Joaŋ 12:9-42

⁹Judanêŋ lau taêsam sêŋô eŋ gêmoa tonaŋ ŋawae tec sêja, mago sêja kêtu Jesu taugeŋŋa atom, sebe sêlic Lasara, taŋ Jesu gêŋu eŋ sa aŋga ŋamatênêŋ naŋ êwiŋ.

¹⁰Lau dabuŋsêga sêkic biŋ gebe sênac Lasara êwiŋ,

¹¹gebe Juda taêsam sêja kêtu eŋŋa e sêkêŋ gêwiŋ Jesu.

¹²Ŋageleŋ ma lau taêsam, taŋ sêô lasê kêtu omŋa naŋ, sêŋô Jesu êna Jerusalem ŋawae,

¹³tec sêôc tômtômlauŋ sêpuc eŋ tôŋtôŋ sêja ma sêmôêc gebe “Osana, alanem eŋ, naŋ gêmêŋ gêjô Apômtau laŋô naŋ, to Israelnêŋ kiŋ,”

¹⁴Jesu kêtap doŋki ŋalatu teŋ sa ma gêŋgôŋ ŋaô kêtôm teto gêc gebe

¹⁵“Sion Latuo, ôtêc taôm atom. Ôlic acgom. nêm kiŋ gêŋgôŋ doŋki ŋalatu teŋ ŋaô gêdêŋ aôm gêwac.”

¹⁶Gêdêŋ tonaŋ Jesunê ŋacseŋomi sêjala biŋ tonaŋ ŋam atom. Mago gêdêŋ taŋ Jesu kêkôc nê ŋawasi sa su naŋ, ac taêŋ gêjam gebe biŋ tônê teto kêpi eŋ. tec sêgôm ŋanô kêsa amboac tonaŋ,

¹⁷Lau taŋ sêwiŋ eŋ gêdêŋ gêmôêc Lasara aŋga sêô ma gêŋu eŋ sa aŋga ŋacmatênêŋ naŋ, tec sêsôm biŋ tau lasê.

¹⁸Amboac tonaŋ lau sêpuc eŋ tôŋtôŋ sêja, gebe sêŋô eŋ gêgôm gêŋtalô tonaŋ ŋawaegac.

¹⁹Ma Parisai sêsôm gêdêŋ tauŋ gebe “Kec, amac alicgac, amacnêm biŋ ŋanô masi, lau samob jatêdaguc eŋgeŋ.”

²⁰Ma Helen ŋagêdô sêwiŋ êsêac, taŋ sêpi Jerusalem sêja naŋ, sebe teteŋ mec êndêŋ om.

²¹Lau tau dêdêŋ Pilip aŋga Betsaida Galilaiaŋa sêja ma teteŋ eŋ gebe “Apômtau, aêacmêŋ abe alic Jesu.”

²²Tec Pilip jakêsôm gêdêŋ Andrea ma Andrea agêc Pilip jasêsôm gêdêŋ Jesu.

²³Ma Jesu gêjô êsêagêc aweŋ gebe “Ŋanoc kêdabiŋgac gebe Ŋamalacnê Latunê ŋawasi êsa.

²⁴Biŋŋanô, aê jasôm tobiŋŋanôgeŋ êndêŋ amac gebe Jaŋgom ŋawê embe êsêp nom atom, oc êtu palê atom ma tau ênêc. Êtu palê acgom, go ênam ŋanô taêsam.

²⁵Ŋac taŋ têtac gêwiŋ gebe êmoa mata jali naŋ, oc ênam sapu. Ma ŋac taŋ têtac gedec tau gebe êmoa mata jali aŋga nom tonec naŋ, oc êmoasiŋ eŋ êŋgôŋ mata jali teŋgeŋ.

²⁶Teŋ embe ênam sakiŋ aê, naŋ êndaŋguc aêmaŋ ma gamêŋ, taŋ aê jaŋgôŋ naŋ, ŋoc sakiŋwaga oc êŋgôŋ êwiŋ. Teŋ embe ênam sakiŋ aê, naŋ Tamoc oc etoc eŋ sa.

