John 9:12-29

¹²Than puth thawin nungant, “Nil puth Jesus.an wanttin e?” Nil puth paman thaw thant, “Ngee! Nil wanttin natha? Ngay ngoongk-ngoongkama.”

¹³Anpalaniy-a, than pam anana, nil kaꞌathaman meeꞌ koꞌanchan iiy-iiy-a, kalin nunang, Pharisees al-alantan.

¹⁴Nil puth Jesus.anganiy-a, aak ngench thayanangan Saturday.angan ngaanh mich yump, pam meeꞌ koꞌanch alantan, aꞌ meeꞌ min ngulan yump nunang.

¹⁵Aꞌ than Pharisees anangan putham ngul engkin nungant pam alantan, “Nint puth want-wanttak meeꞌ min ngulan iiy-iiyangan e?” Aꞌ nil waaꞌ thant, “Nil Jesus.angan ngaanh michangan meeꞌ namp ngayanga, aꞌ ngayana meeꞌ ngakang ngulan pungang ngathamangana, ana ngay aak paththam ngul thathang, meeꞌ min ngul weemang.”

¹⁶Aꞌ than Pharisees wiy al-alangan Jesus.an waaꞌ-waaꞌin nunang, “Pam anana God.angan keꞌam kuch nunang, yaꞌa, puth nil aak Saturday.an-a, aak ngench thayanan keꞌam piꞌ-piꞌan, yaꞌa.” Puth wiyiy-a, thaw-thawin, “Nil puth pam way yaꞌa! An nil way nath iiyiywey-a, nil puth work piꞌ-piꞌanan keꞌ yumpiya, keꞌ nyiingkan yumpa, yaꞌa.” Aꞌ than Jesus.an wiyangana min waaꞌ-waaꞌin nunang, than wiyanganiya, ep way waaꞌ-waaꞌin nunang.

¹⁷Aꞌ amanam ngulan-a, than putham ngul thawin pam alantan, “Puth nilan meeꞌ minam yump nintang aa? Yaa, puth nintaman wanttak ngaantam-ngeeyangan nunanganiy a?” Puth nilan thaw thant, “Nil pam piꞌan God.antam, propheta.”

¹⁸Puth than Jews al-alangan-a, paman kaangk keꞌ ngeeyayn nunang, than man-ngeeyin nunang puth kaꞌathaman koꞌanch iiy-iiy aꞌ amanaman-a, meeꞌ min ngulan iiy-iiy. Than puth kaath piip pam alantamak wik kuchin pulant wampowpul,

¹⁹aꞌ engkin pulant, “In puk niparam ey? An kan-kanam ey? nil meeꞌ koꞌanchan aak-ngeey ey? Nil puth want-wanttak ngula aak thathan a?”

²⁰Aꞌ kaath piip nungantaman thawpul, “Ngan meeꞌmiy in puk nganttamana, aꞌ ngan meeꞌmiy nil anman meeꞌ koꞌanchan aak-ngeeya.

²¹Ngan puth meeꞌmiy yaꞌa, nil want-wanttak ngulan aak thathana? want-wanttak yaakaꞌ meeꞌ min ngulan weema? puth nil weeꞌang nath meeꞌ min ngulan yump nunang a? Niiy nungant engkān a! Nil puk many yaꞌa, nil pam ngula, puth nilam waaꞌow nungantakam niiyantaniya.”

²²Kaath piip nungantam wik inangan thawpul, pul puth winynyang moꞌpul thanttam, Jews.antam. Puth than Jews anangan-a, kaꞌatham thawin thanttakaman, wik yimanangan, “Than weeꞌ-weeꞌanangan Jesus.an waaꞌayn nunang nil pam anman nil God.angan keenkanaman kaaꞌngak kuchowan-a, ngamp aak churchaman kenthāmp thanang, keꞌ-ngul ngoonchayn, yaꞌa.”

²³Nanpalan kaath piip nungantaman thawpul, “Nil puk many yaꞌa, nil pam ngul a! Niiy nungant engkāna!”

²⁴Anpalaniy-a, than Pharisees ananganiy putham ngul thawin nungant, pam alantan koꞌanch kaꞌathaman iiy-iiy, “Awey, nint pal iiyān a!” Nilana wamp thant, aꞌ than thawin nungant, “Nint meeꞌ God.antang wik kan-kanam waaꞌān ngant a! Ngan puth kan meeꞌmiy nil Jesus.an pam way iiy-iiyana.”

²⁵Nil paman thaw thant, “Ngay ngoongk-ngoongkam nil nath way iiy-iiyana, nath yaꞌ, min nath iiy-iiyana. Puth ngay inan ep meeꞌmiy; ngay kaꞌathaman-a, meeꞌ koꞌanch iiy-iiyangan, puth ngay inan ep ngula, aak minam thath-thathanga.”

²⁶Aꞌ than engkin nungant, “Nil puth wanttak meeꞌan yump nungk a? Nil want-wanttakan puth meeꞌ minan yump nintang a?”

²⁷Nilan puth thaw thant, “Ngay kaꞌathaman niiyant kan waaꞌangan, puth niiy wik kaangk keꞌ ngeeyān ngayanga! Niiy ngeenak ngath puthaman engkaniy e? Niiy nath kaangk ngurp Jesus.antaman iiyān ey?”

²⁸Than Pharisees al-alangan paman ngangk kulangam waaꞌ-waaꞌin nunang, aꞌ thawin, “Nint ep ngurp nungantam, pam alantaman, ngan ep yaꞌ a! Ngan inangan ngurp Moses.antam ep iiy-iiyanan a!

²⁹Ngan puth meeꞌmiy God.an wikan thaw-thawant, Moses.antan. Puth pam ananiy-a, Jesus.aniya, ngan keꞌ meeꞌmiy nunang yaꞌa, ngan ngoongk-ngoongkam nil weeꞌangan nath kuchana.”