1Josiyasaarini wip Jowakim Utaásh kaneeschiri kurakaam kínaru, anush nuwaa Apanll kamachtarangiya.
2Nuwaa tárangiya. Panginungi watipuranll xiyeerush, Utaáchchee yuwaa kamachtakchi anoo ichinguroo kamanishini, anshuch yakat ichingarusin nuwash pangi kuseersin, nuwaatsimarisha ungirtamaama. Kamankush, nuwaa kuki minamtiyam ksarinllpa.
3Apaz shiyaa kukish mazinakchusin, yutaritshishirineetsi kasakchusina, ashkatssin, nuwsha yuwaa wanimaam chinarangi anoo ndusha ashtachima.
4Ashiri yuwaa nuw Apanlli Taarashipani áti anoo kamanincha. Wandaya nuwaa kuki nda mazinamaam zandkusin, nduntam payuksin,
5misha yuwaatstam tputsireetsi tayaspatampani zangan zangan ashiranguri, zapan waneekana, anootstam nda mazinamaam zandkusin,
6ashiri nee nuwaam pangurangana anoo Silósh tamarangparina, ashtachtamma. Ashkachuri, arapich tputs ichingarusin nee yakat pakchusin, Paja. Apanll yutaritshishimand waneeku, uru ashtariya, siyaa Utaáchcheetsis táchpasinaya, Apanll nuwaa tárangu, nuwsha Apanllip pang' naataranguri, anoo tputsee kamanirangina.
7Apanllpansha urkar, misha tayaspatampantam ichingarusin anshuch yakat, yuwaa nuw Apanllee kuk kamanirangi anoo mazinanataranll ashirangsin,
8kamanim iwatsparamchuri, nuwaatssha putayarusin, táranganaya. ¿Tsipatsee zandkish?
9¿Tamarinaa Apanllee kuk kamankush, in Apanll pang' Silósh Apanlltam pang' tamarangpari ashtachtampari. Mishat, neetssha yakat izuuru Apanll kapeetkachu, tputs ndunarichshapari? átsha, tárangusin, nuwaa taturpiyeerusin, putayarusin, mantsir tsiyataranganaya.
10Utaáshuchsha kurak anoo mazinarangu, waanaatsi pang' kasayaranllu, ambsha Apanllipsha pang' kusarangu, shítungash kaneeschiri wayama annung kuxineeramchusin,
11apanllpansha urkar ichingarusin anush shaneerana, anshtisin, Kurakaa, nee tputs pachayaruch, ksanda átcha. Watam nee yakat mantsir tsiyatku, anoo siy ichingarus kitsis mazinarangitamsawa, tárangusin,
12nuwsha kurakaa, misha tputsee ichingaru tsiyatkuri tárangina. Nuwaa waana Apanll ningeem siyaam kamanimaam kamachtarangu, anuritam nee Apanllee pang', misha yaktaatstam yuwaa waana Apanll tárangu, anoo kamankuri, siysa mazinarangsa.
13Ashiri siy taarashis yarangints. Sheerus, Apanlleetssha kuk payungints. Ashkachus, yuwaa nuw siyaa kamanirangi, anoo ndusha waneeshshee zanganchiya.
14Itaru, siynaa nuwaa yuwari zandkis anuri shingandama, watam nuwaa putayandsawa.
15Itaru, nuw siyaa zurampatari atina. Siy wanari nuwaa wanasirimsheetstaati pachakchus, yuwamand ashkachis anumand siy kapung tumashiris taachiya. Watam waana Apanll nee tsiyatsis kamanimaam nuwaa zanganiranguwa, táranguri,
16kuraksha, misha tputsi ichingarusin apanllpanee urkar táranganaya. ¿Mayaamaja nee tputs pachachich? Watam Apanllimun Taarashipanimun tsiyatkuwa, táranganaya.
17Mishat, wachinsha chiyzayaru, tsiyatarangiya.
18Mazinangtsa. Mangeetsis p'tsichintspa. Yuwapur Esekiyasarini kurakaam kínaru, Utaásh taarangu anpur, Mikiyas, Moresetshuch Utaáshcheem Apanlleetstam kuk kamanku, Apanll ichingaru wamari kasiru an Siyonaa mzatsish tatsumaam tsapoo ichuychatarana uru ashtachiya. Mishat, Irusarinaa yakat kapeetkachu, maachi ichingaru pátangamaw xanaa ashtachiya, misha Apanllsha pang' mach karutachiya, tárangu,
19kuraksha Esekiyasarini, misha Utaáchich tputs ichingarusin anoo mazinarangusin, ¿antaati anumand Mikiyasarineetsi pacharangana? nda. Kurak kizpur punirangu, Apanllpasha tsiyatku, Apaa, amb shirinllpa. Iyaa nayaningcha, tárangiya. Anumandsha Apanll waneeshshee yuwaa wanimaam chinarangu anoo nda zanganirangiya. Ashirucha, iy wanasirimshee tputs Jeremiyasaa pachakchuni, ¿ndusha Apanll aranginash iyaa waniyach? tárangiya.
20Mishat, tsiyatsis mangeetsis p'tsichintspa. Apanllee kuk kamanimapan Uriyasarini, Semayasarini wip, Kiriyat-Jeyarimshuch tputsi, iyashchee Apanllee kuk kamanirangitamta. Jeremiyas amarangparee yaktarineetsi mantsir tsiyatarangu ashirangtam,
21anumandsha kurak Jowakim, misha kurak tsipasawtam ichingaru tputs anush shaniyrana antamsin yuwaa tsiyatarangu anoo mazinarangusin, Uriyasaa pachamaam chinarangusin, itaru Uriyassha anoo yasarangu, puniku, Ijiptop suwarangiya.
22Kurak Jowakim Ijiptop Elnatanaa Akbora wip, misha arangeem min tputs zanganirangiya.
23Ashiriya, anshtisin tputs Ijiptop Uriyasaa putayashinusin, kurakaam Jowakimaam panarangusin, uwsha, Pachayarus, wachush yuwash tsipari pshtakana anush pshtayarus, ksangints, tárangiya.
24Ashirucha, nuwsha Ahikami, Safanarini wipi, Jeremiyasaa kasapana aturi, siyaa mangeetsis p'tseekuri tsiyatkina, tárangiya. Ashirucha, kuraksha nuwaa Jeremiyasaatsi nda pachamaam tputsee kamachtaku, watsta tárangiya. Ashiriya, kamaneena yuwaa Jeremiyasaa pachayaruni kasayani, tputs tárangana anootsi.