²⁷“Galoc aêŋoc katuc kêlênim tau, ma jasôm biŋ amboac ondoc. Jasôm gebe ‘Tamoc, ônam aê kêsi êndêŋ noc tonec me.’ Masianô, aê gamêŋ kêtu noc tonecŋa.

²⁸Tamoc, ôŋgôm nêm ŋaê ŋawae êsa.” Ma biŋ teŋ kêsa aŋga undambê gêmêŋ gebe “Aê gagôm ŋawae kêsagac, ma oc jaŋgôm ŋawae êsa êtiam.”

²⁹Lau taŋ sêkô naŋ, sêŋô e sêsôm gebe “Wapap gêjac.” Ma ŋagêdô sêsôm gebe “Aŋela teŋ kêsôm biŋ gêdêŋ eŋ.”

³⁰Tec Jesu gêjô êsêac aweŋ gebe “Awa tônê kêsa kêtu aêŋa atam, kêsa kêtu amacŋa.

³¹Galoc nom tonec ŋatêm mêtôcŋa. Galoc Anôtô êtiŋ nom tonec ŋatau êsa êna.

³²Ma embe sêsuŋ aê sa aŋga nom, oc jaê êsêac samob sa dêndêŋ aê sêmêŋ.”

³³Biŋ tonaŋ eŋ kêsôm gebe êwa nê êmac êndu ŋalêŋ sa.

³⁴Tec lau sêjô eŋ awa gebe “Aêac tec aŋô gêc biŋsu gebe Kilisi tau oc êmoa teŋgeŋ. Ma amboac ondoc aôm kôsôm sêsuŋ Ŋamalacnê Latu sa acgom. Ŋamalacnê Latu tonê asa.”

³⁵Go Jesu kêsôm gêdêŋ êsêac gebe “Ja tau oc êwê amac ŋasawa sauŋgeŋ ôwiŋ. Asalêŋ atôm lau, taŋ ja gêwê êsêac naŋ, gebe ŋakesec êtap amac sa atom. Ŋac taŋ kêsêlêŋ gêmoa ŋakesec ŋalêlôm naŋ, gêjam kauc gamêŋ, taŋ gebe êna naŋ.

³⁶Ja tec gêwê amac gêmoa. Amboac tonaŋ akêŋ êwiŋ ja tau gebe atu ŋawê latui.” Jesu kêsôm biŋ tonaŋ su ma gêja kêsiŋ tau gêdêŋ êsêac.

³⁷Eŋ gêgôm gêŋtalô kapôêŋ taêsam êsêac sêlic, mago sêkêŋ gêwiŋ eŋ atom,

³⁸gebe propete Jesaia nê biŋ êtu anô gebe “Apômtau, asa lau sêkêŋ gêwiŋ aêacma jaeŋ, ma Apômtau geoc nê lêma ŋaŋaclai lasê gêdêŋ asa.”

³⁹Amboac tonaŋ êsêac têtôm gebe sêkêŋ êwiŋ atom gebe Jesaia kêsôm teŋ gêwiŋ gebe

⁴⁰“Eŋ kêpô êsêac mateŋanô ôkwi to gêjac kapoac êsêac e nêŋ ŋalêlôm ŋadani kêsa, gebe mateŋanô sêlic gêŋ atom to gêŋ ŋalêlôm sêjala biŋ atom ma sênam tauŋ ôkwi atom, e jaŋgôm êsêac ŋajam êsa atom.”

⁴¹Biŋ tonaŋ Jesaia kêsôm gebe gêlic Jesunê ŋawasi to gêwa eŋ sêŋac.

⁴²Biŋ tonaŋ gêc, mago kasêganêŋ taêsam sêkêŋ gêwiŋ eŋ, tageŋ sêsôm lasê atom kêtu Parisaiŋa gebe têtiŋ êsêac su aŋga gôŋacnêŋ atom.