi epe pote e.

¹³Yt uwe i mi'i rẽ toto atipy kape. Wẽtup ok yn toto atipy kape mi'i ti wuat'i miit'in yke'et e tuwepe. Yt uwe i mi'i rẽ toto atipy kape. Wẽtup ok yn toto Mi'i Miit'in Yke'et Mi'i ti atipy kaipywiat. Mi'i yn ni henoi kuap sese Tupana misepap sehay atipy kaipywiat e.

¹⁴Sa'a­wy'i aha'a­se'i Musei timo­poĩ'ãm aria'yp posak ete moi iã'ãkap imehit rakat mohag wo. Mi'i tutunug yahig note moi tok pe moi mieka­tu'u ko'i moehãite hamo ipap tet pupi. Mi'i hap ewy ti aru uito miit'in yke'et ta'a­tu­mo­poĩ'ãm aria'yp posak ete e.

¹⁵Mi'i hawyi meiẽwat i'atu­mi­mo­poĩ'ãm mohey haria wyti aru wuat'i e'at piat ieĩne'en hanuaria tukup­te'en e. Uimo­poĩ'ãm aru mekewat moi iã'ãkap ewy miit'in moieĩne'en hamuat e Iesui.

¹⁶Katu­pono Tupana ti'a­tu­ky'e kahato miit'in haype tutum Tosa­'yru wẽtup ok takat i'atuepe e. Mi'i pote uwe uwe imohey mi'i haria wyti aru yt iku'uro sese i ma'ato wuat'i e'at pe ra'yn i'atue­hãite hap toĩne'en e Iesui.

¹⁷Ta'i Tupana tipo­'oro Tosa­'yru miit'in ehakye­ra'at hanuat sese. Ta'i yt miit'in atuma­'at'i ma'at'i hamo i Tupana tipo­'oro Tosa­'yru e.

¹⁸Uwe uwe Ha'yru mohey haria ti Tupana yt ti'a­tu­'a­piheg i ma'ato irania'in ti aru Tupana mi'a­tu­'a­piheg wuanuaria tukup­te'en mi'iria are. Mi'iria pe wyti aru mio tã e Tupana — Yt nakuaria i sese eipe e katu­pono Uha'yru uimiium pun haria eipe e.

¹⁹— Atum kahu ra'yn Uha'yru ariãty ewy ehepe mekewat mu'ap uhowawiat moherep hamuat wen ma'ato yt eweiky­'esat i Uha'yru ariãty ewywuat e. Yt naku i eipe e katu­pono po'og i'ypyryp hap ne'i mi'i haype eweiky­'esat are katu­pono eiminug sa'ag hap nug hap po'og eweiky­'esat i'ypyryp wiat haype e. Mi'i pote i'ypyryp we yn eweikup­te'en e. Mi'i hap ete atikuap kahato uwe yt nakuaria i hap e Tupana.

²⁰Yt nakuat i nug haria i'atu­py­'ahak kahato ne'i ariãty ete. Ta'a­tu­ky­'esat pya kahato ta'a­tu­kawiat hẽtyhot hap katu­pono ta'a­tu­minug sa'ag ko'i moherep hap yt ta'a­tu­ky­'esat i haype e.

²¹Ma'ato irania'in wakuap nug neran haria tõ'ẽ tõ'ẽ ariãty kape katu­pono ta'a­tu­ky­'esat ta'a­tu­minug wakuat ko'i Tupana esaika hap wywuat moherep hamo ta'a­tu­ky­'esat kahato e Iesui Niku­temu pe.

²²Meiũran hawyi toto Iesui yi Iuteu kape. Topot­mu­'eria wywo yn toto. Mi'i hawyi toĩne'en mot'i itote topot­mu­'eria wywo. Mi'i tote hemiit'in ti'a­tu­set'ok kahato miit'in y'y pe ma'ato yt Iesui i i'atu­set'ok ma'ato ipotmu­'eria ne'i i'atu­set'ok.

²³Mekewat e'at pe topyhik hap e'yianmete wo'o­set'ok hat Iuwãu ti'a­tu­set'ok miit'in tawa hit Enũ pe yt pya hin i tawa Sarẽi kai.

