Jon 19:18-25

¹⁸Te bulu dude augwaligo Jisas ni pedaide elama daganai. Tama augwaligo gasa bidi me si me Jisas dali elai. Tama me bidi Jisas agai dolo nogo badu eleyu, me bidi agai pobase nogo badu eleyu yai. Tama Jisas aga tomode elai.

¹⁹Tama gavman tuni bidi Pailat agai po me deli asęnama, tama augwaligo te Jisas elali ni pedaide muai. Te asęani pode te po wai, ‘Jisas Nasaret bidi te Juda we bidigo tuni bidi dao,’ te po te ni pedaide asęna muai.

²⁰Augwaligo te Jisas ni pedaide elama daganani, te Jerusalem hanu pąde tamao. Tama tibaso, Juda bidi hauwa augwaligo te asęani po nedai te Hibru pogo. Tama Pailatgo te po Hibru pogo asęyu, te Rom pogo asęyu, te Grik pogo asęyu yai, te Jisasgo ni pedaide tama po asęai.

²¹Tama te pris tobolu bidi dabe augwaligo Pailatbolo te po wai, “Nago te po tama asęgio, ‘Juda bidigo tuni bidi dao,’ te po wagio. Nago tama po asęąo, ‘Te bidi Jisas agai te po wai, “Ena te Juda we bidigo tuni bidi dao,” ’ te po agai wai dao,” augwaligo te po wai.

²²Pailatgo augwaligo po wei ponoyu, te po wai, “Eno asęani po te eno polo asęai dao. Te po tama elalumainao,” te po wai.

²³Te ami bidi dabe augwaligo Jisas ni pedaide elama daganai. Tama te sę elama, tama augwaligo Jisas aga ugwa dabe sai. Aga ugwa dabe selama, tama ami bidi me si me si augwa hasi te ugwa dabe dobola sai, tama te ami bidi deli deligo Jisas agai te ugwa me deli sai. Tialima agai holobo ugwa hobolisiąwani bobobage mu nigai ugwa dao.

²⁴Tama tibaso, te ami bidi dabe augwa hasi po miyu te po wai, “Dago te ugwa pedegobeo. Dago satu gagali elama, tama te ugwa sabo bidi nigilaibao.” Augwaligo tama tiwai tama tiyu, te bukude polobadu wali po usu nanio. Te bukude te po wai, “Augwaligo eno ugwa dabe dobola sai. Tama augwaligo eno holobo ugwa sabo bidi nigilainogo, te satu gagali yai,” te bukude te po polobadu asęani. Tama te po usu nanio. Te ami bidi dabe augwaligo tama tiwai.

²⁵Te Jisasgo ni pedai pąde Jisas aga ida tede dolaluai. Te Jisas aga ida aga ama dede me tede dolaluai. Te gasa we me, aga nogi Maria, aga bidi nogi Klopas, te we me Jisas aga ida dali dolaluai. Tama gasa we te Makdala bulu we nogi Maria, aga tede dolaluali. Te we dabe me si me si augwali Jisas elali ni pedai pąde dolaluyu bidali.