Jon 12:9-42

⁹Yuda tɨbeac ngô wê Yesu la dô Betani ge om he lam vô i, lêc he o lam nêb he ob yê Yesu vaci lêm. Nge, he nêb ob yê Lasalas wê Yesu tɨpi vô i kɨdi lec vac yibên ge hɨxôn.

¹⁰Mêgem xomxo levac wê mi si daa gee hɨlu kɨyang pyap ên nêb ob hi Lasalas i yib hɨxôn,

¹¹ên Yuda tɨbeac xovô wê Lasalas kɨdi lec vac yibên ge om sea Yuda levac dɨ vông i vin Yesu.

¹²Mêd vɨgwe vɨdiiên tɨtige xomxo tɨbeac wê lam dô ên nêb ob yê buc levac ge, he ngô wê Yesu ob mɨla Jelusalem ge,

¹³om he la kô xax lihi dɨ mɨla vô Yesu vac môp dɨ tyuc hɨxôn nêbê, “Il ob pɨmil Anutu dɨ hi vɨxad i pec ên xomxo ti wê tu Apumtau manôn dɨ lam ge, ên i ge tu xomxo levac wê ob viac il Islel.”

¹⁴Mêd Yesu la kô bwoc donki nu ti mɨ dô lec, tɨyi xocbê kɨyang wê yêp vac xolac bêga nêbê,

¹⁵“Xam xomxo Saion, xam xona ên i ma. Xam wê lê. Xam xomxo levac wê ob viac xam ge dô lec bwoc donki nu ti mɨ val.”

¹⁶Vô buc tige Yesu nue ngɨvihi gên lungên kɨyang tige kehe, lêc buc wê Yesu lax dô vac xêseac ge od he xo i lax lec kɨyang tige wê yêp vac xolac ge dɨ xovô nêbê kɨyang tige vô nôn lec vô Yesu.

¹⁷Xomxo wê dô hɨxôn Yesu dɨ yê wê Yesu tɨpi vô Lasalas kɨdi vac lôva mɨ lam ge la nêl kɨyang tige kɨtong vô xomxo tɨbeac.

¹⁸Om xomxo tɨbeac ngô wê Yesu vông do levac tige om he mɨla vô Yesu vac môp.

¹⁹Mêd Palisi nêl vôma ên nêbê, “Xam wê lê. Il nêd kɨyang nôn ma, ên xomxo vɨhati la tɨmu vô Yesu.”

²⁰Xomxo tɨbeac la Jelusalem ên nêb ob la kɨtaa vô Anutu lec buc ngɨbua tige lêc Glik ya la hɨxôn.

²¹Om Glik tigee la vô Pilip wê ben Betsaida vac vɨgwe levac Galili ge, dɨ la nêl vô i ên nêbê, “Xomxo levac, xe ob xê Yesu.”

²²Om Pilip la nêl vô Andlu, dɨ yuu la nêl vô Yesu.

²³Lêc Yesu nêl vô yuu ên nêbê, “Buc wê Xomxo Nu ob kô lê levac ge vô kwabo lec pyap.

²⁴A nêl hɨxôn nôn vô xam bê skom nôn ti obêc la vac kɨbun lêm ge od ob dô ya nôn tibed. Lêc obêc la dô vac kɨbun nɨlô ge od ob tyip mɨ vô nôn tɨbeac.

²⁵Xomxo ti xêyaa obêc vin lec ici va ninɨvi ge od ninɨvi wê i vông ge obêc yib. Lêc xomxo ti obêc vông i vin Anutu dɨ yê ici va ninɨvi tɨyi xocbê susu pɨleva gê kɨbun ga ge od obêc la dô mavɨha luta lêc luta.

²⁶Xomxo ti obêc nêb vông yuac wê a vông ge od i lam tɨmu vô a, ên vɨgwe wê a ob dô vac ge, a nuge yuac obêc dô hɨxôn a. Dɨ xomxo ti obêc vông yuac wê a vông ge od Mag obêc vông lê levac vô i.

²⁷“Gwêbaga a nɨlôg vô vɨyin levac om a ob nêl bêna? A ob nêl bê ‘Mag, ông vô vɨyin tiga vêl ên a’? Ma vêl, a ob nêl bêge lêm. Ên a lam ên a nêb a ob kô vɨyin tige.

²⁸Mag, ông vông ông lêm i vô levac.” Yesu nêl bêge mêd vya ti lam gê lag puunê ên nêbê, “A vông a lêg vô levac pyap dɨ a ob vông i vô levac tii vac nang.”

²⁹Lêc xomxo wê le kwabo gee ngô vya tige om he ya nêl ên nêbê, “Deac tug,” dɨ he ya nêl ên nêbê, “Angela ti keac vô i.”

³⁰Lêc Yesu luu he vya ên nêbê, “Vya tige o lam vô a ên nêb a ngô lêm. Nge, lam ên nêb xam ngô.

³¹Gwêbaga Anutu ob yaxên xomxo kɨbun ga nên kɨyang dɨ ob tii Seten wê tu xomxo kɨbun ga nên levac ge i la vêl.

³²Gwêbaga a gên dô kɨbun, lêc buc wê a obêc yux lec xax ge od a ob dɨdii xomxo vɨhati lam vô a.”

³³Yesu nêl kɨyang tige ên nêb ob nêl môp wê ob yib ge kehe kɨtong vô he.

³⁴Mêd xomxo tigee luu i vya ên nêbê, “Xe ngô kɨyang wê yêp vac xolac bêga nêbê Kɨlisi ob dô mavɨha luta lêc luta. Bêna lêc ông nêb Xomxo Nu ob yux lec xaxê? Xomxo Nu ge letya?”

³⁵Mêd Yesu nêl vô he ên nêbê, “Xêseac ob dô hɨxôn xam myabo tya. Om buc wê xêseac dô hɨxôn xam ge od xam loc vac xêseac, ên mapɨtoc i o lêc hɨvun xam xôn lêm. Ên xomxo ti obêc la vac mapɨtoc ge od ob lungên môp wê ob la vô ge.

³⁶Om xam vông i vin xêseac wê dô hɨxôn xam ge, êdêc tu xêseac nue.” Yesu nêl kɨyang tige pyap mêd sea he dɨ la xôpac ên he.

³⁷Yesu vông do levac tɨbeac vô xomxo manôn mɨ he yê, lêc he o vông i vin i lêm.

³⁸Om kɨyang wê plopet Aisaia nêl ilage vô nôn lec. Kɨyang tige yêp bêga nêbê, “Apumtau, letya vông i vin kɨyang wê xe nêl ge? Apumtau hɨlung xêkɨzêc wê i vông ge lê, lêc letya vông i vin? Xomxo ti o vông i vin lêm.”

³⁹Xomxo tigee tɨyiên ma wê ob vông i vin Yesu ge dɨ kehe yêp vac kɨyang ngwe wê Aisaia kɨvuu bêga nêbê,

⁴⁰“Anutu vông he manôn toc dɨ vông he pɨyôp vô xêkɨzêc, om he manôn yêên ma dɨ he pɨyôp xovôên kɨyang ti ma, dɨ he o pɨlepac he bê Anutu ob vông he dô nivɨha lêm.”

⁴¹Aisaia yê xêseac wê Kɨlisi vông ge om nêl kɨyang tige lec Kɨlisi vaci.

⁴²Mêgem Yuda levac, he tɨbeac vông i vin Yesu, lêc he xona ên Palisi om he o nêl vông vinên wê he vông ge kɨtong seac lêm, ên he xona ên wê Palisi obêc tii he vêl ên xumac lɨlo dɨ vông he la dô nɨnya ge.