San Juan 2:1-17

¹Na ornu bi bzaꞌ chon dzi nu yuꞌ fandang tub gyedz nu la Caná lo yu ni Galilea. Laab lat zeꞌ ri ñaa Jesuuz.

²Nunu niꞌ ziꞌl mnii gaꞌ dey lo Jesuuz nu lo de yu nu rsyaꞌ lom nu cha dey lo fandang zeꞌ.

³Na ornu blazh ñup ni urbyay nu goꞌ dey, orzeꞌ na ñaa Jesuuz rab mim: ―Blazh ñup ni urbyay ―nam.

⁴Orzeꞌ na gaꞌ Jesuuz rab mi ñaam Li: ―Ña, ¿lagu rniir riidz zeꞌ lo̱? Nigul shuub dzi nu gzac mbecy de gyel lily ne̱ ―nam.

⁵Orzeꞌ na gaꞌ ñaam rab mi de moz nu yuꞌ lo fandang zeꞌ: ―Bicy der la ziꞌl coz nu gniiñ ―nam.

⁶Na, zeꞌ nguaa gaꞌ shuup reꞌ nu byaa nu gyitaꞌ. Nañ reꞌ zeꞌ rguꞌ de mbecy Israeel nis par nu rnaa dey nunu par nu rgyiib dey la coz gal nu rnii leey ni dey. Zeꞌ tub ga de reꞌ zeꞌ rzuꞌ tub cyaal gaynal, o tub setent litr nis nañ ñi.

⁷Orzeꞌ na Jesuuz rab mi de moz zeꞌ: ―Bduꞌ der nis nañ de reꞌ re gal dzaa lañ ―nam. Orzeꞌ de yu zeꞌ pchaa dey ñi gal ruꞌ lañ. Orzeꞌ nis zeꞌ byac ñi ñup ni urbyay.

⁸Orzeꞌ na gaꞌm rab mi dey: ―Na bdaꞌ der nis ii gua nu der goꞌ yu nu riib ic lo fandang ―nam. Orzeꞌ gua nu dey ñi goꞌ yu nu riib ic zeꞌ.

⁹Orzeꞌ yu nu riib ic zeꞌ bicy yu preb nis nu byac ñup ni urbyay zeꞌ, sinu wangad lagy lay ca bruuñ. Tees de moz nu bdaꞌ nis zeꞌ gud lagy dey ca bruuñ. Orzeꞌ yu nu riib ic zeꞌ bredz yu yu nu nac nob zeꞌ.

¹⁰Orzeꞌ nay rab yuy: ―Dela mbecy nu loga la rbic dey ñup nap ni urbyay goꞌ de mbecy nu rdeꞌ lo fandang. Na ornu dzi bi goꞌ shaad dey ñup nap zeꞌ, orzeꞌ rbic dey de ñup corient goꞌ dey. Zeꞌ ru bzeeñ ru ñup nap gashtal na rbic ru goꞌ dey ―nay.

¹¹Ndeꞌ nusuriidz nu bicy mi nu loga la tub gyedz nu ri lo yu ni Galilea nu la Caná. Zeꞌ blyuum gyel lily nim lo de mbecy, nunu de yu nu rsyaꞌ lom bicy cup zir dey consuel lom.

¹²Na ornu bded zeꞌ, orzeꞌ bruum Caná gush nez mi zam nu ñaam, gal nu de bicy mi, gal nu de yu nu rsyaꞌ lom za num dey par Capernaum. Zeꞌ pcyiiñ mi la be dzi.

¹³Na ornu sñuu ga shuub dzi nu chuꞌ de mbecy Israeel saꞌ ni Pas, orzeꞌ Jesuuz yam par Jerusaleeng.

¹⁴Na ornu brim Jerusaleeng, orzeꞌ guꞌm loliꞌ ni yuꞌ nu driib zily de mbecy Israeel Ñgyoozh. Orzeꞌ byap mi de mbecy nu rut tor, nu shily, gal nu begy ni de mbecy. Nunu byapaꞌm de mbecy nu nguaa lo mez nu rchaa tiñ ni de mbecy nu bruu reñaꞌ lugaar.

¹⁵Na ornu bzaac mi de coz zeꞌ, orzeꞌ bzaam tub chicot nu duu lyaar. Orzeꞌ nu ndeꞌ pcyuu num dey, nu tor niy, gal nu shily niy. Bloom dey ich loꞌ ni yuꞌ zeꞌ. Orzeꞌ ptush las mi tiñ ni de yu nu rchaa tiñ zeꞌ nunu blaagy yaam mez ni dey. Orzeꞌ brush las tiñ ni dey.

¹⁶Zeꞌ de yu nu rut begy zeꞌ nam rab mi dey: ―Bloo der de bañcyug ii lugaar ii. Cueꞌ gyicy der yuꞌ ni Ñgyoozh uza̱ par tub yagyiꞌ ―nam.

¹⁷Orzeꞌ de yu nu rsyaꞌ lom byezaꞌ lagy dey zeꞌ nu rniiñ lat riidz ni Ñgyoozh: “Ya̱ rzu ferta̱ nu nac yuꞌr gashtal wagagye̱e̱ ga̱ꞌ la̱”, rniiñ.