Joaŋ 9:12-29

¹²Ma êsêac sêsôm gêdêŋ eŋ gebe “Ma ŋac tau gêmoa ondoc.” Eŋ kêsôm gebe “Aê gajam kauc.”

¹³Ma êsêac sêwê ŋac, taŋ gêmuŋgeŋ matapec naŋ, dêdêŋ Parisai sêja,

¹⁴gebe Jesu kêjaliŋ lemoŋ ma gêgôm eŋ mataanô kêpoa lasê tonaŋ gêdêŋ sabat teŋ.

¹⁵Go Parisai têtu kênac eŋ kêtiam kêtu mataanô kêpoa lasêŋa. Ma eŋ kêsôm gêdêŋ êsêac gebe “Ŋac tau kêkêŋ nom ŋalemoŋ kêpi matocanô ma kasagu tauc, tec matocanô galic gamêŋ.”

¹⁶Tec Parisai ŋagêdô sêsôm gebe “Ŋac tonaŋ aŋga Anôtônê atom, gebe gêjam dabuŋ sabat atom.” Ma ŋagêdô sêsôm gebe “ŋac sec teŋ oc êŋgôm gêŋtalô kapôêŋ tônê ŋai amboac ondocgeŋ.” Ma sêwa tauŋ kêkôc.

¹⁷Ma sêsôm gêdêŋ matapec kêtiam gebe “Ma aôm taôm oc ôsôm biŋ amboac ondoc êpi ŋac, taŋ gêgôm matamanô kêpoa lasê naŋ.” Tec eŋ kêsôm gebe “Eŋ propete teŋ.”

¹⁸Juda sêkêŋ gêwiŋ gebe eŋ gêmuŋgeŋ matapec ma galoc mataanô kêpoa lasê naŋ atom e sêmôêc ŋac, taŋ mataanô kêpoa lasê naŋ, têna agêc tama.

¹⁹Ma têtu kênac êsêagêc gebe “Amagêc latômi, taŋ asôm gebe têna kêkôc eŋ tomatapecgeŋ naŋ, ŋac tau tonec me. Ma amboac ondoc tec galoc mataanô gêlic gamêŋ.”

²⁰Ma têna agêc tama sêjô êsêac aweŋ gebe “Aêagêc ajala gebe latuŋi eŋ, taŋ têna kêkôc eŋ tomatapecgeŋ.

²¹Mago mataanô gêlic gamêŋ ŋalêŋ tec aêagêc ajam kauc. Ma ŋac taŋ gêgôm eŋ mataanô kêpoa lasê naŋ, aêagêc ajam kauc eŋ amboac tonaŋ. Atu kênac eŋ. Eŋ kêtu kapôêŋ sugac, tau êsôm nê biŋ.”

²²Têna agêc tama sêsôm amboac tonaŋ kêtu têtêc Judaŋa, gebe Juda sêsôm biŋ kêpi tageŋ gebe “Ŋac teŋ embe êsam Jesu gebe Kilisi,” naŋ têtiŋ eŋ su aŋga gôlôacnêŋ.

²³Têna agêc tama têtêc tonaŋ, tec sêsôm gebe “Eŋ tau kêtu kapôêŋ sugac, atu kênac eŋ tau.”

²⁴Amboac tonaŋ sêmôêc ŋac, taŋ gêmuŋgeŋ matapec naŋ, kêtu luagêcŋa ma sêsôm gêdêŋ eŋ gebe “Otoc Anôtô sa. Aêac ajala gebe ŋac tônê eŋ ŋac sec.”

²⁵Tec eŋ gêjô êsêac aweŋ gebe “Eŋ embe ŋac sec, oc janam kauc. Tageŋ tonec tec kajala gebe gêmuŋgeŋ matocpec, mago galoc galic gamêŋ.”

²⁶Ma êsêac sêsôm gêdêŋ eŋ gebe “Eŋ gêgôm asageŋ gêdêŋ aôm. Eŋ gêgôm matamanô kêpoa lasê ŋalêŋ amboac ondoc.”

²⁷Eŋ gêjô êsêac aweŋ gebe “Kasôm gêdêŋ amacgac mago akêŋ taŋem atom. Abe aŋô asageŋ êtiam. Amac abe atu ênê ŋacseŋomi awiŋ me.”

²⁸Ma êsêac sêbu eŋ ma sêsôm gebe “Aôm tec kôtu ênê ŋacseŋom, ma aêac tec atu Mosenê ŋacseŋomi.

²⁹Aêac ajalagac gebe Anôtô kêsôm biŋ gêdêŋ Mose. Mago ŋac tônê tec ajam kauc ênê ŋam.”