Johannes 12:9-42

⁹Iwe, chomong aramas ra rong pwe Jesus a nom lon Petania. Iei mine ra feila ikenan, sap pokiten Jesus chök, nge pwal pokiten ar mochen küna Lasarus, ätewe Jesus a amanauasefäli seni mäla.

¹⁰Iei mine ekewe souasor mi lap ra pwal ekiekin rawangauei Lasarus,

¹¹pun i popun pwe chomong chon Juta ra sü seniir o lükü Jesus.

¹²Iwe, sorotän ewe rän eu mwichen aramas mi chomong ra feito ngeni ewe chulap o ra rongorong pwe Jesus a nom won an sai ngeni Jerusalem.

¹³Iei mine ra angei palen ewe irä palm o feila pwe repwe churi. Iwe, ra osomong le kökkö, “Mwareiti Kot! Feiöchün ätewe a feito fän iten ewe Samol! Feiöchün ewe kingen Israel.”

¹⁴Iwe, Jesus a küna eman nienifön aas o a wawa, usun a fen mak lon ekewe Toropwe mi Pin,

¹⁵“Ousap niuokus, ämi aramasen Sion. Nengeni, ämi we king a feito, a wawa eman nienifön aas.”

¹⁶Lon ena fansoun nöün kewe chon kaiö resap weweiti ekei mettoch. Nge lupwen Jesus a tolong lon lingan, ra chechemeni pwe a fen mak lon ekewe Toropwe mi Pin usun i, pwal usun ar föri ekei mettoch ngeni.

¹⁷Iwe, ekewe aramas mi nom ren Jesus lupwen a körawu Lasarus seni lon ewe peias o amanauasefäli seni mäla ra apworausa mine a fis.

¹⁸Ina popun ewe mwichen aramas mi chomong ra churi, pokiten ra rong pwe a föri ei manaman.

¹⁹Mürin ekewe Farisi ra kapasfengen lefiler, “Oua küna, sisap chüen tongeni föri och! Nengeni, unusen chon fanüfan ra tapwela mürin.”

²⁰Iwe, ekoch chon Krik ra nom lein chokewe mi feitä Jerusalem pwe repwe fel ngeni Kot lupwen ewe chulap.

²¹Ra feila ren Filip, ätei i seni Petsaita lon Kalilea. Iwe, ra üreni, “Äm samol, äm aia mochen churi Jesus.”

²²Filip a feila o apworausa ngeni Andru ei pworaus. Mürin ir me ruoman ra feila o asile ngeni Jesus.

²³Iwe, Jesus a üreniir, “Iei a war ewe fansoun pwe Nöün Aramas epwe angei lingan.

²⁴Enlet, üpwe wesewesen ürenikemi: Eföü föün wiich epwe chök nonom lon ususun are esap mworotiu lepwül o mäla. Nge are epwe mäla, mürin epwe awora chomong föün wiich.

²⁵Iö a echeni püsin manauan epwe pöüt seni, nge iö a oput püsin manauan lon ei fanüfan, manauan epwe chök nonom ngeni manau esemüch.

²⁶Iö a mochen angang ngeniei epwe tapweto müri, pun ia ngang üpwe nom ie, ikenan nei chon angang epwe pwal nom ie. Iwe, Semei epwe asamolu chokewe mi angang ngeniei.

²⁷“Iei letipei a weires. Met ngang üpwe apasa? Ifa usun, üpwe apasa, ‘Semei, kosap mwüt ngeniei pwe üpwe tolong lon ei fansoun riaföü?’ Nge ina popun üa feito fanüfan, pwe üpwe tolong lon ei fansoun riaföü.

²⁸Semei, kopwe alinga itom!” Mürin a wor eu möngüngü seni läng, “Üa fen alinga itei, nge üpwe pwal alingasefäli.”

²⁹Iwe, ewe mwichen aramas mi ütä ikenan ra rong ewe möngüngü. Ekoch me leir ra apasa pwe och chopulap, nge pwal ekoch ra apasa, “Eman chon läng a kapas ngeni.”

³⁰Nge Jesus a üreniir, “Ei möngüngü a fis esap fän itei, pwe fän itemi.

³¹Iei ewe fansoun pwe fanüfan epwe küna kapwüng, iei ewe fansoun ewe samolun ei fanüfan epwe koturula.

³²Lupwen ngang üpwe tekiatä seni ei fanüfan, üpwe ofato aramas meinisin rei.”

³³Jesus a apasatä ei sokun kapas pwe epwe pwärätä meni sokun mäla epwe mälani.

³⁴Ewe mwichen aramas ra pölüeni, “Äm aia silei seni ekewe Allükün lamalam pwe ewe Kraist epwe manau tori feilfeilachök. Pwota ka apasa, pwe Nöün Aramas epwe tekiatä? Iön ei, ewe Nöün Aramas?”

³⁵Mürin Jesus a pölüeniir, “Ewe saram epwe nonom remi ekis chök fansoun mochomoch. Oupwe fetal lon ewe saram me mwen ewe rochopwak epwe torikemi. Pun eman aramas mi fetal lon rochopwak esap silei ia epwe feila ie.

³⁶Oupwe anomu ämi lükülük won ewe saram lupwen a nom remi, pwe oupwe wiliti aramas mi nom lon saram.” Lupwen Jesus a wes me apasa ekei kapas, a feila o op seniir.

³⁷Iei mwo än Jesus föri ekewe manaman meinisin mwen mesen ekewe aramas, nge ir resap lükü i.

³⁸Iei usun met a pwönüetä lon mine ewe soufos Aisea a kapas usun, “Äm Samol, iö a lükü ewe pworaus aia aronga? Iö ewe Samol a pwäri an manaman ngeni?”

³⁹Iei popun pwe resap tongeni lükü, pun Aisea a pwal apasa,

⁴⁰“Kot a achunala meser o aföüala letiper, pwe resap tongeni künakün ren meser ika wewe ren letiper, ika kul ngeniei, pwe üpwe apöchöküleretä.”

⁴¹Aisea a apasa ekei kapas, pun a küna än Jesus ling o kapas usun i.

⁴²Iei mwo nge chomong ekewe nöüwisen chon Juta ra lükü Jesus. Nge pokiten ekewe Farisi, ir resap pwärätä ar lükülük, pun ra niuokus ar repwe katowu seni ar we mwich lon ewe imwen felikis.