Iosua 23:5-13

⁵Ma ra Luluai kavava God na okole vue diat ta ra luaina mata i vavat ma na korot vairop diat upi koko avat a gire mule diat, ma avat a vatur vake kadia gunan da ra Luluai kavava God i ga ve avat i tana.

⁶Io, avat a ongor tuna upi avat a mur ra lavur magit di ga tumu ia ta ra buk na varkurai kai Moses, upi avat a pait ia, ma koko avat a vana kan ia ta ra papar a lima tuna ba ta ra papar a maira;

⁷Upi koko avat a ki varurung ma ra tarai dia ki boko pire vavat, ma koko avat a vatavatang ra iang i kadia lavur god, ma koko avat a vatang diat ta ra vavalima, ma koko avat a torom ta diat, ma koko avat a va timtibum tadav diat;

⁸avat a ki petep uka tai ra Luluai kavava God, da ava tar pait ia tuk tar ta ra bung gori.

⁹Tago ra Luluai i ga korot vairop vue ra umana ngala na vuna tarai ma ra umana tena ongor ta ra luaina mata i vavat; ma pa ta tikai i ga tur bat avat tuk tar ta ra bung gori.

¹⁰Ta kopono tutana ta vavat na korot murmur tika na arip na marmar, tago ra Luluai kavava God i varubu maravut avat, da i ga ve avat.

¹¹Io, avat a balaure bulu avat, upi avat a mari ra Luluai kavava God.

¹²Ma ona ava vana irai, ma ava mur ra ibaiba ta diat dia ki boko pire vavat ta go ra lavur vuna tarai, ma ona ava taulai ma kadia vaden, ma ava ruk pire diat, ma dia ruk pire vavat,

¹³avat a nunure ba a dovotina ra Luluai kavava God pa na korot vue mule go ra lavur vuna tarai kan avat; diat a varogop uka ma ra palai ma ra kun pire vavat, ma varogop ma ra virit ta ra paka i vavat, ma ra kait ta ra kiau na mata i vavat, tuk tar ta ra bung ba ava virua tana kan go ra bo na gunan nina ra Luluai kavava God i tar tabar avat me.