Jon 2:1-17

¹Iu e biing namih, nenge tara na inen ken fakekel fuuh ri tel u na maleh na Kana na falifuh na Galili. Tina Iesu sabin tinaiwa.

²Ri sising Iesu turan berberat na fafausum kia sabin isi rin la u lo e inen ken fakekel fuuh ae.

³Aunbiing wain ari ka rop mang, tina Iesu ka fas Iesu le, “Ka rop mang e wain.”

⁴Iesu ka kiliis u aragii, “Tin ier, isi sah o ka fas iau ini tier ian tel u? Aunbiing kiak biil biitom i tapiek.”

⁵Tina Iesu ka fas foron fafauun na falifuh ae le, “Gamen tel foron sanih in fas gam ini.”

⁶Imel iwon e luunluun dan tinaiwa, ae ri tel u ini fat. Ri luun dan la lo, una susuh na matngan nagogon ken fan Iudaia. Temtem tikii lo ri i fasih rin to nenge mar e lita lo.

⁷Iesu ka fas foron fafauun ae le, “To fafuun foron luunluun dan ini dan.” Ke ri ka to fabasbasah foron luunluun dan ae ini dan.

⁸Ke ka fas ri le, “Arik, gam utfe ti fal e dan mang ke gamek ta u sing kaltu ae i parpar na inen.” Ri ka mi lo arae i use u.

⁹Aunbiing kaltu ae i parpar na inen ka tof u, dan ae ka sokiliis tah una wain. Biil i usum le wain ae i la tinga, isau le foron fafauun sau ae ri utfe ta dan, ri usum le wain ae i la tinga. Namih ka kam pes kaltu ae i fakekel fuuh una baba,

¹⁰ma ka fas u le, “Fanu tikii ri faumin foron ses famu la ini wain rokap, namih le ri ka yin mas mang, ke rik faumin ri mang ini wain ae biil i rokap kanaka. Isau le wo, igii sau o ka am ta u mang e wain ae i rokap kanaka.”

¹¹Igii e tanwaran rakrakai na fakileng ae Iesu i fatapiek u, i fatapiek u na Kana na falifuh na Galili. I finngas memeh kia, ma berberat na fafausum kia ri ka unune lo.

¹²Namih, Iesu ke tina, foron tualik ke berberat na fafausum kia ri ka filau puh una Kapernaum. Ke ri ka melmel aiwa pes fal e biing.

¹³Aunbiing ka fatat isi inen na Liuliu Kulef ken fan Iudaia, Iesu ka tatkau una Ierusalem.

¹⁴Aiwa na palgan ubiif kale Felun Sising, Iesu ka tafe fal e fanu ri famam lame foron bulmakau, sipsip ke bun una fifiil, ma fal ri sokiliis pitkalang la, na olon fateh.

¹⁵Ke Iesu ka tel nenge bis kia ini finau, ma ka fes fasuuh fanu tikii tinaiwa, turan foron sipsip ke bulmakau, ma ka lin sararah foron pitkalang ken fanu ae ri sokiliis pitkalang la, ke ka fabereng foron fateh kiri.

¹⁶Ke ka fas fanu ae ri kep bun una fifiil le, “Tel ufu foron bun igii tinaga. Gong gam ikis fel ke Tata una felun fifiil!”

¹⁷Foron berberat na fafausum kia ri ka wol pes sun orek na Buk na Gogoh le, “Tara mamais kiak isi felum in sok na balang arae yiif.”