San Juan 2:1-17

¹Oualiuiptic ocatca se monamictililuitl itich in altipetl Caná tlen poui itich in tlalmeh Galilea. Ompa ocatca nimaman in Jesús.

²Jesús uan nitlasalohcauan noiuqui oquintlaluihqueh itich non monamictililuitl.

³Itich nin iluitl otlan in vino, uan nimaman Jesús oquiluih: —Acmo icpiah vino.

⁴Jesús ocnanquilih: —Siuatzintli, ¿tleca itnechoniluia neh? Ayamo ehco nohora.

⁵Pero nimaman Jesús oquimiluih naquin otlaxixilohtoyah ica in vino: —Ixconchiuacan nochi tlen yeh namechoniluis.

⁶Ompa ocatcah chicuasen atecomeh de titl, campa ocanayah atl tlen ica omochipauayah quemeh in tlanauatil judío quinnauatia. Itich sehse ateconi oaquia quemeh se ciento litro atl.

⁷Jesús oquintiquitih: —Ixquimontetemitican ica atl in atecomeh. Uan yehuan yec oquinpiauitihqueh.

⁸Ihcuacon Jesús oquimiluih: —Axan ixconquixtican siqui, uan ixconuiquilican nintlayacancau in tlaxilouanih. Yehuan ohcon occhiuqueh.

⁹Nintlayacancau in tlaxilouanih ocyecoh in atl tlen omocuip vino. Pero yeh amo ocmatia canih oualeuaya non vino. Sayeh in tlaxilouanih naquin ocquixtihqueh in atl itich in atecomeh, yehuan quemah ocmatiah. Ihcuacon nintlayacancau in tlaxilouanih oquinotz in novio

¹⁰uan oquiluih: —Nochi iluiuahqui achtoh icxiloua in vino non ocachi cuali, uan ihcuac in tlanotzalten simi yoconiqueh, ihcuacon quinmactia in vino non moluehtzin. Pero touatzin yehyeh hasta axan otconquixtih in tlen ocachi cuali vino.

¹¹Nin iluicacchiualistli tlen Jesús oquichiu ompa Caná tlen poui Galilea, yehua tlen achtoh iiluicacchiualis oquichiu, uan ompa ocnextih quen ueyihcatzintli, uan nitlasalohcauan otlaniltocaqueh inauac.

¹²Satepan ihcuac yopanoc non iluitl, Jesús iuan nimaman, nicniuan uan nitlasalohcauan otimoqueh campa in altipetl Capernaúm, uan ompa omocauqueh quesqui tonalmeh.

¹³Yoehcotoya in pascuahiluitl den judíos, uan Jesús otlehcoc oyah Jerusalén.

¹⁴Uan oquimahsito icah in teopantli naquin tlanamacah ica cuacuehqueh, ichcameh uan palomas. Uan noiuqui naquin icpatlah tomin ompa otolohtoyah.

¹⁵Ihcuacon Jesús ocomixtlalih se micatl, uan ica oquinquihquixtih nochtin den teopantli, ica nochi imichcauan uan incuacuehuan. Ocxinih nintomin in tominpatlanih uan oquimixcuip ninmesas.

¹⁶Oquimiluih naquin ocnamacatoyah palomas: —Ixconquixtican nochi nin de nican, uan amo ixconchiuacan ichan noTahtzin se tianquisco.

¹⁷Ihcuacon, nitlasalohcauan oquilnamiqueh nic ihcuiliutoc itich in Teotlahtolamatl: “Nonichaualis ipampa mochantzin queh se tlitl nechtlatia.”