²⁴Toiky­'esat Enũ hy miit'in set'ok hamo ihy wato pote. Mi'i kape tõ'ẽ tõ'ẽ miit'in Iuwãu kape te'e­ru­we­set'ok y'y piat hamo.

²⁵Itote tu'uka tu'uka to'ope sehay wo Iuwãu potmu­'eria wẽtup ok Iuteu wywo aikotã aikotã som po'og hãpyk wati­'a­tu­set'ok miit'in ta'a­tu'e hap ete tu'uka sehay wo.

²⁶Mi'i hawyi tuwat Iuwãu kape te'e­ro'e hamo — Urumu'e hat i'atu'e mekewat ihainia Iutãu e'y sakpuat emimo­herep sa'a­wy­'iwuat wyti toĩne'en mio meiũpe yi Iuteu pe. Koitywy miit'in toi'a­tu­set'ok kahato ra'yn itote po'og aikai. Yt naku i mi'i tã uruto'e katu­pono koitywy wyti wuat'i miit'in tuwat kahato mi'i hat kape te'e­ru­we­set'ok hamo hawyi yt tõ'ẽ i po'og ahowawi i'atu'e Iuwãu me.

²⁷Mi'i hawyi Iuwãu ti'a­tu­wesat — Pyno po'og waku eweiwat Mi'i Miit upi po'og waku eweikup­te'en Mi'i Miit emiit'in no uhemiit'in e katu­pono Tupana tiky­'esat wuat'i miit'in Mi'i Miit wanuat sok hap e. Toiky­'esat kahato yne miit'in tuwat Mi'i Miit kape are e. Uito rat yt Tupana Mipo­'oro Eipo­rekuat nuat i rat e sa'a­wy'i ma'ato uito Tupana Mipo­'oro yianmiat Aipo­rekuat sese hut hamuat enoi hat ne'i uito are'e sa'a­wy'i ehepe hap ewy e Iuwãu.

²⁸Mi'i hat ne'i uito are e. Mi'i pote uiwepit kahato Mi'i Miit mõtypot hap ete e. Ta'i uiwepit aikotã uiwyok ehary'i wuanuat kat hat ewy ne'i uito e Iuwãu. Toterut ihary'i wuat towy ok kape hawyi towy'ok miky­'esat tohenoi ihary'i wuanuat pe. Toiky­'esat pote tut te'aito wuat kape.

²⁹Mi'i hawyi to'o­kyi'at ra'yn. Uito ti areĩne'en aikotã wewy ok ehary'i kat hat ewywuat areĩne'en e Iuwãu. Meiẽwat Miit topy­hu'at teha­ry'i uimi­puẽti wywo. Mi'i hawyi ihary'i pakup takat iwepit kahato e. Iwepit pote uito i'ewyte uiwepit ihary'i erut hat uito pote. Mi'i hap ewy uito uiwepit kahato katu­pono uipot­mu­'eria tuwat yne ra'yn Iesui kape are e. Mio aru ipotmu­'eria tukup­te'en uipot­mu­'eria ko'i. Ihary'i pakup ewywuat ipotmu­'eria are sehay iã'ãkap wuo e Iuwãu wo'o­set'ok hat.

³⁰Mi'i Miit wyti po'og po'og wakuat uikawiat hat e.

³¹Mi'i Miit atipy kaipywiat po'og wakuat wuat'i kawiat hat are. Yi totiaria ti ta'a­tu­mikuap ok tã yn henoi kuap ma'ato atipy kaipywiat sut hat mienoi po'og iwato yi totiaria mienoi kai are e.

³²Atipy kaipywiat ta'a­kasa hap tohenoi tomikuap ok tã tohenoi ma'ato Mi'i Miit yt uwe i imohey e Iesui piat.

³³Ma'ato wato­mohey atipy kaipywiat mienoi hawyi ti watikuap ti meremo pywuat sese e Tupana wato'e hap e.

³⁴Tupana Mipo­'oro atipy kaipywiat wyti henoi hãpyk yne kahato topo­'oro hat ehay upi katu­pono tutum yne Topã'ãu tehay enoi hanuat pe e.

³⁵Ta'i Tupana tiky'e kahato ti Tosa­'yru mi'i tupono tutum yne ipo pe e.