João 21:1-12

¹Moromeĩpo tõsenepose ropa Jezu typoetory tomo a ikuhpo ehpio, Tiperiati ehpio. Ynara kynexine toto moroto,

²Ximão Peturu tõ oximõme kynexine Tome maro, Natanaeu maro, Zepeteu mũkuru tõ maro, imehnõ asakoro Jezu poetory tõ maro. (Natanaeu Kanaapõ kynexine. Karirea rãnaõpõ kynexine. Tome kamaramanõpo wãtasẽ kynexine). Enara toh kynexine moroto.

³Morarame ynara tykase Peturu eya xine, —Urakanase ytõko ase, kana anỹse, tykase toto a. —Amaro ytõko ynanase, tykase toto eya. Morarame toytose toto. Kanawaka tõtyrise toto. Moromeĩpo toytose toh rahkene. Kana anỹse tõmehse toto. Yrome ananỹpyra tokurehse toto.

⁴Mame xixi poreh karyhtao Jezu tonese toto a tuna ehpio. Yrome zuaro pyra toh kynexine, ahnome rokẽ tokarose eya xine.

⁵Ynara tykase Jezu eya xine, —Aimo tomo, onoky manỹtou? tykase toto a. —Arypyra, kana ananỹpyra ynanekurehno. Toiparo rokẽ ynanẽmehno, tykase toto eya.

⁶Ynara tykase Jezu eya xine, —Tarãpa ematoko ropa moino akoxi ãpotunurukõ wino akoxi, kana anỹtohme oya xine, tykase Jezu eya xine. Morara exiryke tarãpa tomase ropa eya xine tapotunurukõ wino akoxi. Morarame anymyry se ropa toehse toh repe. “Somoky,” ykaxi, tykase toh repe. Tẽ omoxĩ toehse kana ke. Itamurume kana exiryke, omoxĩ toehse.

⁷Ynara tykase Jezu zamaro exikety Peturu a, —Kutuisarykõ mokyro, tykase. Morara kary etaryke tyya tupõ tamuruse ropa Ximão Peturu a, osemazuhme touse tyya exiryke toerohtohme. Morarame kuhparo tykase Peturu nakuaka, Jezu maro toytotohme.

⁸Mokaro imehnõ Jezu poetory tõ kanawae rokẽ ehpikoxi ropa toytose toto. Kuremỹme tarose tarãpa eya xine. Tuna ehpiry moe pyra kynexine, otarãme sẽ meturume rokene.

⁹Morarame toeporehkase toto ahtao apoto tonese eya xine kana purutopo. Kana tonese epo epurũko wyi maro.

¹⁰—Ananymyhpyrykõ enehko xiaro, tykase Jezu.

¹¹Kanawaka toytose Ximão Peturu kana enehse. Kana moity tarose eya tarãpa ao, soororome, Jezu a ekarotohme. Moroto kana tuhke, 153me tuhke exiry. Yrome tarãpa ekororohpyra.

¹²—Otuhtokose, tykase Jezu eya xine. “Onokyh mahno?” kary se toh kynexine Jezu a repe. Ihxipỹke toexirykõke kara tokurehse toto, zuaro toexirykõke roropa.