Johane 9:12-29

¹²Iŋuc mume wiocnerâ mumbiŋ, “Ŋic e wena jukac?” Eme muwec, “No mi manakopac.”

¹³Eme ŋic tiŋtuŋ ecnewec e farisaio jaŋerao jowa rambiŋ.

¹⁴Eme Jesuzi afe jârickerâ ʒâŋene bâtâcnewec i sabata hombaŋko ewec.

¹⁵Eme farisaio ŋic jaŋe iŋuc jaha wiocnerâ mumbiŋ, “Go weniŋuc erâ ʒâŋe fifi emec?” Mupie ʒiŋuc jazawec: “E ʒâŋe‐nane afe ruacneme no ra sahac‐nane ʒurerâ ʒâŋe fifi epac.”

¹⁶Eme farisaio jaŋeraonec gâcnezi mumbiŋ, “Ŋic e Anuturaonec aricne, e hombaŋ‐nâŋec qâsuakac.” Gâcnezi ine mumbiŋ, “E hehesic juhuc muzac mâsi iŋucne wemocko bazac.” Iŋuc muhuc qaqatarac embiŋ.

¹⁷Ehuc ŋic tiŋtuŋ ecnewec e indiŋkerâ mumbiŋ, “Ʒâŋege bâtâcnejec, gahac ere weniŋuc mukic?” Eme muwec, “E porofete.”

¹⁸Eme Judaŋic jaŋe ŋic e jâmbomac ʒâŋe tiŋtuŋ juku ʒâŋe fifi ejec, iŋuc muhuc maŋjahec erâ neŋgoc mamac jahec‐ticne hefârec‐jofarâ

¹⁹wio‐jacterâ mumbiŋ: “Ŋokâ‐ŋekic tiŋtuŋ fuawec mukopirec ʒine hâcne? E weniŋuc erâ ʒâŋe fifi ejec?”

²⁰Eme neŋgoc mamac jahecne ʒiŋuc mupic: “E ŋokâ‐nâhec, i manakoperec, â tiŋtuŋ fuawec, i wâc manakoperec.

²¹Erâ weniŋuc erâ ʒâŋe fifi ejec, me mozi ʒâŋene bâtâcnejec, ine mi manakoperec. Wiac e soka‐fârekicne, irec e jahacne wiocnepie fuŋne‐ticne ŋazaoc.”

²²I Judaŋic jaŋere hâwic‐jofame iŋuc mupic. Jaŋe dâŋ ʒiŋuc mujomirembiŋ: “Moc e Jesure Kristo mume miti sakarecnenʒepeneŋ.”

²³Irec hâcne neŋgoc mamac jahec‐ticne hâwic‐jofame ʒiŋuc mupic: “E soka tarakicnere e jahacne wiocneniŋ.”

²⁴Eme ŋic ʒâŋe tiŋtuŋ ecnewec e mocwâc hefârerâ ʒiŋuc âzâcnembiŋ: “Go Anutu muteŋkehuc dâŋenʒaŋ, nâŋe ŋic ere fuŋne manaŋgopeneŋ, e hehesicne.”

²⁵Mupie ʒiŋuc jazawec: “E ŋic hehesicne me mâcne, i mi manakopac. Â tiŋtuŋ jupozi ʒâŋe fifi epac, ine mana‐jâmbâŋkekopac.”

²⁶Mume harierâ wiocnembiŋ, “Weniŋuc egarejec, weniŋuc erâ ʒâŋege bâtâcnejec?”

²⁷Mupie ʒiŋuc jazawec: “No ŋazapac i, ŋoŋe ine mi manambieŋ; wemocte hâsine ŋazape mananiŋte muŋgopieŋ? Ŋoŋe motecfâcne ezo muŋgopieŋ me?”

²⁸Iŋuc mume haneckerâ mumbiŋ, “Go hâcne motec‐ticne, nâŋe ine Mosere motecfâc.

²⁹Mose e Anutuzi dâŋ âzâcnewec, i manaŋgopeneŋ, â ŋic e irec me irec fuarâ warewec ine mi manaŋgopeneŋ.”