Jesaia 1:6-30

⁶Aŋga môkêmdaŋgam e jakêsêp emtapa amac amoa toôlim samuc atom, sêm mala to pipi ma kamocbôm gêjac têc ôlim auc, ma amac apip ŋatêkwi su atom, asabaŋ atom, ma akêŋ katêkwi gebe êmalôm kamocŋa atom.

⁷Nêm nom kêtu gasaŋ ma ja geŋ nêm malac su. Lau jaba têdaŋgôŋ nêm kôm ŋanô ma amac matemanô alicgeŋ. Nêm gamêŋ kêtu gasaŋ kêtôm lau jaba seseŋ su.

⁸Sion latuo taugeŋ gacgeŋ gêmoa amboac bec jakwa asê kêkô kôm wainŋa, amboac bec, taŋ sêjam kêkô kôm katimŋa naŋ, ma amboac malac, taŋ ŋacjo sêgi auc.

⁹Lau siŋ undambêŋa nêŋ Apômtau embe endec aêacnêŋ lau ŋapopoc sêmoa atom, oc tatôm lau Sodom ma maleŋmê amboac lau Gomora.

¹⁰Amac gôliŋwaga Sodom ŋa, aŋô Apômtaunê biŋ. Amac lau Gomora, akêŋ taŋem aêacnêŋ Anôtônê biŋsu.

¹¹Apômtau kêsôm gebe “Amacnêm da gwalêkiŋ gebe êmoasiŋ aê amboac ondoc. Aê ôlic ŋakam nêm domba kapoac ma bulimakao ŋalêsi, taŋ akêŋ kêtu daja naŋ. Aê têtac gêwiŋ bulimakao kapoac to domba kapoac me noniŋ kapoac ŋadec atom.

¹²“Gêdêŋ taŋ amac mêŋakô aê laŋôcnêm naŋ, asa kêjatu amac gebe aka aêŋoc malacluŋ popoc.

¹³Akôc da ŋaôma andêŋ aê amêŋ êtiam atom. Nêm da ŋadauŋ gêôc aê e ŋasu sec. Aê gadec nêm om ajôŋ gêô lasêŋa ma sabat to nêm akac sa ŋaonda. Aê gadec nêm biŋ alôb-alôb to nêm omsêga samob.

¹⁴Aê têtac gedec nêm om ajôŋ gêô lasêŋa ma noc aniŋ moasiŋ kapôêŋŋa. Gêŋ tonaŋ ŋai kêsac aê e ôlic ŋakam gebe jaôc.

¹⁵Embe alam lemem êtu ateŋ mecŋa, oc jansaŋ matocanô auc. Ma embe ateŋ mec gwalêkiŋ, oc Jakêŋ taŋoc atom, gebe dec gêjam lemem auc.

¹⁶“Akwasiŋ taôm e atu selec, ma anseŋ sec, taŋ agôm naŋ su gebe ênêc aê laŋôcnêm êtiam atom.

¹⁷Andôŋ taôm êtu aŋgôm gêŋ ŋajamŋa. Ansom biŋ gêdêŋ. Amêtôc êsêac, taŋ sêlêsu lau naŋ. Akwa mosêbu ma anam êsêac sa, ma apuc awêtucnêŋ biŋ tôŋ.”

¹⁸Apômtau kêsôm gebe “Ajôc, amêŋmaŋ, tamansaŋ biŋ dawiŋ tauŋ acgom. Embe nêm sec êtuŋ gamêŋ amboac dêlêcola, oc jalic êtôm tao kwalam. Ma embe amboac obo asôsamuc, oc jaŋgôm êtu sêpôma amboac gwêcôpic.

¹⁹Embe akêŋ êwiŋ ma akêŋ taŋem aêŋoc biŋ, oc aniŋ moasiŋ nom tonecŋa êtiam.

²⁰Mago embe taŋempêc ma ambuc dêmôêm aê, siŋ oc enseŋ amac su. Biŋ tonaŋ kêsa Apômtau tau awa.”

²¹Ojae, gêmuŋgeŋ malac tau kêsap Apômtau tôŋ, mago galoc kêtu awê mockaiŋo sec sugac. Gêmuŋgeŋ biŋ gêdêŋ gêŋgôŋ tonec ma biŋ mansaŋ gêjam malac tau auc, ma galoc lausiŋ geŋgeŋ sêŋgôŋ.

²²Nêm silber kêtu matê ma sêgaluŋ bu gêwiŋ nêm wain.

²³Nêm kasêga sêbuc dêmôêŋ aê ma sêŋgôŋ sêwiŋ geŋgeŋtêna. Êsêac têntac gêwiŋ biŋ kana-kana ma taêŋ kêka gebe lau sêkêŋ gêŋ ŋaômageŋ êndêŋ êsêac. Êsêac sêkwa mosêbu ma sêjam êsêac sa atom ma sêŋô awêtucnêŋ biŋ atom.

²⁴Amboac tonaŋ tec Apômtau, lausiŋ undambêŋa nêŋ Apômtau ma Israelnêŋ laimôkê kêsôm gebe “Aê, aê oc jakêc ŋoc têtac ŋandaŋ êpi ŋoc ŋacjo ma jakêŋ ŋagêjô êpi ŋoc soŋo-soŋo.

²⁵Aê oc jaja lemoc ôkwi ma janac aôm to jakêŋ ja êniŋ nêm ŋatêmui su ênaŋa ma japac gêŋ jaba, taŋ kêgaluŋ gêŋ ŋanô naŋ, su ênaŋa.

²⁶Go jakêŋ gôliŋwaga êtôm gêmuŋŋa ma kwalam laŋgwa têtu nêm lau seŋeŋ êtiam êtôm gêmuŋŋa. Tonaŋ su acgom, go lau samob oc sêsam aôm gebe Malac-biŋ-gêdêŋŋa ma Malac, taŋ kêsap Anôtô tôŋ naŋ.”

²⁷Mêtôc gêdêŋ oc ênam Sion kêsi ma biŋ gêdêŋ oc êpuc lau Sionŋa, taŋ sêjam tauŋ ôkwi naŋ tôŋ.

²⁸Mago lau-sêbuc-dêmôêŋwaga to lau sec oc senseŋ êsêac su sêwiŋ tauŋgeŋ, ma êsêac, taŋ sêwi Apômtau siŋ naŋ, oc sênaŋa.

²⁹Amac oc majem êsa êtu kamem, taŋ atoc sa naŋŋa, ma laŋômanô êmbêlê êtu nêm kôm ŋaolaŋa, taŋ ajaliŋ sa naŋŋa.

³⁰Amac oc atôm kamem, naŋ ŋalauŋ kêsêlô ma atôm kôm teŋ, taŋ ŋabumata kêpa naŋ.