Joan 21:1-12

¹Impogini Jeso ikoneatimoigutaarityo aikiro irogamereegi anta otsapiaku inkaare Tiveriashi. Onti okañotaka maika:

²Yapatoitaigaka irogamereegi Jeso. Ario inake Sumo Perero, Tomashi Piteanintacharira, Natanaeri poniankicharira Kanaaku Garireaku, intiegiri itomiegi Severeo intiegiri aikiro pashini piteni irogamereegi.

³Impo ikanti Perero: —Nonkitsatakiteta. Iriroegi ikantaigiri: —Nompokaigaketyo naroegi aikiro. Ovashi iaiganake yomateiganaka pitotsiku, impo ikitsakitsageigavetaka teratyo iragumaige.

⁴Iroro okutagitevetanakara ineaigiri Jeso aratinkake otsapiaku, kantankicha iriroegi teratyo irogoige inti Jeso.

⁵Impo irirori ikantaigiri: —¿Yogaa? ¿Tera pagumaige? Ikantaigiri. —Mameri. Tera nagaige.

⁶Impo ikantaigiri: —Atsi kitsaige apisotateneku pitotsi pakosanoriraku, ario pinkante pagaigake. Iriroegi ikitsaigake, impo iroro inoshiaigaeromera teratyo iragaveaigaero irogaenokaigaerora, ishatekantakarotari shima.

⁷Iniamatanaketyo irogamere Jeso itasanotarira ikantiri Perero: —¡Inti Atinkami! Irorotyo ikemavakera Sumo Perero ogatyo ikenake yogagumatanakatyo imanchaki isapokanakarira inkaara akya iokaataka oaaku pokoroogn.

⁸Yogari itovaire aiño yomateiga pitotsiku, onti inakoigake choeni nigankia ariorika onake 100 metero. Impo iriroegi yamaiganakero pitotsi otsapiaku inoshiatakoiganakerora kitsari, teranika iragaveaigaero irogaenokaigaerora.

⁹Impo iroro yaguigavetanakara ineaigapaakero tagaka tsitsi tashitaka shima ontiri pan.

¹⁰Yogari Jeso ikantaigiri: —Atsi magarantaigake yoga pagaigakerira maika.

¹¹Impo yogari Sumo Perero yomatetanaa pitotsiku inoshiatakotanakeri shima shatekarikatyo kara imarapagerikatyo yamakovagetanakeri otsapiaku. Maganiro inake 153 shima. Itovaigavetakatyo kantankicha teratyo intisaraero kitsari.

¹²Impo yogari Jeso ikantaigiri: —Tainaegi pisekataigakempara. Ikogaigavetaka inkantaigakerimera: “¿Tyani viro?”, kantankicha teratyo tyani kantumaterine, yogoigaketari inti Atinkami.